1 Peteli 4 - Tesitamenti Umupwa 1965

Ukuzizila imbivi

¹ Ilelo shʼuChilisiti atuyimbiye mumuvili, namwe muyijelenkanye insivo zinizi. Shʼuno wengʼakuyimba mumuvili wʼakulehʼukutalʼamalandu.

² Ilelo amaha ge gasyaye aga vulanzi vwa mumuvili ge mutalandate mumpapilo zya vantu ndali, nkandi muli zizyo zyʼakasimʼuMulungu.

³ Shʼamaha gugo ge mumazile ukuvomba zizyo zye vakasimʼavakunzi gajiye, lwe mujenzite muvulugusu vwa luvembu namumpapilo namuvuholwʼipele namuvuluṿu namuvwashingʼwezi, namuvuvombezi vwa malungu vwe mwiho nzila.

⁴ Vakusukumila she vazile mutakushimbila navo ukuyitaga muntoto ukuyipoposya, mwe mumwo vakuvaholelʼimwe.

⁵ Ve vuvo alivalanduzya wuyo wʼayisenginye nzila ukulonga avalanzi navafwe.

⁶ She mwe munumu navafwe vahaposhelʼIvangeli, ukuti nashenga vakulongwa mumuvili inza she vakulongwʼavantu, valandilaje mumupepo inza she zikuhondela kwa Mulungu.

⁷ Uvwene nyene uvusilo vwa tuntu twonti vwe vupalamiye. Mwe mumwo lelo musilimushe, muteshelʼiṿintu ukuti muputajʼahinza.

⁸ Kwilongolela kuli zyonti mwumishizyajʼishikunzi sha kukundana nalyoli. Shʼishenʼishikunzi shikuziga imbivi nashenga nyinji.

⁹ Inga mukujendelana pe mutetelanʼahinza shisitakukwinkwina.

¹⁰ Mwenti muvombelanaje niṿikunjilwa ṿwe muposheleye, unʼishakwe unʼishakwe, muvanje mwe vasunzi ve vakusunjililʼahinza iṿikunjilwa ṿwa Mulungu ṿwe ṿili mumavila mumavila.

¹¹ Inga woka akuyanga zimo pe zivanje zya mwizwi lya Mulungu, inga woka akumuvombelʼuwamwavo, pʼamuvombele mumaha gʼuMulungu akumupa, ukuti muli zyonti uMulungu atundumikwaje mwe mwa Yesu Chilisiti, wʼavanje nuvumwamu namaha shimashima shisitakusila. Amen.

Uvwinza vwa kuyimṿilwa pazya Chilisiti

¹² Mwe vankundwa, mutasukumilajʼumwotʼuno wʼali mulʼimwe ukuvalinga, mutavanje fwe ngau ahantu hamo ahajeni havazile.

¹³ Nkandi museshelaje lwe mukuyimbilana nuChilisiti mumayimba gakwe, ukuti muhaseshele vovulo nukululutila pala pʼuvumwamu vwakwe vulikupulwa.

¹⁴ Inga mukuligwa pazyʼizina lya Chilisiti, pe mwe vasangalusu. She pʼuMupepo wa vumwamu nuwa Mulungu atendime palʼimwe.

¹⁵ Nkandʼimwe numo atayimbilaje fwe ngati mugogavantu, pamo umwiva, pamo umuvombambivi, pamo umupingalyosi.

¹⁶ Nkandʼingʼakuyimba she muchilisiti pʼatavanje ninsoni ndali, nkandi amumwamishʼuMulungu pizina ili.

¹⁷ Shʼumwaha afisile uwa kutalihʼuvulonzi panyumba ya Mulungu. Ilelo inga vutalisile kumwitʼiswe, pe vangapona vuli ve vakusufanyʼIvangeli lya Mulungu?

¹⁸ Apene lelo ingʼumuntʼumugolosu wʼakupokwa akusyala hansi ukudumulilwa, pʼangavoneha poshi wʼakumwilʼuMulungu nawe mutalamalandu?

¹⁹ Mwe mumwo vengʼuMulungu akasime ukuti vayimbaje, ve vamuninchilizyaje wuyo uMupezi umutungamu amoyo gavo mumbombʼinyinza.