Yohanes 2 1 - Nyangbo New Testament

¹ Denɔ Esheshèɛ ɔkɔ, Ɔsɛsɛ apãlĩɛ gɛ bebu eluɔ nɛ̀ yɛeyi alɛ, gɛ ɛdɛmɛ nɔ alɛ nɛ kibui gbã mɛ, gɛnɛ mɛ ete pɔ bagɛ balɛ enyi kibui gbã tsyɛ petee,

² ɔmɔsɛ kibui gbã kpasɛ bɔlɔ mɛ̀ kɛlɛ kɛkpasɛ ɔlɔ mɛ ɖaa.

³ Tibhui bhuibu, ashagabui ɖiɖi nɛ̀ ishu yɔyɔ ode Owusoso Akaa nɛ̀ Yesu Kristo gɛenu bɔlɔ Akaa Yɛeyiɛ ɔkɔ, balɛ abazã aplɛnɔ ɔlɔ nɛ kibui gbã nɛ̀ tɛdɛdɛmɛ nɔ mɛ̀.

⁴ Kɛkɔ mɛ same gbagbla sɛ ɛmɔ wɔnɔ eyi alɛ teli sɛ bagã nɛ kibui gbã mɛ, asɛ kana gɛ Akaa akpɛ ɔsha akɔ wɔnɔ ana.

⁵ Kɛlɛ otsiɛ nɔ, apalĩɛ gɛ ɛdɛmɛnɔ, gɛnɛ ɔsha vɔvɔ mɛfɔnɔ pɔ ɔgɛ ɔlɛ ɔlɔ ahɔɛ odenɔ kesi ɔkpɛkɔ. Ibisi ɔsɛ tɛ̀ bɔdɛmɛ nɛ̀ agɔlɔ.

⁶ Kɛlɛ kɛlɛinu tɛdɛdɛmɛ nɔ, sɛ tɛ̀ bɔgã nɛ yɛɔsha nabha nɛ batɔ̃ lulũ mɛ. Asɛ gɛ nɔolũ odenɔ kesiɛ ɔkpɛkɔ ana, yɛɔsha gɛ akpɛ ɔlɛ onù ɔsɛ tɛ̀ nɔgã nɛ tɛdɛdɛmɛ nɔ mɛ.

⁷ Asɛnɛ elete gelee, gɛ bagɛ mɔ̃ Yesu Kristo sɛ̀ aba nɛ ishudzya mɛ, betsoku kanɔ nɔ̀ mɛ. Anɔ alɛ nɛidì enu anɔ gɛ awɔɛ anɔ nɛ̀ asɛnɛ kristoelete.

⁸ Nɔoɖi ɛlɛ ɔkɔ sɛ̀ nɔgɛ yala kɛnanà gɛ nɔwɔa axɔ̃ɛ ɔkɔ, pɔ sɛ tɛ̀ babuia ɛlɛ shu kɛbhɛ akɔ wɔnɔ tɛ̀ kɛna.

⁹ Anunɔ gɛ atɛ fala eputɔ pɛ agɛ akasɛ ɔdɔ̃ nɛ Kristo yɛɔdɔ̃ kakasɛ nabhaa, Owusoso Akaa ama yɛmɛ, pɔ anunɔ gɛ etsiɖì ɛlɛ abha pɛ akasɛ Kristo ɔdɔ̃ɔ, yɛahɔɛ Akaa nɛ̀ Eyiɛ pete alɛ.

¹⁰ Onupɛ anɔ teli aba wɔnɔ ɔhha pɛ agɛ mana bɔdɔ̃ kakasɛ ɛlɛ, nɔtɛ̀ gbanà yɛ kpɛ wɔnɔ bɔpã mɛ alo tɛ̀ nɔyɛkɛ yɛ tsyɛ.

¹¹ Anunɔ gɛ ayɛkɛ anɔ alɛ ayɛkɛ yɛtakpumɛ zizĩ axɔ̃ɛ wɔawɔa tsyɛ.

¹² Ebui kpekpè alɛ mɛahɔɛ gɛ kɛlɛ ɔsɛ tɛ ɛfɔnɔ kɔ ɔnɔ, pɔ ɛgɛ pɛ sɛ tɛ ɛwɔa keplukpa nɛ̀ bɔdɔ̃ fɔfɔnɔ uli shu axɔ̃ɛ. Pɔ ɛpɛ sɛ̀ tɛ̀ mɛba wɔnɔ ɔbha tɛ̀ ɛbaɖɔaɖɔ nɛ̀ wɔnɔ bamɛ nɛ̀ amɛ, sɛ tɛ̀ bɔlɔ same mɔmɔ ana.

¹³ Wɔada nɔ gɛ bebu eluɔ, yɛeyi alɛ asɛnɛ ɔnɔ o.