Yohanes 1 5 - Nyangbo New Testament

Tɛyɛyɛkɛŋã Nɛ Owusoso Akaa Yɛeyianyɛ Nabha

¹ Anɔ ka nyia ka gɛ ayɛkɛ aŋã sɛ̀ Yesu yɛenu Kristoɔ, enu Owusoso Akaa ayɛ, kɛlɛ aka nyia aka gɛ adɛmɛ nɔ Akaa adɛmɛ nɔ yɛeyiɛ tsyɛ.

² Kidzo ɛlɛ nabha bɔgã pɛ buti sɛ̀ bɔdɛmɛ nɔ nɛ̀ Owusoso Akaa yɛeyi alɛ, gɛ onupɛ bɔdɛmɛ nɔ Owusoso Akaa pɛ bɔbhɛtɛ̀ tɔɖɔ yɛɔshaa nabhaa.

³ Tɛdɛdɛmɛ nɔ ɔkɔ Owusoso Akaa kɛlɛinu ɔsɛ̀, tɛ bɔbhɛtɛ̀ tɔɖɔ yɛɔshaa nabha. Kɛlɛ yɛɔshaa tsyɛ gɛ gagalĩ,

⁴ ɔmɔsɛ aka nyia aka gɛede Owusoso Akaa mɛ aŋã kanɔ nɔ̀ nabha. Kɛlɛ kɛlɛinu kabha ŋaŋã gɛŋã kanɔ nɔ̀ nabha, gɛenu ɔlɔ tɛyɛyɛkɛŋã.

⁵ Afana gɛenu anɔ gɛ aŋã kanɔ nɔ̀ nabha? Anunɔ gɛ yɛayɛkɛ aŋã sɛ̀ Yesu yɛenu Owusoso Akaa yɛeyiɛ ete.

⁶ Anɔ alɛ yɛagã bulĩ nɛ̀ dzyosu mɛ aba, yɛenu Yesu Kristoɔ. Agɛ gã bulĩ ete mɛ̀ pɛ aba, pɔ bulĩ nɛ̀ dzyosu mɛ yɛagã aba. Kɛlɛ ɔfɔfuĩa nɔ ɔlɛ ɖɔaɖɔ dalɛ̃ kɛlɛishu, ɔmɔsɛ ɔfɔfuĩa nɔ ɔlɛ onu kibui gbã.

⁷ Ɔmɔsɛ banɔ edì tata balɛ aɖɔaɖɔ dalɛ kɛlɛishu,

⁸ Ɔfɔfuĩa nɔ, bulĩɛ nɛ̀ dzyosu nɔ, kɛlɛ banɔ edi tata alɛ tenikpo.

⁹ Bɔyɛkɛ anɔdzyrame ebui ɖɔɖɔ, pɔ Owusoso Akaa ebui ɖɔɖɔ egbogblo adɛ, ɔmɔsɛ alɛenu Owusoso Akaa ebui gɛaɖɔ nɛ Yɛeyianyɛ shu.

¹⁰ Kibui ɛlɛ gɛ baɖɔ adalɛ yɛishuɔ bazã anɔ ka nyia ka yɛitúɔ mɛ gɛ ayɛkɛ Owusoso Akaa Eyi nabha aŋãa. Anɔ nyia anɔ gɛ agɛ yɛkɛ Owusoso Akaa nabha aŋãa abhɛtɛ yɛ yɛedzi asɛnɛ elete, ɔmɔsɛ agɛ yɛkɛ kibuiɛ gɛ Owusoso Akaa aɖɔ adalɛ Yɛeyiɛ shuɔ nabha aŋã.

¹¹ Kibui ɛlɛ yɛaɖɔ adalɛ yɛishu asɛ, Owusoso Akaa akɔ ɔlɔ ɛkpã tihɔɔ, kɛlɛ ɛkpã ɛlɛ kpasɛ Yɛeyianyɛ mɛ.

