Yakobo 4 - Nyangbo New Testament

Nozhinɔ Ishu Esi Ɔkɔ Owusoso Akaa

¹ Kiɖe gɛ mana ekpli tatá nɛ̀ ebala nɛ wɔnɔɛishi? Pɛnɔsɛ anɛ ebuiɛ gɛ lakpasɛ ɔnɔ mɛ pɛ latɛ eyu nɛ ɔnɔ mɛɛ ledeɛ dza?

² Nɔpɛ kɛdɔ̃ tili, pɔ nɔgɛ mɔɛ ɛlɛ. Noyí anɔ pɛ nɔdzã awuhũ nɛ ɔdɔ̃ shu, pɔ nɔtɛ ɔlà mɔ ɛdɔ̃ɔ gɛ nɔ pɛ nɔ. Nohu ebala pɛ nɔta ekpli. Nɔtɛ ɔmɔ ɔdɔ̃, ɔmɔsɛ notɛ obisi Owusoso Akaa.

³ Nobisiɛ, nɔtɛ ɔmɔ ɔyɛkɛ, ɔmɔsɛ nobisi nɛ idzo kpa abha, noo bisi udɔ̃ sɛ tɛ nɔwɔɛ ɛlɛ shu axɔ̃ɛ ɔkɔ ɔnɔ ɛkpã ŋaŋã ete.

⁴ Wɔnɔ ɔmamɛ dɛdɛelete, notinyi ɔsɛ nɔɔŋã ɛbhia nɛ̀ kanɔ alɛ mɛɛ, kɛlɛ notsyina odzi banɔ gɛ banyana Owusoso Akaa akpɛ ɛya mɛɛ dza? Anɔ nyia anɔ gɛ edzi ɔbhia ɔkɔ kanɔ alɛɛ, kɛlɛ etsyina edzi anunɔ gɛ agɛ dɛmɛ nɛ Owusoso Akaa.

⁵ Pɛnɔsɛ noɖi ɔsɛ kibui ete ko baɖɔ elu nɛ Kibui fɔfɔnɔ luuɔ mɛ ɔsɛ, yɛɔfɔfuĩa nɔ gɛ akɔ asɛ lɔzã ɔlɔ mɛɛ ɔwlɔãkɛ abhã gagalĩi.

⁶ Pɔ ebhui ɔlɔ ebu popopo. Kliso pɛ Yɛibuiɛ ɖɔ ɔsɛ, “Owusoso Akaa alɔɛtití nɛ bagɛ befeke ishuɔ shu pɔ ebhui bagɛ ezhinɔ ishu esiɛ ebu.”

⁷ Nozhinɔ ɔnɔ ishu esi ɔkɔ Owusoso Akaa. Nɔ lɔɛtití nɛ Abosam shu tɛ ebu tɛtsɛɖɛ mɛ ashɛ nɛ ɔnɔ ɔbha.

⁸ Nótsu ɔplɛnɔ Owusoso Akaa tɛ yɛtsyɛ etsu aplɛnɔ ɔnɔ. Ebui kpa bhɛbhɛtɛ eleteɛ, noplu ɔnɔ ahɔɛ, tɛ nɔdalɛ ɔnɔ etúɔ mɛ, wɔnɔ gɛ ekpeɖekpeɖe mɛ aya taabhaa.

⁹ Kitúɔ tã ɔnɔ, nɛ̀ ɔwɔ̃nyɔnɔ, tɛ nobi yoyò. Wɔnɔ ɛmɔɛ dzi ɔwɔ̃nyɔnɔ, kɛlɛ ɔnɔ samɛ mɔmɔ edzi bamɛ tsɛtsɛ́ kpɛ esi.

¹⁰ Nozhinɔ ɔnɔ ishu esi nɛ Apalete namɛ tɛ efeke ɔnɔ ewunɔ abha.

¹¹ Mɛadzya alɛ mɔ, nɔtɛ ɔzɔɖɔ ebui kpa nɛ bagɔlɔ shu. Anunɔ gɛ aɖɔ ebui kpa nɛ yɛadzya shu alo ekulu ebhu niyɛɛ, alɔɛtití nɛ ɔshaa shu, kɛlɛ ekulu ebhu nɛ ɔlɛ. Onupɛ nokulu ebhu nɛ̀ ɔshaa, kɛlɛ anɛ ɔlɛ abha bhɛbhɛtɛelete nonu, pɔ nodzi ebhu ekukuluelete ɔkɔ ɔshaa.

¹² Anɔ tenikpo ko yɛenu Ɔshakpɛkpɛelete nɛ̀ Kebhukluanɔ, yɛenu anunɔ gɛ alà elu anɔ ɛkpã kɛlɛ yɛalà ezĩ udɔ̃ tsyɛ. Wɔnɔ pɔ, afana nɔonu pɛ nokulu ebhu nɛ̀ wɔnɔ ɔhagbo alɛ?

Kitelũ Tutũ Ɔkɔ Ivũ

¹³ Nɔtatɔ̃ tɛ nolũ, wɔnɔ agɛ nɔɖɔ ɔsɛ, “Oboɔ alo kivũ bɔbavɛ ɔma ɔlɛ alo odzyiedeɛ mɛ, bɔba dɛzã ɛkɛlɛ gã kedzì tɛ bɔlɔ ehoeyiɛ amɔ atɔɖɔ.”

¹⁴ Kiɖeso, otinyi kɛgɛ bàba ɛlɛ mɛ ivũ. Kiɖe gɛinu wɔnɔ ɛkpã? Ɔmɔlɔ̃ gɛ oku nɛ kibe gulũi tili mɛ pɛ lozo wlui ɔyala ko nonu.

¹⁵ Nɛ kɛlɛ nɛinye mɛɛ, nɔzɔɖɔ ɔsɛ, “Onupɛ Apalete adɛmɛɛ, bɔbazã nɛ ɛkpã kɛlɛ bɔba bhɛtɛ kɛlɛ̀ nɛ̀ tili tsyɛ.

¹⁶ Otsiɛ nɔ, notũ itelũ pɛ nobu olugbũ mɛ. Kitelũ tutũ ɛlɛ nɛidi pɔɔ, kibui zizĩ kinu.

¹⁷ Kliso anunɔ gɛ enyi ibui gbangbã gɛ kɛlɛ sɛ abhɛtɛ pɛ atɛ bhɛtɛ ɛlɛɛ, abhɛtɛ ibui kpa.