1 Peteli 2 - Tesitamenti Umupwa 1965

¹ Mwe mumwo lelo mutagaje ukutali ulombwa lwonti nishifumbo shonti namafuji ningulumwo nuvukwakwa vwonti.

² Inza shʼavana avacheche musungwajʼiziva lya njele isitashifumbo, lye livakuzyaje nukuvatwala kuvupokwa,

³ inga nalyoli mwatoma uvutehamu vwa Mwene.

⁴ We mwinze kukwakwe, ivwʼilanzi, ilyene nashengʼavantu valisufizye, kwa Mulungu nyene kwe lisavulwa, ligomu.

⁵ Nimwe vwelele, fwe ngati mavwe amalanzi, muzengwaje ukuva mwe nyumba ya mupepo kuzya vwashiputo uvufinjile, ukuti mufinjilaje imputile zya mwa mupepo zyʼuMulungu akuseshela ukuziposhela mwa Yesu Chilisiti.

⁶ She lisimṿilwe mwa kalata lye likuti: Yenya, mwa Ziyoni mwe nkuvihʼivwe lya pashipembe isavulwa, igomu. Wengʼakumwitiha wuyo wʼatalipasilwʼinsoni.

⁷ Imwe lelo mwe muli nulwitiho ulushindiho lwe lwinyu. Nkandʼavene avasitalwitiho ve ivwe lye valisufizyʼavazenganyumba, lye havili liyipezilʼukuva lya pashipembe,

⁸ Havili ukuva livwe lya kupunula nivwe lya kwazyʼavantu, lye vakupunula mumwo vak ve vakusitʼukusajilʼizwi, zye zizyo vavisilwe nzila.

⁹ Nkandʼimwe mwe luho ulusavulwa, mwe vwashiputo vwa shimwene, mwe vantʼavafinjile, mwe vantu va nsavo yakwe, ukuti mukumusyajʼimbombʼinyinza izyakwe wuyo, wʼavavilishiye ukuvafumwa mushisi ukuti mwinjile muvuzelu vwakwe uvwa kusukumila.

¹⁰ Imwe lulwo mutali mwe luho, nkandi shinishi mwe luho lwa Mulungu. Imwe lulwo numo atavapepelezizye, nkandi shinishi pe mwe vapepelezelwa.

¹¹ Mwe vankundwa, nkuvalambilizyʼimwe she mwe vasamizi vwelele, mwe vashintizi, ukuti muzilʼimpapilo zya muvili wa mbivi zye zikulwʼuvulugu numwoyo.

¹² Ulujendo lwinyu muvakunzi luvanje lwinza, ukuti muli zila zye vakuvaholelʼimwe fwe ngati mwe vavombambivi, mwisinda mumbombo zyinyu zye nyinza lwe zikuloleha kuminso gavo vamushindishʼuMulungu kwisiku lya kwinzilwa.

Ukuyisya kumaha ga vahatansi

¹³ Muyikonzyaje kutuhomelezyo twa vantu twonti pe pazya Mwene wa kumwanya, nakwa mwene wa munsi shʼatilinzilʼinkaya zyonti,

¹⁴ nakuvapiti shʼavatumile wuyo ukuti vavasundajʼavavombambivi nukuvatima avavombanyinza.

¹⁵ Shʼulu lwe lukasamo lwa Mulungu ukuti uvuwelewele vwa vantʼavadedevazu muvumenaje ninyinza zye mukuvomba,

¹⁶ inza she vakuhonzya avasatushe, uvwenʼuvusatushe vwinyu nyene mutavupelajʼukuva vwa kuzyihʼimbivi ndali, nkandi muvonehaje ukuva mwe vanyamata va Mulungu.

¹⁷ Mushindishʼavantu vonti, mukundajʼavamwinyu, mumunyilʼuMulungu, mumushindishʼumwene wa munsi.

Vwe uvuvombezi vuli

¹⁸ Mwe vanyamata, mukonzaje kuvapiti vinyu nulunyilo lwonti, te kwe kuvinza nakuvatehamu veka ndali, nkandi nakuvagalambanu.

¹⁹ She vwe vwila ingʼumuntu akuyimba kunyenyezyo zyʼali nazyo mwe mwa Mulungu, ingʼavantu vakumwizizya munsitavugolosu.

²⁰ Amwe pe lutimo vuli inga mukujimba lwe vakuvahomʼimwe pamalandu ginyu? Nkandi inga mukujimba lwe mukuyimba pambombo zyinyʼinyinza, zye zya vwila kwa Mulungu.

²¹ She zye zizyo mwisitwe, shʼuChilisiti avayimbiyʼimwe, mwʼahavaleshela isha kwenyelezya mumwo, ukuti mulandate munyayo zyakwe:

²² Wʼatatazilʼumulandu numo nishifumbo vatashazile nashimo mwilomu lyakwe;

²³ we lwe vakumuliga atahavagalushizya nalimo ilya kuvaliga wope; we lwʼakuyimṿilwa atayanzile nalimo ilya kuvafinjila; uwene zyonti ahamuninchilizya wuyo wʼakulonjela muvugolosu;

²⁴ we nuvutalamalandu vwitu ahavuzuṿwa mumuvili wakwe pikwi, ukuti lwe swe vafwe kuvutalamalandu tulandilaje kuvugolosu; we mumaṿimṿi gakwe mupozile.

²⁵ She lulwo pe mwali fwe ngʼonzi zye zikupulumba zyeka, nkandi shinishi pe muvweleye kuMudimi nakuMusunzi wa moyo ginyu.