¹² Anɔ nyia anɔ gɛ ayɛkɛ Eyiɛ nabha ŋã ɛkpã lɛ yɛahɔɛ, kɛlɛ ɛkpã ma anunɔ gɛ agɛ yɛkɛ Owusoso Akaa yɛeyi nabha mɛ.

Ebuiɖɔɖɔ Gɔgɔɛ Nɔ

¹³ Ɛfɔnɔ ebui alɛ kɔ wɔnɔ bagɛ nɔyɛkɛ Owusoso Akaa Eyiɛ ninye nabha aŋã, sɛ tɛ̀ nɔotì ɔsɛ ɛkpã tihɔɔ lɛ wɔnɔ ahɔɛ.

¹⁴ Awɔ̃ lulu alɛ yɛakpasɛ ɔlɔ mɛ sopɛ butso ɔplɛnɔ Owusoso Akaa, sɛ tɛ̀ onupɛ bubisì kɛdɔ̃ tiliɛ nɛ yɛ tɛpɛpɛ ulũɔ, aba taatɔ̃ nɛ̀ ɔlɔ.

¹⁵ Kɛlɛ onupɛ bunyi sɛ ataatɔ̃ nɛ̀ ɔlɔ nɛ kɛka nyia ka gɛ bubisiɛ shuɔ, bunyi sɛ bɔbà mɔ kɛgɛ bubisi odenɔ yɛɔkɔɔ.

¹⁶ Onupɛ anɔ teli amɔ yɛadzya gɛ abhɛtɛ kibui kpa tili gɛ kɛtɛ bagbanà yɛ ɔvɛnɔ butsì mɛɛ, ekulu Owusoso Akaa tɛ Owusoso Akaa akɔ̀ anɔ alɛ amɔ ɛkpã. Ɛɖɔaɖɔ nɛ banɔ alɛ gɛ balɛ kibui kpa bhɛbhɛtɛ tɛ gbanà alɛ kpɛ butsi mɛ shu. Kibui kpa tili lɛ gɛ kɛgbanà anɔ ɔvɛnɔ butsì mɛ. Ɛtɛɖɔ ɔsɛ ekulu Owusoso Akaa nɛ kibui ɛlɛ shu.

¹⁷ Kesitata ka nyia ka ɛdi nu kibui kpa bhɛbhɛtɛ, kɛlɛ kibui kpa tili lɛ gɛ kɛtɛ gbanà anɔ vɛnɔ butsì mɛ.

¹⁸ Bunyi sɛ aka nyia aka gɛ bamɔ nɛ Owusoso Akaa mɛ atɛzã kɛlɛ abha pɛ aza bhɛtɛ̀ kibui kpa, anunɔ gɛ bamɔ nɛ Owusoso Akaa mɛ yɛakɔ anɔ alɛ nɛidi azã piapii, kɛlɛ abosam atɛ balà kpɛ̀ kɛpɔ̃ nɛishu.

¹⁹ Bunyi sɛ Owusoso Akaa yɛeyi alɛ bunu, kɛlɛ bunyi tsyɛ ɔsɛ kanɔ nɔ̀ tɛgbagbana kpasɛ abosam esi.

²⁰ Bunyi tsyɛ ɔsɛ Owusoso Akaa Yɛeyiɛ aba kɛlɛ abakɔ bulũ kɛlɛ esi, ɔsɛ tɛ̀ butì anunɔ gɛ yɛaɖɔ kibui gbã. Kɛlɛ bɔkpasɛ agɛ yɛaɖɔ kibui gbã mɛ, gɛ yɛenu Yɛeyianyɛ Yesu Kristo. Yɛenu Owusoso Akaa kibui gbã nɛ̀ ɛkpã tihɔɔ elete.

²¹ Mɛeyi alɛ gɛ ɛdɛmɛ nɔ, nobu wɔnɔ ishu oyinɔ nɛ ibudì shù.