1 Peteli 3 - Tesitamenti Umupwa 1965

Avantʼavanaṿuli navashi vavo

¹ Vovulo namwe mwe vantanda, muyikonzyaje kuvalume vinyu, ukuti nava venga vakusitʼukusajilʼizwi valonkwaje mwe mumushinzi wa vashi vavo nashenga vatayanzile nalimʼizwi,

² lwe venyizye umushinzi winyu umuzelu we muli nawo mulunyilo.

³ Avantanda pakuti vatayembaje lye liyembo lya munzi ilya munsisi utumeho nilya tuntu twa sahabu nilya kuzwalʼiṿizwalo ndali,

⁴ nkandʼumuntu wa muhati we numʼatakumwenya avanje lye liyembo lyavo muli zye zitakusila, nkutaha umwoyo umutelefu we wʼumpumaje. She zye zihondeye nkani kuminso ga Mulungu.

⁵ She vahonzizye vovulo ukuyiyemṿwʼavantandʼavafinjile ava lulwo, ve vahamusuvilagʼuMulungu lwe vayikonzizye kuvalume vavo,

⁶ inza shʼuSala amusajiye uAbulahamu lwʼahamutaha ilya mwene. We muyipezilʼukuva mwe vana vakwe inga mukuvomba zye nyinza namwe shisitakuganduha uluganduho nalumo.

⁷ Vovulo namwe mwe vanaṿuli muve ninjele lwe mukwizya navashi vinyu, muvenyelezyaje fwe ngati nsonta intonsu, muvashindihaje she mumanyile ukuti vuvo nimwe poka mulipwanʼuvupwano vwa vwila vwa vulanzi, havili ukuti imputo zyinyu zitadindilwaje.

Ulupepelezyo liva shichilisiti

⁸ Ilya kumalilizya lelo nkuti muvanjʼumwoyo woka mwene mwenti, muvanje nulupepelezyo, mukundanaje mwe vuvo vatupu mwe vanamuntu, muvanje nishikuku nuvwahayiṿizye.

⁹ Zye ndali ukugalushizanyʼimbivi pambivi, nga luligo paluligo. Nkandi muvanje nalyo lye lya kulota, she zye zizyo mwisitwe ukuti mupwane vwe vulote.

¹⁰ Shʼuno wengʼakasime ukulandilʼuvulanzi nukwenyʼamandʼaminza, we pakuti agalusyʼulumili lwakwe lutayangajʼimbivi, namalomu gakwe ukuti gatayangajʼizya vusheṿu.

¹¹ We pakuti agunjilʼimbivi, avombaje zye nyinza, ayanzʼuvwihalo, ayikungule kuli vuvwo.

¹² Shʼaminso ga Mwene gatontomeye ve vagolosu, amakutwi gakwe gategamiye kuluputo lwavo, nkandʼisheni sha Mwene shivindusile kuvavombambivi.

Ukuyimṿilwa nishiholanyo sha Chilisiti

¹³ Pʼunanu ati vuli namwe lelo, inga mukuyikungula kunyinza?

¹⁴ Posye inga mukuyimṿilwa pazya vugolosu, pe mwe vasangalusu. Mutogopaje lwe vakuvogofwʼavene, mutaganaganaje.

¹⁵ Nkandi mumufinjile uChilisiti uMwene mumoyo ginyu. Muvanje muyisenginye shima izya kuvalanganizya vonti venga vakuvavuzilizyʼimwe izya lusuvilo lwinyu mwe lusimfile. Zye muyangaje muvutelefu namulunyilo.

¹⁶ Inyenyezyo zyinyu zivanjʼinyinza ukuti inga vakuvaholela ukuti mwe vavombambivi, zye havili gamwamajʼamatwe gavo vuvo ve vakululigʼulujendo lwinyu ulwinza lwe mukujendela mwa Chilisiti.

¹⁷ She nukuyimṿilwa panyinza zyenga mukuvomba nukuyimṿilwa pambivi, kulusizyʼuvwinza ukuyimṿilwa panyinza ingʼuMulungu akasime palukasamo lwakwe ukuti muyimṿilwaje.

¹⁸ ShʼuChilisiti afuye lyoka vwelele pavutalamalandu vwitu, umugolosu ahavafwila avasitavugolosu, ukuti atupalamizyaje kwa Mulungu. Shʼagozilwe umuvili wa vuntu, nkandi ahapelwa umulanzi muMupepo,

¹⁹ mwe mumwo ahavala ukupangʼinongwa kuvazimu mujela,

²⁰ ve vasisitʼukwitiha lulwo, lwʼuvuzyihamulaha vwa Mulungu shima vuhati sangapa sangapa mumanda ga Nwaka, lwʼigomṿilwʼimbogoso, ye muli yiyo avantu vansi vwelele, ve valʼumunana mpela, vahapona kuminzi.

²¹ Nkandi shinishi ulwozyo lwe shiholanyo she shili payo lukuvapohʼimwe, lwe te lwa kwefwa uvupamizu vwa muvili ndali, nkandi lulambilizyo kwa Mulungu ukuti atupanjʼinyenyezyo inyinza, mwe muvuzyuha vwa Yesu Chilisiti.

²² Wʼavazile kumwanya, wʼali kumuhonʼumulilo wa Mulungu, we vakonzile kukwakwe avahavizya navamaha navanguṿu.