Yohanes 1 2 - Nyangbo New Testament

¹ Mɛeyi alɛ gɛ ɛdɛmɛ nɔ, ɛfɔnɔ ebui alɛ kɔ wɔnɔ ɔsɛ tɛ̀ nɔtɛ̀ bhɛtɛ kibui kpa. Pɔ onupɛ anɔ teli abhɛtɛ kibui kpa, anɔ teli alɛ bɔlɔ ahɔɛ gɛ aɖɔaɖɔ ebu bɔlɔ ulũ nɔ nɛ Akaa namɛ, yɛenu Yesu Kristo, Anɔ Dadalɛ.

² Yɛenu bɔdɔ̃ pɔpɔɛ ɔkɔ bɔlɔ ebui kpa bhɛbhɛtɛ, gɛnɛ bɔlɔ ete pɔ ɔkɔ kanɔ nɔ̀ petee kalɛ ebui kpa bhɛbhɛtɛ tsyɛ.

³ Onupɛ bɔbhɛtɛ tɔɖɔ yɛɔsha nabhaa, kɛlɛ kɛkasɛ ɔsɛ̀ bunyi yɛ.

⁴ Anunɔ gɛ aɖɔ asɛ, “Inyi yɛ,” pɛ atɛa abhɛtɛ̀ atɔɖɔ yɛɔsha nabhaa enu asɛnɛ elete, kɛlɛ kibui gbã ma yɛ mɛ.

⁵ Pɔ onupɛ anɔ teli abhɛtɛ atɔɖɔ yɛɔsha nabha, kɛlɛ Owusoso Akaa tɛdɛdɛmɛ nɔ ná nɛ yɛmɛ. Kidzo ɛlɛ aba buutì ɔsɛ bɔkpasɛ yɛ mɛ yɛ.

⁶ Anunɔ gɛ aɖɔ asɛ akpasɛ yɛmɛɛ, kɛlɛ sɛ agã asɛ Yesu anà tsyɛ.

⁷ Mɛbhia alɛ gɛ ɛdɛmɛ nɔ, gɛnɛ ɔshà vɔvɔ mɛfɔnɔ ɔkɔ wɔnɔ, pɔ okukuɔ gɛ ɛlɛ wɔnɔ ahɔɛ odenɔ kesiɛ ɔkpɛkɔ. Ɔsha kuku ɛlɛ inù ebuiɛ gɛ nolũɔ.

⁸ Pɔ ɛfɔnɔ ɔsha vɔvɔ kɔ wɔnɔ, bɔmɔ ɛlɛ ebui gbã nɛ yɛ nɛ̀ wɔnɔ mɛ, ɔmɔsɛ otumũ nulũ ɔbafala kɛlɛ kifúigbã vɛlɛ dɛkɛ.

⁹ Anunɔ gɛ aɖɔ asɛ akpasɛ tɛdadalɛ mɛ, pɛ anyanã yɛadzya akpɛ ɛyamɛɛ, anɔ alɛ aka kpasɛ otumũ mɛ.

¹⁰ Anunɔ gɛ adɛmɛ nɔ nɛ yɛadzyaa, anɔ alɛ akpasɛ tɛdadalɛ mɛ, kɛlɛ kibui nanà ma yɛmɛ gɛ bakɔ yɛakpatà bɔdɔ̃.

¹¹ Pɔ anunɔ gɛ anyana yɛadzya akpɛ ɛyamɛ xɔnɔ akpasɛ otumũ mɛ kɛlɛ anyɔ afalà nɛ otumũ mɛ, kɛlɛ etinyi ɛkɛlɛ gɛ avɛɛ, ɔmɔsɛ otumũɔ opú yɛahũɔ.

¹² Ɛfɔnɔ ebui alɛ kɔ wɔnɔ, mɛeyi alɛ gɛ ɛdɛmɛ nɔ ɔmɔsɛ balɔkɔ wɔnɔ ebui kpa etsye wɔnɔ nɛ yɛinye nɛtakpu.

¹³ Ɛfɔnɔ ebui alɛ kɔ wɔnɔ, bakaa ɔmɔsɛ nɔonyi anunɔ gɛenu odenɔ kesiɛ ɔkpɛkɔɔ. Ɛfɔnɔ ebui alɛ kɔ wɔnɔ bayisɔ̃, ɔmɔsɛ nɔ ɔŋã anɔ kpa nabha. Ɛfɔnɔ ebui alɛ kɔ wɔnɔ beyiɛ gɛ ɛdɛmɛ nɔ, ɔmɔsɛ nɔonyi Akaa.

¹⁴ Ɛfɔnɔ ebui alɛ kɔ wɔnɔ beyiakaa, ɔmɔsɛ nɔonyi anunɔ gɛenu odenɔ kesiɛ ɔkpɛkɔɔ. Ɛfɔnɔ ebui alɛ kɔ wɔnɔ bayisɔ̃, ɔmɔsɛ nɔgagalĩ, kɛlɛ Owusoso Akaa nibuiɛ kpasɛ wɔnɔ mɛ, kɛlɛ nɔŋã anɔ zizĩɛ nabha.

Nɔtɛ̀ Dɛmɛnɔ Nɛ̀ Kanɔ Nɔ̀

¹⁵ Nɔtɛ̀ dɛmɛ nɛ̀ kanɔ nɔ̀ alo kɛdɔ̃ nanà nɛ kalɛ mɛ tsyɛ. Onupɛ anɔ teli adɛmɛ nɔ nɛ̀ kanɔ nɔ̀ mɛɛ, tɛdɛdɛmɛ nɔ nɛ̀ Akaa ma yɛmɛ.

