Yohanes 1 3 - Nyangbo New Testament

¹ Tɛdɛdɛmɛ nɔ gbagbla ɖuwoe idi nɛ ɛlɛ gɛ Akaa alɔkɔ akɔ ɔlɔ mɔ dza, sɛ̀ bekulu ɔlɔ asɛ yɛeyi alɛ bunu! Kɛlɛ yɛeyi alɛ bunu ɛgbã! Kɛgɛ kɛlɛ shu so pɛ kanɔ nɔ̀ etinyi ɔlɔ kɛlɛinu ɔsɛ gɛ betinyi yɛ so.

² Mɛadzya alɛ gɛ ɛdɛmɛ nɔɔ, otsi alɛ bunu Owusoso Akaa yɛeyi alɛ, kɛlɛ bekebu kɛgɛ bɔbà dziɛ kasɛ. Pɔ bunyi sɛ onupɛ ebekoeyìɛ, bɔbà zã asɛ yɛanà, ɔmɔsɛ bɔbà mɔ yɛ asɛ kana gɛ alɛɛ ana.

³ Anunɔ gɛ eɖì idzomɛ akɔ yɛɛ adalɛ yɛishu, asɛ kana gɛ yɛishuɔ dalɛ ana.

⁴ Anɔ ka nyia ka gɛ abhɛtɛ kibui kpa, ɔshaa yɛayɛɛ, kibui gbã kinu ɔsɛ, kibui kpa bhɛbhɛtɛ nu ɔshabha abha mabhɛtɛ mabhɛtɛ.

⁵ Pɔ nɔonyi ɔsɛ, aba sɛ tɛ̀ ebu ɔlɔ ebui kpa shɛnɛ. Kɛlɛ kibui kpa ma yɛ mɛ.

⁶ Ananà ma gɛ akpasɛ yɛmɛ pɛ azazã kibui kpa bhɛbhɛtɛ abha. Ananà mɛ gɛ etsiɖi kibui kpa bhɛbhɛtɛ abha pɛ abàɖɔ asɛ amɔ̃ yɛ alo enyi yɛ.

⁷ Mɛeyi alɛ gɛ ɛdɛmɛ nɔ, nɔtɛ kɔ ananà agbanà wɔnɔ atsaɖakɛ idzo. Anunɔ gɛ abhɛtɛ kibui gɛlɛ ɛlɛ ɔzakɔ enu anɔ dadalɛ asɛ gɛ Kristoɔ tsyɛ ishu dalɛ ana.

⁸ Anunɔ gɛ abhɛtɛ ebui kpaa, yɛenu anɔ gɛedè abosam ɔkɔ, ɔmɔsɛ abosam xɔnɔɔ, ebui kpa abhɛbhɛtɛ elete yɛenu odenɔ kanɔ nɔ̀ esi ɔkpɛkɔ. Kibui nɔnɔ shu so pɛ Owusoso Akaa Yɛeyianyɛ aba kɛlɛinu ɔsɛ tɛ̀ ebezĩ abosam yɛaxɔ̃ɛ wɔawɔa.

⁹ Anɔ nanà ama gɛenu Owusoso Akaa anɔ pɛ abazã kibui kpa bhɛbhɛtɛ abha, ɔmɔsɛ bamɔ́ yɛ nɛ Owusoso Akaa mɛ.

¹⁰ Kidzo ɛlɛ abha bɔgã pɛ buuti bagɛ enu Owusoso Akaa yɛeyi alɛ nɛ̀ bagɛ enu abosam yɛeyi alɛ tsyɛ. Anɔ nyia anɔ gɛ atɛ abhɛtɛ kibui gɛlɛ ɛlɛ ɔzakɔ etinu Owusoso Akaa yɛeyi, kana anɔ yia anɔ gɛ atɛ adɛmɛ nɔ nɛ yɛadzya tsyɛ alɛ.

Nɔdɛmɛ Bagɔlɔ Ibui

¹¹ Kibui ɛlɛ nɔolũ odenɔ kesiɛ ɔkpɛkɔ ɔsɛ̀, kɛlɛ ɔsɛ bɔdɛmɛ nɛ̀ bagɔlɔ.

