Yakobo 5 - Nyangbo New Testament

Titsetseɖenɔ Nɛ̀ Ehoeyielete Gagalĩɛ

¹ Wɔnɔ ehoeyieleteɛ nɔtatɔ̃ tɛ nolũ otsi alɛ, nobi yoyo, tɛ nɔwɔa awuwoe, nɛ bɔtɔ gbagbla gɛ bàba ɔnɔ abhaa shu.

² Wɔnɔ ehoeyiudɔ̃ ɔtsɔmɔ, kɛlɛ iklusɛ tã ɔnɔ ɔdɔ̃ kpɛkpɛɛ.

³ Wɔnɔ sikãɛkpã nɛ̀ sikã fufú edzyewoele. Bɔdɔ̃ tidzyedzyewoele ɛlɛ baɖɔaɖɔ nɛ ɔnɔ shu nɛ kɛtã gɛ kɛbatã ɔnɔ asɛ ifu ana. Nɔyalɛ ehoeyiudɔ̃ gelee ɔbalɛ olu nɛ ewui gɔgɔɛ alɛ mɛ.

⁴ Noɖi mɔ! Abhɛɛ gɛ nɔgɛ buia ɔkɔ ɔnɔ apaeyiɛ gɛ adzyaa wɔnɔ bayaa mɛ, ebieyo nɛ wɔnɔ ɛtakpu. Bagɛ apɔ ɔdɔ̃ akɔ ɔnɔ, balɛ yoyo bibiɛ ku Apalete Ohumielete natɔ̃ mɛ.

⁵ Nɔzã kanɔ alɛ mɛ, pɛ nɔŋã ɛkpã nɛ̀ ehoeyiudɔ̃. Nɔŋã ɔdɔ̃ olu bɔ, pɛ noopo banɔ yiyíwui.

⁶ Nobú bagɛ agɛ bhɛtɛ ibui kpa nɛpɔ, pɛ noyí alɛ, gɛ anɛ kitití bazalɔ nɛ ɔnɔ shu tsyɛ flogo.

Tɛdɔdɔ Fɔ̃ɔ Nɛ Bɔtɔ Mɛ

⁷ Kliso mɛadzya alɛ mɔ, nɔdɔ fɔ̃ɔ ɔvɛnɔ Apalete nɛbabe. Nolu awɔ̃ nɛ kɛdɔ gɛ ayadɛ àdɔ fɔ̃ɔ akɔ esiakpa sɛ tɛ kakɔ ɔdɔ̃eyi eshè nɛ alɛ abha, nɛ̀ kipoɔ gɛ epo subha nɛ yɛdɔbeɛ oɖi.

⁸ Wɔnɔ tsyɛ elo, nɔdɔ fɔ̃ɔ tɛ nɔzã gagalĩi, ɔmɔsɛ Apaleteɛ nɛbabe na beke.

⁹ Nɔtɛ ɔvɛnɔ olugbũ nɛ bagɔlɔ ɔkɔ, mɛadzya alɛ mɔ, sɛ tɛ batɛ bekulu ebhu nɛ ɔnɔ. Ɖio, kebhukulueleteɛ tsyɛ yɛeli edulũɔ alɛ!

¹⁰ Mɛadzya alɛ mɔ, tɛ kidzi tɛlɔlɔkɔ shɔnɔ nɛ tɛdɔdɔ fɔ̃ɔ nɛ bɔtɔ mɛ shuɔ, nɔbaka ebuiɖɔluanɛ gɛ azaɖɔaɖɔ nɛ Apalete nɛinye mɛ ayɛ oɖi.

¹¹ Asɛ gɛ nonyi ana, bagɛ beyulaa, balɛ edzi anɔ gɛ bakpɛ emi. Nolũ kɛkpɛ gɛ Hiob akpɛ emi, kɛlɛ nɔmɔ kɛgɛ Apaleteɛ abhɛtɛ akɔɛ gɔgɔɛ nɔ. Apaleteɛ ɛyamɛ yɔ kɛlɛ eɖi anɔ ashagabui.

¹² Nɛ̀ kɛgɛdɛ pete nɔ, mɛadzya alɛ mɔ, nɔtɛ tanà ɔdɔ̃, kitití udɔ̃ loo kesiakpa ɔyɛ, alo kɛdɔ̃ ka nyia ka ɛdi. Nɔkɔ ɔnɔ, “Ee” edzi ee, kɛlɛ ɔnɔ “Ao” tsyɛ edzi ao, tɛ Owusoso Akaa etibebu ɔnɔ ɛpɔ.

Owusoso Akaa Tikukulu Nɛ Tɛyɛyɛkɛŋã Mɛ

¹³ Bɔtɔ bá ɔnɔ mɛ teli abhaa, ekulu itití ayɛ. Anɔ teli amɔ sameɛ, azhã same ɛdzɛ tɛ akpɛ Akaa nɛinye nɛitití.

¹⁴ Wɔnɔ mɛ anɔ teli ishu mɛ izĩ dza? Ekulu ɔhamɛ esheshèɛ tɛ bekulu Owusoso Akaa nɛ yɛtakpu tɛ basara bɔbɔ́ akɔɛ nɛ Apalete nɛinye mɛ.

¹⁵ Nɛ tɛyɛyɛkɛŋã mɛ pɛ nokulu Owusoso Akaa, kɛbakɔ ɔsɛ anunɔ gɛ yɛishu mɛ zĩɛ, Apaleteɛ abakɔ asɛ yɛalɔ gagalĩi. Onupɛ abhɛtɛ kibui kpaa, babàlɔkɔ ɛlɛ etsye.

¹⁶ Kliso nɔdalɛ ɔnɔ ebui kpa mɛ ɔkɔ bagɔlɔ, tɛ nokulu Owusoso Akaa ɔkɔ bagɔlɔ tɛ kɛkɔ ɔsɛ nɔmɔ ishu mɛ gagalĩ. Bupu lɛ anɔ gbangbã yɛ Akaa tikukulu mɛ kɛlɛ kɛwɔa axɔ̃ɛ tsyɛ popopo.

¹⁷ Anɔdzyrame ko Eliya tsyɛ edzi asɛ ɔlɔ ana. Pɔ gɛ ekulu Owusoso Akaa popopo asɛ subha atɛdɔɔ, agɛdɔ ɛgbã nɛ agɔ tatá nɛ̀ bewoele tehlo mɛ.

¹⁸ Gɛ ezekulu Owusoso Akaa, kɛkɔ ɔsɛ kititíɛ dalɛ ɔkɔ subha yɛazadɔ, kɛlɛ bɔŋaŋã zikoeyi nɛ esiakpa nabha.

¹⁹ Mɛadzya alɛ mɔ, onupɛ ɔnɔ mɛ anɔ teli etsyina nɛ ibui gɛ lɛ ɛlɛ ɔzãkɔ niede pɛ anɔ teli edzini yɛetsyina amanaa,

²⁰ nɔbaka ɔsɛ, anunɔ gɛ etsyina ebui kpa bhɛbhɛtɛelete nɛ yɛesitatá edzo nabhaa, ebui nɛ utsí ahɔɛ mɛ, kɛlɛ balɔkɔ yɛebui kpa bhɛbhɛtɛ gelee nɔ etsyee.