¹⁶ Ɔmɔsɛ kɛka nyia ka nɛ kanɔ nɔ̀ mɛ, lɛenu ɔdɔ gɛ ebui kpa bhɛbhɛtɛ elete adɛmɛ nɔ, yɛ awuhũ ɔdɔ pɛpɛ nɔ nɛ̀ ahɔɛ tutu nɛitélũ nɛ kɛgɛ lɛ yɛahɔɛ nɛ̀ kɛgɛ yɛabhɛtɛɛ shu, ebui alɛ gide Akaa ɔkɔ, pɔ kanɔ nɔ̀ ɔkɔ ledè.

¹⁷ Kanɔ nɔ̀ nɛ̀ kalɛ mɛ bɔdɔ̃ pɛpɛ ulũ baafala, pɔ anunɔ gɛ abhɛtɛ̀ tɔɖɔ Owusoso Akaa tɛpɛpɛ nabha xɔnɔ abazã nɛ̀ ɛkpã tihɔɔ.

Ɔshakpɛkpɛ Nɛ Asɛnɛ Kristoeleteɛ Shu

¹⁸ Mɛeyi alɛ gɛ ɛdɛmɛ nɔ, ɔɖà tata gɔgɔɛ nɔ nɔlɛ, nɛ̀ asɛ kana gɛ notilũ ɔsɛ asɛnɛ kristoelete abaa, otsiɛ nɔ tsyɛ asɛnɛ kristoeleteɛ atɛba eku. Kana bɔlɔkɔ tì ɔsɛ ɔɖà tata gɔgɔɛ nɔ nɔlɛ.

¹⁹ Bekoeyì nɛ bɔlɔ ishi, pɔ betinù banɔ tsyɛ gɛ akpasɛ bɔlɔ ishi. Ɔmɔsɛ pɛ otɛ ɔsɛ bɔlɔ ishi bakpasɛɛ, tsyɛ alo batɛ azã bɔlɔ mɛ̀, pɔ balɛ tɛshɛshɛ kasɛ sɛ̀ balɛ ɔmayɛmɛ nanà ama bɔlɔ ishi.

²⁰ Pɔ nɔmɔ bɔbɔ sasara odenɔ Anɔ Dadalɛ Ɔkɔ, kɛlɛ wɔnɔ petee onyi kibui gbã.

²¹ Ɛtɛ fɔnɔ ebui alɛ kɔ wɔnɔ sɛ gɛ nɔotinyi kibui gbã so, pɔ gɛ nɔonyi ɛlɛ, pɛ asɛnɛ ebui nanà eti odekoeyì nɛ kibui gbã mɛ so.

²² Afana gɛenu asɛnɛ eleteɛ? Yɛenu anunɔ gɛ agɛ dɛmɛ tɔɖɔ kɛlɛ abha sɛ Yesu yɛenu Kristoɔ. Anɔ alɛ nɛidiɛ yɛenu asɛnɛ kristoɔ, yɛenu anɔ gɛ yɛatɛ ayɛkɛ Akaa nɛ̀ Eyianyɛ nabha aŋã.

²³ Anɔ nanà ma gɛ agɛ yɛkɛ Eyianyɛ pɛ ebetì Akaa xɔnɔ, anunɔ gɛenyi Eyianyɛɛ yɛenyi Akaa tsyɛ.

²⁴ Nɔoɖi kɛlɛ ɔkɔ ɔsɛ kɛgɛ nɔolũ odenɔ kesiɛ ɔkpɛkɔɔ zã wɔnɔ mɛ. Onupɛ kɛzãa ana, wɔnɔ tsyɛ ɔbɔzã Eyianyɛ nɛ̀ Akaa mɛ.

²⁵ Kɛlɛ kɛgɛ atɔɖɔ elú akɔ bɔlɔ kɛlɛinu, ɛkpã gɛlɛ tihɔɔ nɔ.

²⁶ Ɛfɔnɔ ebui alɛ kɔ wɔnɔ nɛ bagɛ bapɛ asɛ agbanà wɔnɔ atsaɖakɛ kidzoɔ shu.

²⁷ Wɔnɔ xɔnɔɔ, bɔbɔ sasara gɛ nɔyɛkɛ odenɔ yɛ mɛɛ kakpasɛ wɔnɔ mɛ. Nɔgɛ pɛ ananà tɛ akasɛ wɔnɔ ɔdɔ̃. Pɔ gɛ yɛɔbɔ sasara kasɛ wɔnɔ bɔdɔ̃ nɛ ebuiɛ petee shu pɛ butinu asɛnɛ bɔdɔ̃ kakasɛɛ, bɔdɔ̃ gɛ bɔbɔ sasara kasɛ wɔnɔɔ, nɔzã yɛ mɛ ana.

Owusoso Akaa Yɛeyi Alɛ

²⁸ Mɛeyi alɛ gɛ ɛdɛmɛ nɔ, otsiɛ nɔ, nɔzã yɛmɛ, sɛ tɛ̀ onupɛ ebekoeyìɛ, bɔbàmɔ awɔ̃ lulu kɛlɛ kiwũi tɛbàyì bɔlɔ nɛ yɛamɛ nɛ kibeɛ gɛ ebekuɔ.

²⁹ Onupɛ nɔonyi ɔsɛ anɔ dadalɛ yɛenuɔ, pɛ nɔonyi tsyɛ ɔsɛ aka nyia aka gɛ abhɛtɛ̀ kibui gbangbã edekoeyì nɛ yɛmɛ.