Yohanes 1 1 - Nyangbo New Testament

Ɛkpã Ibui

¹ Kibuiɛ gɛ zã odenɔ kanɔ nɔ̀ esiɛ ɔkpɛkɔɔ, gɛ butilũ ɖiɛ, pɛ bɔtɛ mɔɖi tsyɛ nɛ̀ bɔlɔ awuhũɔ, pɛ bulu awɔ̃ oɖi pɛ bɔlɔ ɛhɔɛ tsyɛ hunùɔ, ebui alɛ bɔɖɔ tseɖe wɔnɔ nɛ ɛkpa Ebuiɛ shu.

² Gɛ ɛkpã ibuiɛ ekoeyìɛ, bɔmɔ ɛlɛ kɛlɛ bɔɖɔ kaɖɔ dalɛ ɛlɛ shu, kɛlɛ bɔɖɔ ɛkpã tihɔɔ ebuiɛ tseɖe wɔnɔ, ebuiɛ gɛ lazã Akaa ɔkɔ pɛ lebekoeyi ɔkɔ bɔlɔ.

³ Bɔɖɔ ebuiɛ gɛ bɔmɔ pɛ bulũɔ tseɖe wɔnɔ, sɛ tɛ̀ wɔnɔ tsyɛ nɔzã ɔhakpɛkpɛ mɛ̀ nɛ ɔlɔ. Kɛlɛ bɔlɔ ɔhakpɛkpɛ nɛ̀ Akaa nɛ̀ Yɛeyì anyɛ Yesu Kristo

⁴ Bɔfɔnɔ ebui alɛ asɛ tɛ̀ bɔkɔ bɔlɔ same mɔmɔ aná.

Tɛgagã Nɛ Tɛdadalɛ Mɛ

⁵ Ebuiɛ gɛ bulũ odenɔ yɛɔkɔ pɛ̀ bɔɖɔ tseɖe wɔnɔ nɛ alɛ sɛ, Owusoso Akaa enu tɛdadalɛ, otumũ nanà ɔmã yɛmɛ.

⁶ Onupɛ bɔɔɖɔ ɔsɛ bɔkpasɛ ɔhakpɛkpɛ mɛ ɔplɛnɔ yɛɛ, pɛ bɔkà gã nɛ otumũɔ mɛɛ, bɔsɛ asɛnɛ kɛlɛ bɔgɛ gã nɛ kibui gbã shu.

⁷ Pɔ onupɛ bɔgã nɛ tɛdadalɛ mɛɛ, asɛ kana gɛ yɛtsyɛ agã nɛ tɛdadalɛ mɛ anaa, kɛlɛ bɔkpasɛ ɔhakpɛkpɛ mɛ nɛ̀ bagɔlɔ, kɛlɛ Yɛeyì Yesu dzyosu nɔ, abadalɛ bɔlɔ shu nɛ ebui kpa ka nyia ka mɛ.

⁸ Onupɛ bɔɔɖɔ ɔsɛ kibui kpa nanà ma bɔlɔ shuɔ, ishu bɔwɔɛ kɛlɛ kibui gbã ma bɔlɔ mɛ.

⁹ Onupɛ bɔɖɔ ebui kpa gɛ bɔbhɛtɛ, enu anɔ gɛ aɖɔ kibui gbã ɔsɛ, abalɔkɔ bɔlɔ ebui kpa bhɛbhɛtɛ etsye bɔlɔ tɛ̀ eplu ɔlɔ odenɔ ebui kpa bhɛbhɛtɛ mɛ.

¹⁰ Onupɛ bɔɖɔ ɔsɛ bɔgɛ bhɛtɛ kibui kpa, kɛlɛ bɔbhɛtɛ yɛ asɛ asɛnɛ elete ana, kɛlɛ yɛeibuiɛ ama ɔkɔ nanà nɛ bɔlɔ ɛkpã mɛ.