¹² Nɔtɛ̀ zã asɛ Kain ana, anɔ gɛenu Abosam ayɛ pɛ eyí yɛadzyaa. Kɛlɛ kiɖuwoe so pɛ eyíi? Ɔmɔsɛ yɛ ahɔɛ edzoɔ enu edzo kpa pɛ yɛadzya ayɛ xɔnɔ adalɛ.

¹³ Mɛadzya alɛ mɔ, nɔtɛ kɔ kɛbhɛtɛ wɔnɔ ibì gɛ onupɛ kanɔ nɔ̀ agɛ dɛmɛ wɔnɔ ibuiɛ.

¹⁴ Bunyi sɛ̀ budekoeyì nɛ butsi mɛ ba ɛkpã mɛ, ɔmɔsɛ bɔdɛmɛ bɔlɔ adzya alɛ ibui. Anunɔ gɛ atɛ adɛmɛ nɔ nɛ̀ anɔ akakpasɛ butsì mɛ.

¹⁵ Anɔ nyia anɔ gɛ agɛ dɛmɛ yɛadzya ibuiɛ enu anɔ gɛ eyianɔ, kɛlɛ nɔonyi ɔsɛ anɔ gɛ eyianɔ atɛ bàmɔ ɛkpã tihɔɔ mɛ azã.

¹⁶ Kidzo ɛlɛ abha bɔgã pɛ butì kɛgɛ inu tɛdɛdɛmɛ nɔ, Yesu Kristo alɔkɔ yɛkpã elú akɔ ɔlɔ. Bɔlɔ tsyɛ kɛlɛ sɛ bɔlɔkɔ ɔlɔ ɛkpã lu ɔkɔ ɔlɔ adzya alɛ.

¹⁷ Onupɛ kanɔ mɛ ɔdɔ̃ lɛ anɔ teli ahɔɛɛ pɛ amɔ asɛ yɛadzya apɛ ɛdɔ̃ɔ pɛ egibì yɛ ashagabuiɛ, kɛlɛ́ Owusoso Akaa tɛdɛdɛmɛ nɔ baza yɛ mɛ̀ dza?

¹⁸ Mɛeyi alɛ gɛ ɛdɛmɛ nɔ, nɔtɛkɔ bɔlɔkɔ kineke lɔkɔ dɛmɛ nɛ anɔ nɔ, pɔ nɔkɔ bɔlɔkɔ ɔlɔ ebui bhɛbhɛtɛ nɛ̀ kibui gbã builɛ ɔkasɛ.

¹⁹ Alɛ abha bɔbà gã pɛ bɔbà tisɛ bɔkpasɛ kibui gbã mɛ, nɛ̀ kana gɛ bɔlɔkɔ bɔlɔ etúɔ lu awɔ̃ nɛ yɛabha

²⁰ gɛ onupɛ bɔlɔ etúɔ bu ɔlɔ ɛpɔ. Ɔmɔsɛ Owusoso Akaa egbogblo adɛ bɔlɔ etúɔ kɛlɛ enyi kɛka nyia ka.

²¹ Mɛbhia alɛ gɛ ɛdɛmɛ nɔ, onupɛ bɔlɔ etúɔ etiebu ɔlɔ ɛpɔɔ, kɛlɛ́ bulu awɔ̃ nɛ bɔlɔ Owusoso Akaa nabha

²² asɛ bɔbà yɛkɛ kɛka nyia ka gɛ bubusì odenɔ yɛahɔɛ mɛ, ɔmɔsɛ bulũ batɔ̃ akɔ yɛɔsha pɛ bɔbhɛtɛ kɛgɛ kikù yɛawɔ nabha.

²³ Kɛlɛ yɛɔsha ɔlɛ onu ɔsɛ, tɛ̀ bɔyɛkɛ Yɛeyianyɛ Yesu Kristo abha ŋã, nɛ̀ tɛ bɔdɛmɛ nɛ bagɔlɔ asɛ gɛ ɔkpɛ ɔshà akɔ ɔlɔ ana.

²⁴ Bagɛ babhɛtɛ atɔɖɔ yɛɔsha nabha balɛ akpasɛ yɛmɛ, kɛlɛ yɛtsyɛ akpasɛ balɛ mɛ. Kana bɔbhɛtɛ pɛ buutì ɔsɛ akpasɛ bɔlɔ mɛ. Bunyi kibui ɛlɛ gana ɔfɔfuĩa nɔ gɛ ɔlɛ yɛakɔ ɔlɔ mɛ.