Yohanes 1 4 - Nyangbo New Testament

Nɔolu Awɔ̃ Oɖi Ɛfɔfuĩa Nɔ

¹ Mɛadzya alɛ gɛ ɛdɛmɛ nɔ, nɔtɛ yɛkɛ ɛfɔfuĩa ka nyia ka abha ɔŋã, pɔ nɔolũ awɔ̃ oɖi ɛfɔfuĩa nɔ tɛ̀ nɔmɔ ɔsɛ̀ Owusoso Akaa ɔkɔ lide, ɔmɔsɛ asɛnɛ ebuiɖɔluanɔ kpekpèɛ etsoku kanɔ nɔ̀ mɛ.

² Kidzo ɛlɛ abha nɔbɔ gã pɛ nɔbɔ mɔ ɔsɛ Owusoso Akaa Ɔfɔfuĩa nɔɔlɛ, ɔfɔfuĩa ka nyia ka gɛ lɔonyi ɔsɛ Yesu Kristo aba nɛ ishudzya mɛɛ, ɔfɔfuĩa ɔlɛ ode Owusoso Akaa ɔkɔ,

³ pɔ ɔfɔfuĩa ka nyia ka gɛ lɔotinyi Yesuɔ, logidè Owusoso Akaa ɔkɔ. Ɔfɔfuĩa ɔlɛ onù asɛnɛ kristoelete ɔfɔfuĩa nɔ, gɛ nɔolũ ɔsɛ lɔbàa, pɛ lɔotibo ku kanɔ nɔ̀ mɛ otsiɛ nɔ.

⁴ Wɔnɔ mɛeyi alɛ gɛ ɛdɛmɛ nɔ, Owusoso Akaa ɔkɔ nɔodè kɛlɛ nɔŋã alɛ abha, ɔmɔsɛ agɛ yɛakpasɛ wɔnɔ mɛɛ egbogblo adɛ agɛ yɛalɛ kanɔ nɔ̀ mɛ.

⁵ Kanɔ nɔ̀ mɛ balɛ, kliso baaɖɔaɖɔ nɛ kanɔ mɛ ɔdɔ̃ mɔmɔ ulũ, kɛlɛ kanɔ nɔ̀ mɛ ataatɔ̃ nɛ̀ alɛ.

⁶ Owusoso Akaa ɔkɔ bɔlɔ xɔnɔ dè, kɛlɛ aka nyia aka gɛ enyi Owusoso Akaa ataatɔ̃ nɛ̀ ɔlɔ, pɔ anunɔ gɛ egide Owusoso Akaa ɔkɔ atɛ atàaatɔ̃ nɛ̀ ɔlɔ. Kidzo ɛlɛ abha bɔgã pɛ bɔmɔ Ɔfɔfuĩa nɔ gɛonu kibui gbã nɛ̀ ɔfɔfuĩa nɔ gɛ lɔonù asɛnɛ ɔyɛ.

Owusoso Akaa Tɛdɛdɛmɛ nɔ Nɛ̀ Bɔlɔ Ɔyɛ

⁷ Mɛbhia alɛ gɛ ɛdɛmɛ nɔ, nɔkɔ bɔdɛmɛ nɛ̀ bagɔlɔ, ɔmɔsɛ tɛdɛdɛmɛ nɔ de Owusoso Akaa ɔkɔ. Aka nyia aka gɛ adɛmɛ nɛ anɔ, enu anɔ gɛ bamɔ́ yɛ edenɔ Owusoso Akaa mɛ kɛlɛ enyi Owusoso Akaa tsyɛ.

⁸ Anɔ nyia anɔ gɛ atɛ dɛmɛ nɛ̀ anɔ, etinyi Owusoso Akaa, ɔmɔsɛ Owusoso Akaa adɛmɛ nɛ̀ anɔ.

⁹ Kidzo ɛlɛ nabha Owusoso Akaa akasɛ yɛ tɛdɛdɛmɛ nɔ nɛ bɔlɔ ishi, akpɛ Yɛeyianyɛ tenikpo nɔ asɛsɛ kanɔ nɔ̀ mɛ asɛ tɛ bɔzã nɛ̀ ɛkpã gana yɛabha.

