Aeburania 1 - Kilagane Kisha (Kenya)

Mulungu ananena na at'u kukirira kwa Mwanawe

¹ Haho kapindi, Mulungu wanena na akare ehu kukirira kwa manabii. Wanena nao mara nyinji na kwa ngira tofauti-tofauti.

² Ela kahi za siku zizi za mwisho, Mulungu wanena naswi kukirira kwa Mwanawe mwenye. Mulungu waumba urumwengu wosi kukirira kwa Mwana yuyu, kidza akimutsagula kwamba vit'u zhosi vikale vindakala zhakwe.

³ Mwana iye anafwanyesa yo nguma ya Mulungu yenye. Ukimona iye udzamona Mulungu. Urumwengu wosi unaenderera kwa amuri ya kwakwe iriyo na nguvu. Arihokala adzagonya kufwa na kuatsusa at'u dambi zao, wakwenda mulunguni achendakelesi mukono wa kurya wa Mulungu, ariye iye ndiye mwenye nguvu dzulu ya zhosi.

Mwana wa Mulungu ni mubomu kukira malaika

⁴ Bai iye Mwana akikala mubomu kukira malaika dza zho ro dzina arirogerwa ririzho bomu kukira ro ra malaika.

⁵ Kwani k'akuna malaika hatha mumwenga ariyeambwa ni Mulungu kukala, “Uwe u Mwanangu; mimi vivi rero nidzakala Babayo.” Kidza k'akuna malaika ariyeambwa ni Mulungu kukala, “Mimi nindakala Babaye, Naye andakala Mwanangu.”

⁶ Na kidza, Mulungu amurehaho Mwanawe wa kwandza urumwenguni, anaamba, “Malaika osi a Mulungu namamuvoye.”

⁷ Na dzulu za malaika akiamba, “Iye nikuahendya malaikae makakala lupeho, nikuahendya ahumikie makakala moho wa kuaka.”

⁸ Ela dzulu za Mwanawe, Mulungu waamba, “H'ewe Mulungu, uwe undathawala hatha kare na kare, Uthawaliwo ni wa hachi.

⁹ Uwe unahendza hachi, udzamena uthiriri. Ndosa mimi Mulungu, Mulunguo uwe, nakutsagula nikikumwagira mafuha ga furaha kukira andziyo.”

¹⁰ Kidza akiamba, “Haho chaho, uwe Bwana waumba urumwengu na ukiumba mulunguni kwa mikonoyo mwenye.

¹¹ Vivi zhosi vindangamika, ela uwe undasala; vindathumika here nguwo.

¹² Nawe undavikundza here amba. Vizho vindagaluka, ela uwe k'undagaluka bule. Miakayo k'aina mwisho bule.”

¹³ Mulungu k'adzanena na malaikawe yoyosi akamwamba kukala, “Kelesi mukono wangu wa kurya muhaka mahadhuio niathambaraze kamare ts'ini za magulugo.”

¹⁴ Bai malaika ni ahumiki a Mulungu. Ao ni maroho gahumwago ni Mulungu gakaavize at'u mahokerao wokolwi.