1 Peteli 5 - Tesitamenti Umupwa 1965

Insoshe kuvasongo va shivanza

¹ Avasongo ve muli navo ve nkuvayinzanya ne songo wamwavo, ne home wa mayimba ga Chilisiti, ne mulilani wamwavo muvumwamu vwe vuligwinkulwa inga lumo,

² nkuti: Mudimajʼahinza idimilo lya Mulungu lye muli nalyo, mulisunjililaje. Mutavanje fwe ngati shimo shivaṿijilizizye ndali, nkandi musungwaje mwemwe mweka inza shʼakasimʼuMulungu. Vutavatumaje vwe vulonsi uvuvivi ndali, nkafidi ge moyo;

³ mutayipelajʼukuva mwe vamwene mushigavo she muninchilizilwe ndali, nkandi muyipelajʼukuva mwe va kwenyelezya mumwo idimilo.

⁴ Pʼinga lumo lelo lwʼayinzilʼukuloleha umupiti wa vadimi, pe muliposhelʼishipambwi sha vumwamu ishisitakufwoha.

⁵ Namwe mwe valumendo vovulo muyikonzyaje kuvasongo vinyu. Mukonzelanaje mwenti mwe vuvo vatupu, musyelemetele muvwahayiṿizye. Shʼavahayivale uMulungu akuvenyezya pe pala, nkandʼavenʼavahayiṿizye, vʼakuvakunjilʼuvwila.

Insoshe mwe zivaliye

⁶ Mwe mumwo muyiṿizyaje kumuhono wa maha uwa Mulungu, ukuti ahavimishe inga lumo.

⁷ Zyonti zye mukukutana zye mumutajile wuyo, shʼuwene akuvasajilila imwe.

⁸ Muteshelʼiṿintu, musilimushe, shʼumululusi winyu uMukwalanzi akuzyungula mwonti mwonti fwe nsama ye yikuvuluma. Akwanzʼuwa kumumila.

⁹ We mumuhane ishanaṿuli mulwitiho, mumanye ukuti vope navamwinyu ve vali munsi yonti vatangashimbila amayimba ganaga.

¹⁰ Uwene nyenʼuMulungu umuhatavwila vwonti, wʼavisitʼimwe ukwinjila muvumwamu vwakwe vwa shimashima mwe mwa Chilisiti, wʼalivapela wuyo ukuva mwe vila, alivagomwʼamaha, alivapʼinguṿu, alivasimfwʼimwe mwe muyimṿile amanda mansi.

¹¹ We wuyo ali nuvumwamu namaha shimashima. Amen.

¹² Numuhono wa Silwani uwamwinyu, we nkuti mutungamu, mbasimbiye hansi, ukuvayinzanya nukuvasimishizyʼimwe ukuti uvu vwe vwila vwa Mulungu uvwa nalyoli, vwe musimime mumwo.

¹³ Ishivanza sha mu-Babeli she shisavulilwe poka namwe shikuvalamuha. Akuvalamuha nuMaliko umwana wane.

¹⁴ Mulamunkanaje nulufivpo lwa shikunzi. Uvwihalo vuvanje namwe mwenti mwe muli mwa Chilisiti Yesu. Amen.