¹⁰ Kɛlɛ kɛlɛinu tɛdɛdɛmɛ nɔ, gɛnɛ kana gɛ bɔdɛmɛ nɔ nɛ̀ Owusoso Akaa yɛenu tɛdɛdɛmɛ nɔ, pɔ yɛadɛmɛ ɔlɔ ɛbui sopɛ asɛsɛ Yɛeyianyɛ asɛ tɛ̀ abedzi bɔdɔ̃ pɔpɔɛ ɔkɔ bɔlɔ ebui kpa etsye bɔlɔ.

¹¹ Mɛɔbhia alɛ gɛ ɛdɛmɛ nɔ, gɛ Owusoso Akaa adɛmɛ ɔlɔ ibui soɔ, kɛlɛ sɛ bɔlɔ tsyɛ dɛmɛ nɛ̀ bagɔlɔ.

¹² Anana akamɔ Owusoso Akaa eɖi, pɔ onupɛ bɔdɛmɛ agɔlɔ ibuiɛ, Owusoso Akaa abazã ɔlɔ mɛ kɛlɛ yɛ tɛdɛdɛmɛ nɔ bana nɛ ɔlɔ mɛ.

¹³ Bunyi sɛ bɔkpasɛ yɛmɛ kɛlɛ yɛtsyɛ akpasɛ bɔlɔ mɛ, Ɔmɔsɛ yɛakɔ ɔlɔ Ɔfɔfuĩa nɔ.

¹⁴ Kɛlɛ bɔmɔ pɛ bɔɖɔ kaɖɔ dalɛ kɛlɛ shu sɛ, Akaa yɛakpɛ Yɛeyiɛ sɛ tɛ̀ abayɛkɛ akɔ kanɔ nɔ̀ mɛ.

¹⁵ Onupɛ anɔ teli adalɛ ɛlɛ mɛ asɛ Yesu yɛenu Owusoso Akaa Yɛeyiɛ, Owusoso Akaa akpasɛ yɛmɛ kɛlɛ yɛtsyɛ akpasɛ Owusoso Akaa mɛ.

¹⁶ Kliso bunyi, kɛlɛ bɔkpà plɛnɔ Owusoso Akaa tɛdɛdɛmɛ nɔ nɛ̀ bɔlɔ. Owusoso Akaa enu tɛdɛdɛmɛ nɛ anɔ. Anunɔ gɛ edzinɔ yɛkpã nɛ̀ tɛdɛdɛmɛ nɔɔ, anɔ alɛ akpasɛ Owusoso Akaa mɛ, kɛlɛ Owusoso Akaa tsyɛ akpasɛ yɛ mɛ.

¹⁷ Nɛ kidzo ɛlɛ nabhaa, tɛdɛdɛmɛ nɔ ná nɛ bɔlɔ mɛ, sɛ tɛ̀ bɔlɔkɔ zipo kebhukulu kiwuiɛ, ɔmɔsɛ bɔlɛ asɛ yɛ ana nɛ kanɔ alɛ mɛ.

¹⁸ Kifù sisi ma tɛdɛdɛmɛ nɔ mɛ. Pɔ tɛdɛdɛmɛ nɔ gɛnáa bu kifù sisi oyinɔ, ɔmɔsɛ kifusisi mɛ batɔ̃ pɔpɔ̃ azã. Anunɔ gɛ esi kifuɔ yɛ tɛdɛdɛmɛ nɔ tɛnà.

¹⁹ Bɔdɛmɛ nɔ, ɔmɔsɛ yɛeputɔ adɛmɛ nɛ bɔlɔ.

²⁰ Onupɛ anɔ teli aɖɔ asɛ “Ɛdɛmɛ nɔ Owusoso Akaa,” pɛ atɛ adɛmɛ nɔ nɛ̀ yɛadzyaa, asɛnɛ elete yɛenu. Ɔmɔsɛ anɔ ka nyia ka gɛ agɛ dɛmɛ nɔ nɛ̀ yɛadzyaa, anɔ gɛ amɔ nɛ̀ awuhuɔ, atɛ balà adɛmɛ nɔ nɛ̀ Owusoso Akaa gɛ atɛ amɔ nɛ̀ awuhũ.

²¹ Kɛlɛ akɔ ɔlɔ ɔsha ɔlɛ asɛ, kɛlɛ sɛ anɔ nyia anɔ gɛ adɛmɛnɔ nɛ̀ Owusoso Akaa, tɛ adɛmɛ nɛ̀ yɛadzya tsyɛ.