Yohanes 3 1 - Nyangbo New Testament

¹ Mɛ asɛ ɔhamɛ anɔ sheshè ana, Ɛsɛsɛ wɔ Gayo epluka alɛ, wɔ anɔ gɛ ɛdɛmɛnɔ nɛ kibui gbã mɛ.

² Mɛɔbhia gɛ ɛdɛmɛnɔ, iikulu Owusoso Akaa kɔwɔ sɛ tɛ̀ ɔmɔ ishumɛ gagalĩ, sɛ tɛ kɛka nyia ka vɛ ɛlɛ abha piapii nɛ̀ wɔ, asɛ kana gɛ inyi ɔsɛ ɔgagalĩ nɛ ɔfɔfuĩa nɔ mɛ.

³ Kiku mɛ samè ɔsɛ badzya teli aba aɖɔ nɛ kana gɛ ɔlɛ piapi nɛ kibui gbã mɛ, nɛ̀ kana gɛ otsiɖì ɛlɛ abha ɔgã nɛ kɛlɛ shuɔ.

⁴ Same mɔmɔ hohoe nanà abhama mɛahɔɛ ɔdɛ sɛ tɛ̀ ilũ sɛ mɛeyi alɛ aagã nɛ kibui gbã mɛ.

⁵ Mɛɔbhia gɛ ɛdɛmɛnɔ, ɔbhɛtɛ kibuiɛ gɛ lɛ ɛlɛ ɔzakɔ nɛ kɛgɛ ɔbhɛtɛ ɔkɔ badzya shu, gɛ beefu pɔ benu akɔ wɔ flogo.

⁶ Baɖɔ wɔtɛdɛdɛmɛ nɔ etseɖe ɔhaa. Ebedzi kibui piapi akɔwɔ ɔsɛ tɛ̀ ɔtɔɖɔ alɛ nɛ kidzoɔ gɛpɛ̃ ɔkɔ Owusoso Akaa nabha.

⁷ Kinyeɛ shu sopɛ bavɛ ada ɔnyɔ̃ɔ, pɔ batɛ amɔ tɛpɛplɛnɔ odenɔ bagɛ agɛ yɛkɛŋã ɔkɔ tsyɛ flogo.

⁸ Kɛlɛ ɔsɛ bɔbhɛtɛ̀ ɛyamɛ gbangbã ɔkɔ banyɛ alɛ nɛidi sɛ tɛ̀ bɔwɔa axɔ̃ɛ kpɛitsù ɔkɔ kibui gbã.

⁹ Ɛfɔnɔ keplukpa kɔ ɔhaa, pɔ Ɖiotrefo, gɛ apɛ asɛ tɛ̀ eku anɔ awɔ̃ soɔ, atɛ eɖi ɔlɔ akpɛ kɛnanà mɛ.

¹⁰ Kliso onupɛ ɛba, ɛbakɔ notì kɛgɛ yɛabhɛtɛ̀ɛ, agã olugbũ edzì alɔkɔ ezĩ bɔlɔ shu nɔ. Gɛ kɛlɛ gɛikpè ɔkɔɛ soɔ, agɛpɛ tsyɛ asɛ tɛ̀ ayɛkɛ baadzya. Etsodzì bagɛ apɛ asɛ ayɛkɛ alɛ tsyɛ, kɛlɛ ebu alɛ eyinɔ nɛ ɔhaa mɛ.

¹¹ Mɛɔbhia gɛ ɛdɛmɛ nɔ, tiɖi kibui kpa tɛ̀ ɔbhɛtɛ̀ nɛ kɛlɛ ulũ, pɔ ɖi kɛgɛ pɛ̃ tɛ ɔbhɛtɛ̀ nɛ ɛlɛ shu. Anunɔ gɛ abhɛtɛ kibui gbangbã, enu anɔ gɛ ede Owusoso Akaa ɔkɔ. Anunɔ gɛ abhɛtɛ̀ ebui kpa etinyi Owusoso Akaa.

¹² Anɔ ka nyia ka aɖɔ ebui gbangbã nɛ Demetrio shu, kibuiɛ tsyɛ ɖɔaɖɔ gbangbã nɛishu ana. Bɔlɔ tsyɛ ɖɔaɖɔ gbangbã nɛ yɛishu, kɛlɛ nɔonyi ɔsɛ bɔlɔ kibuiɛ gɛ bɔɖɔ dalɛ yɛishuɔ nu kibui gbã.

¹³ Ebui kpekpè alɛ mɛ ahɔɛ gɛ kɛlɛ sɛ ɛfɔnɔ kɔ wɔ, pɔ ɛgɛ pɛ sɛ lɔkɔ bɔdɔ̃ fɔfɔnɔ ishìi nɛ̀ bɔdɔ̃ fɔfɔnɔ bulĩ bhɛtɛ ɛlɛ nɔ.

¹⁴ Iɖì kidzomɛ ɔsɛ tɛ ɛmɔ wɔ gulũi, kɛlɛ bɔbà ɖɔaɖɔ bamɛ nɛ̀ amɛ.

¹⁵ Ishuyɔyɔ kɔ wɔ. Badzya nɛ ɛkɛlɛ̀ asɛnɛ wɔ. Ɛsɛnɔ wɔnɔ ɛbhia alɛ nɛ ɛkɛlɛ piapi.