1 Timoti 3 - Tesitamenti Umupwa 1965

Avavombezi avapiti mushivanza

¹ Izwʼili lye lya nalyoli lye likuti ingʼumuntu wumo akuvusivililʼuvubishopo, pʼasungwilwʼimbombʼinyinza.

² Uwenʼubishopo pe pakuti avanje muntu wʼatali nazyo nazimo izya kumuholela mumwo, we mulume wa mwantanda woka vwelele, wʼakuteshelʼiṿintu, umusilimusu, umusunde, umutesi kuvajeni, umuntu wʼamanyilʼukusambilizya.

³ Pakuti atavanje wushingwʼezi, nga wʼivo, avanje mutelefu, umusitakulwa, atavanje mupapilampiya,

⁴ avanje muntu wʼakwenyelezyʼahinza inyumba yakwe, wʼali navana ve vali nulusajilo muvunyilaMulungu vwonti.

⁵ Uwenʼuno wengʼapositwe ukwenyelezyʼinyumba yakwe, wʼangashisunjilila vulivuli ishivanza sha Mulungu?

⁶ Pe pakuti atavanje muntu wʼayinjiye mulwitiho shinishi vwelele, ukuti uvwahayivale vutamupelelajʼahamṿuve he hakumugwilizya muvutupulwa vwa Setano.

⁷ Nkandi pe pakuti vamuyanjile zye nyinza nave vali kunzi, ukuti ataligwajʼindigo mumwo, havili atalemwaje mushipingo sha mukwalanzi. Vope navadiyakoni vovulo pakuti vavanje vatehamu, vatavanje va mili zivili, vatavanje ve vashingwʼezi, vatavanje vapapizi va vulonsi vwa nsoni,

⁹ nkandi vavanje muvuzigizigi vwa lwitiho munyenyezyo inzelu.

¹⁰ Niva vwelele valingwaje suti, inga vatali nazyo nazimʼizya kuvalonga pe vavombajʼimbombo ya vudiyakoni.

¹¹ Vope navashi vavo vovulo vavanje vatehamu, vatavanje vakwalanzi, vateshelʼiṿintu, vavanje vatungamu muli zyonti.

¹² Avenʼavadiyakoni vavanje numushi woka, unʼuwakwe unʼuwakwe, lwe vakwenyelezyʼahinza avana vavo ninyumba zyavo.

¹³ She venga vakuvombʼahinza imbombo ya vudiyakoni ve vakuyilonchela apa vwimililʼuvwinza nulusimpʼulugomu mulwitiho lwe luli mwa Chilisiti Yesu.

¹⁴ Lwe nakusimbila zinizi pe nkusuvila ukuti pasyaye pansʼine ukwinza kunukwo.

¹⁵ Nkandi inga nkuhava, pʼumanyaje zye zikuhondela mulujendo lwa munyumba ya Mulungu, nkutaha ishivanza sha Mulungu she shiyipezilʼukuva lupanda nulwalo lwa vwanalyoli.

¹⁶ Uvwenʼuvuzigizigi vwa vunyilaMulungu vwe vupiti vwe vumanyisile nkani, vwe vukuti: UMulungu alolesile mumuvili wa vuntu, avonesile uvugolosu mwa Mupepo, vamuwenyi avahavizya, akumusile kuvakunzi, vamwitisile avamunsi, asatulilwe muvumwamu.