1 Timoti 4 - Tesitamenti Umupwa 1965

Lwe tukwenya avasambilizi vʼilenga

¹ UwenʼuMupepo akuyanga shisitamaganigani ukuti mumaha ga kumpelela pe vamo valigalamuha mulwitiho, nukutejelezyʼimpepo impuṿwavantu ninsambilizyo zya mpepʼimbivi,

² zye zikujendela mumafuji ga vayangamalenga, ve shikuvasisʼishimanyilo munyenyezyo zyavo vuvo,

³ vakuvindʼukusendʼavantanda, havili vakuti musalaje iṿintu yimo, ṿwʼuMulungu apezile ukuti vaṿiposhelaje nulusalifwo vuvo ve vitisile nukuvumanyʼuvwanalyoli.

⁴ Shʼiṿipelelwa ṿwa Mulungu ṿwonti ṿwinza, ṿitalipo ṿwe ṿilʼumwiho ingʼukuṿiposhela nulusalifwo.

⁵ Shʼizwi lya Mulungu nuluputo ṿwe ṿikuṿizelufwa.

⁶ Ingʼukuvatevetezanya zinizi avamwitu pe we muvomṿi umwinza wa Chilisiti Yesu, shʼamazwi ga lwitiho naga nsambilizyʼinyinza zyʼuzilandite gakukuzizye.

⁷ Utulumbe twa mwambalala utwa vantandʼavagosi twʼuhanaje ukwiṿwa, nkandi uyivelezye izya kumunyilʼuMulungu.

⁸ Shʼukuyivelezya we muntu kwe kukukuvosya hansi vwelele, nkandʼukunyilʼuMulungu kwe kukukuvosya iṿintu ṿwonti she kuli nulumfingwi lwa vulanzi nuvwa shinishi navwe vukwinza.

⁹ Izwi linili lye litungamu lihondeye ukuposhelwa.

¹⁰ She zinizi zye tukuzivombela nukuyikungula fwe mwe muvulugu, she tukumusuvilʼuMulungu umulanzi uMuposhi wa vantu vonti, inkani wa vitisi.

Ulujendo lwa Timoti ninsambilizyo zyakwe

¹¹ Zyʼuvalajizyaje nukuvasambilizya zinizi.

¹² Numo atakusufwaje uvunsi ndali, nkandi uyipelajʼukuva we wa kwenyelezya mumwʼavitisi mumazwi namulujendo namushikunzi namulwitiho namuvuzelu.

¹³ Uyumishizyaje ukuvazya navo Ukalata nukuvayinzanya nukuvasambilizya, uhafishe navo pe ndiyinza.

¹⁴ Ishikunjilwa sha vwila shʼuli nasho utashisufwaje, shisho shʼupelilwe muvukuvwi poka namukuvishilwʼinyove zya vasongo.

¹⁵ Zyʼupangamale zinizi, mwʼuvanje, ukuti vonti venyaje ṿwʼukwonjezyʼahinza ukukula.

¹⁶ Uyenyajʼahinza wewe weka ninsambilizyo vovulo, mwʼuvanje muli zizyo, shʼingʼukuhonzya vovulo pʼukuyipoha wewe nave vakutejelezya vwelele.