1 Timoti 2 - Tesitamenti Umupwa 1965

Indajizyo zya luputo lwa paluhomano

¹ Ilelo nkuvayinzanya ukuti zitalihaje kuli zyonti izya kuvaputilʼavantu vonti imputo zya kulambilizya nizya kutiniha nizya kulava nizya kusalifwa,

² izya kuvaputilʼavamwene navonti ve vali muvupiti, ukuti tulandilʼuvulanzi vwa vutehamu nuvwihalo swe vanyilaMulungu ava mushinzi.

³ She zye nyinza zinizi kuminso ga Mulungu uMuposhi witu zyʼakuzyitishilʼuwene,

⁴ wʼakasimʼukuti avantu vonti vapokwaje havili vafishe ukuvumanyʼuvwanalyoli.

⁵ ShʼuMulungu ali woka mwene, wope uwa kuvakundanyʼavantu nuMulungu ali woka, we muntu uChilisiti Yesu.

⁶ Wʼayininchilizizye weka, ahayipelʼukuva sha kuvahombolʼavantu vonti; zye zya kuhomeshezelwa pamwaha wakwe.

⁷ Zye nane nimisilwe ukuti inzikumusyaje, ne mwapositili. Nkuyanga zya nalyoli, te zyʼilenga. Ne musambilizi wa vakunzi mulwitiho namuvwanalyoli.

⁸ Nkasime lelo ukuti munkaya zyonti avanaṿuli vaputaje lwe vakuvusyʼinyovʼimfinjile, avasitavuhalazu navasitamadali.

⁹ Vope navantanda vovulo vazwalajʼamenda amahondele, vavanje ninsoni numushinzi. Vatayondondaje amavili gavo nukumeha nutuntu twa sahabu nuvwambo niṿizwalo ṿwa nsavʼinyinji,

¹⁰ nkandi mumbombʼinyinza inza she zivahondeyʼavantanda ve vakutaha uvunyilaMulungu.

¹¹ Umwantanda asambililaje mushimwamwa, avanje nulusajilo.

¹² Ine imbinzite ukuti umwantanda atasambililaje, havili atamutilingajʼumulume, nkandi apumaje.

¹³ ShʼuAdamu wʼatalisilʼukupelwa, uwenʼuEva ahalandata mwisinda.

¹⁴ Havili te wʼuAdamu wʼahofilwe nkandi we mwantanda lwʼahofilwe pʼahashilanya.

¹⁵ Ilelo alipokwa muvupafi vwakwe, inga vakusyelemetela mulwitiho namushikunzi namuvufinjile poka nuvutehamu.