Yuda 1 - Nyangbo New Testament

¹ Mɛ Yuda, Yesu Kristo yɛaxɔ̃ɛdɛ nɛ̀ Yakobo yɛadza ɔkɔ. Mɛfɔnɔ keplukpa alɛ ɛsɛsɛ bagɛ bekulu pɛ Owusoso Akaa adɛmɛ nɔ pɛ Yesu Kristo abalɛ alɛ elúɔ.

² Ashagabui ɖiɖi, ishu yɔyɔ nɛ̀ tɛdɛdɛmɛ nɔ lidzì wɔnɔ ɔyɛ nɛ tikpekpè mɛ.

Ebui Kpa Nɛ̀ Butsiɛ Gɛbabà Bagɛetinyi Owusoso Akaa Nabha

³ Mɛbhia alɛ gɛ ɛdɛmɛ nɔ, gɛ kinù mɛ same ɔsɛ tɛ̀ mɛ fɔnɔ keplukpa akɔ ɔnɔ nɛ tibubuɔ gɛ bɔmɔ̃ shu tsyɛɛ, ɛmɔsɛ kɛlɛ ɔsɛ mɛ fɔnɔ keplukpa akɔ wɔnɔ tɛ̀ ɛlɔkɔ kpalà wɔnɔ ɔsɛ tɛ nɔkɔ tɛyɛyɛkɛŋã gɛ balɔkɔ akpɛ ahɔɛ akɔ bayɛyɛkɛŋã ku balɛ awɔ̃.

⁴ Ɔmɔsɛ banɔ teli gɛ batɛ fɔnɔ balɛ ɛpɔ bubuɔ elù kibè tili gɛ bafalaa, banɔ alɛ abafala eku wɔnɔɛshi nɛ tikpukpũ mɛ. Benu banɔ gɛ betinyi Owusoso Akaa, gɛ balɔkɔ Owusoso Akaa tibhui bhuibuɔ asɛ kidzo kɔkɔ anɔ ɔkɔ kɛgɔlɔ ŋaŋã kɛlɛ bagɛ yɛkɛ Yesu Kristoɔ gɛenu bɔlɔ Apalete nɛ̀ Ekusi Gbagbla tenikpo nɔ.

⁵ Nɔonyi ebui alɛ nyɔ̃ɔ, pɔ ɛpɛ sɛ bakà wɔnɔ sɛ̀ Apaleteɛ ebu yɛanɔ nɔ̀ odenɔ Egipte, pɔ kidegbaa ebeyì bagɛ agɛ yɛkɛ aŋãa.

⁶ Kɛlɛ baxɔ̃ɛdɛ gɛ bagɛ wɔa balɛ axɔ̃ɛ nɛ ohumi nɔ gɛ bakɔ alɛ shu pɛ bashɛ nɛ balɛ ɛzãkɔ, balɛ yɛalɔkɔ akpɛ otumũɔ mɛ elu, pɛ banyã alɛ nɛ̀ ɛɖahuiɛ odiyinɔ Kebhu kukulu Kiwui nabha.

⁷ Nɛ kidzo ɛlɛ nabha, Sodom nɛ̀ Gomora nɛ̀ ɛma nɛ ɛma ɛlɛ mɛ alɔkɔ balɛishu akpɛ agɔlɔ ŋaŋã nɛ̀ tɛwɔwɔsɔ̃ nɛ bagɔlɔ mɛ. Banɔ alɛ edzì kibui mɔmɔlu ɔkɔ bagɛ bamɔ bɔtɔ nɛ batɔ̃ pɔpɔ̃ ɔkɔ kifúɔ gɛtã tihɔɔ nɔ mɛ.

⁸ Nɛ kidzo ɛlɛ abha, banɔ alɛ gɛ baza bɔlala akpɛ balɛ̀ishu dzya nɔtsɔ̃, batɛ abhɛtɛ̀ tɔɖɔ ɔsha abha, kɛlɛ baɖɔaɖɔ kpa nɛ kititì banɔ nɔ shu.

⁹ Pɔ otugbà axɔ̃ɛdɛ Mixael, nɛ kibeɛ gɛ aza wlɔãkɛ kibui nɛ̀ abosam nɛ Mose ishudzya shu tsyɛ, agɛ kpɛité aɖɔaɖɔ kpa alɔɛtití nɛ yɛishu, pɔ aɖɔ asɛ, “Apaleteɛ etseɖenɔ nɛ̀ wɔ!”

¹⁰ Pɔ banɔ alɛ xɔnɔ baɖɔ akwalatu ebui alɔɛtití nɛ kibui nɔnɔ gɛ begilũ kɛlɛ esiɛ shu. Asɛ efutumɛ agã gɛ batɛ abhɛtɛ ekpeɖekpeɖe mɛ, ebui nɛ alɛ gɛezĩ alɛ.

¹¹ Aba gagalĩ akɔ alɛ! Balɔkɔ Kain idzoɔ, bebu tɛtsɛɖɛ mɛ avɛ̀ tɛ badɛ mɔ ɛdɔ̃ gɛmɔ tɔɖɔ odenɔ Baalam kesi tata mɛ, beyì alɛ nɛ Korax kititì lɔlɔ mɛ.

¹² Banɔ alɛ enu kihututũ nɛ wɔnɔ tɛdɛdɛmɛ nɔ ɔdɔ̃ ɔŋãkɔ, gɛ baŋã ɔdɔ nɛ̀ wɔnɔ gɛ kɛtɛ wɔa axɔ̃ɛ bhlui nɛ balɛishu mɛ tsyɛ, ibhoshi agbagbana elete gɛ beeɖì balɛ ete ishu abha. Bedzi asɛ ɔmɔlɔ̃ gɛ subhà ma ɔlɛ mɛ, gɛ kɛlɛ́ɛ nɔ fù ɔlɛ ɔshɛnɔ, ekpemɛ beesìɛ gɛ etieyù eyuyù nanà pɛ bakpà ebho pɛ betsí pete nɔ.

¹³ Benu aƒuɔ gɛetsu guɖaguɖà, gɛebu balɛ awũi ebui bhɛbhɛtɛ̀ akasɛ, awɔ̃ɛ gɛ anyɔ̃ akanà, banɔ gɛ babalɛ otumũ tutũ gɛɔdɛ elu akɔ tihɔɔ.

¹⁴ Henox, anɔ gegenemiɛ odenɔ Adamu mɛ̀, aɖɔ ebui elú nɛ banɔ alɛ nɛidì shu asɛ̀, “Nɔoɖi mɔ, Apaleteɛ aba nɛ̀ yɛanɔ dadalɛ nɛ ihotu, ihotu mɛ

¹⁵ tɛ̀ ebekulu kebhu nɛ̀ aka nyia aka, tɛ̀ bebù bagɛ etinyi Owusoso Akaa petee ɛpɔ nɛ̀ ubui kpa petee gɛ babhɛtɛ nɛ gɛ betinyi Owusoso Akaa so, nɛ̀ kaɖɔ kpa gɛ ebui kpa bhɛbhɛtɛ̀ elete gɛ beti esì Owusoso Akaa ifùɔ aɖɔ nɛ yɛishuɔ.”

¹⁶ Banɔ alɛ enù banɔ gɛ̀ bakpɛmɛ ishu pɛ bapɛ̀ kizizĩ nɛ anɔ shu, batɔnɔ balɛ ahɔɛ ebui kpa tɛpɛpɛɛ ede, beetũ ahɔɛ etelũ ɔkɔ balɛishu pɛ beedzyinì banɔ akpɛ̀ akɔ balɛishu tɛpɛpɛ so.

Tikukulu Ɔkɔ Kemì kpɛkpɛ

¹⁷ Pɔ mɛadzya alɛ gɛ ɛdɛmɛ nɔ, nɔ bakà ebuiɛ gɛ bɔlɔ Apalete Yesu Kristo yɛanɔkpɛkpɛ aɖɔ akpɛ otugbàa.

¹⁸ Betseɖe wɔnɔ asɛ, “Nɛ ewui gɔgɔɛ nɔ mɛɛ, bagɛ amɔ̃ɛ anɔ ababa, banɔ gɛ abazã alɛ mayɛkɛ mayɛkɛŋã edzoɔ niede.”

¹⁹ Banɔ alɛ balɛ ebù wɔnɔ ɔtɔ, banɔ gɛ batɔnɔ ishupi mɛ ebui ede pɛ Ɔfɔfuĩa nɔ ma balɛ mɛ.

²⁰ Pɔ mɛbhia alɛ gɛ ɛdɛmɛ nɔ xɔnɔ, nɔbhɔ wɔnɔ shu owunɔ kabha nɛ wɔnɔ ishu dadalɛ tɛyɛyɛkɛŋã mɛ̀, tɛ̀ nokulu Owusoso Akaa nɛ Ɔfɔfuĩa Gbangbã mɛ̀.

²¹ Nɔlɔkɔ wɔnɔ ishu ɔzã Owusoso Akaa tɛdɛdɛmɛ nɔ mɛ̀ kibeɛ gɛ nopo Apalete Yesu Kristo yɛashagabui ɖiɖiɛ, tɛ̀ amanà wɔnɔ nɛ ɛkpã tihɔɔ nɔ mɛ.

²² Nɔobì bagɛ batɛ ayɛkɛ aŋã ashagabui,

²³ nɔbhɛ̃ bagɔgɔɛ odenɔ kifúɔ gɛta mɛ tɛ̀ nɔyɛkɛ ɔkɔ alɛ. Banɔ gɔgɔɛ nɔ nɔobì alɛ ashagabui nɛ kifu sisi mɛ̀, kɛlɛ nɔtɛ dɛmɛnɔ nɛ̀ balɛ akpɛkpɛ gɛ etuturu edenɔ ebui kpa bhɛbhɛtɛ mɛɛ tsyɛ.

Tikukulu Ɔkɔ Kinyè Kpɛkpɛ Nɛitití

²⁴ Ishu dadalɛ ɔkɔ anunɔ gɛ yɛakɔ asɛ tɛ̀ nɔtɛ dɔ oboe, sɛ tɛ̀ alɔkɔ ɔnɔ elù anɔ dadalɛ amɛ tɛ̀ kibui kpa tɛzã wɔnɔ shu pɔ nɛ same mɛɛ,

²⁵ ishu dadalɛ, bukusi ŋaŋã, ohumi ɔkɔ Owusoso Akaa ete gɛenu anɔ gɛ ebu ulɔ, ɔgana Apalete Yesu Kristo abha, nɛ agɔ gɛ latɛ bafala petee mɛ, odenɔ otsiɛ ɔvɛnɔ tihɔɔ mɛ! Amen.