Bìoball air-loidhne

Yakobo 3 - Nyangbo New Testament

Bɔlɔ Inike Abha Tiɖiɖi

¹ Mɛadzya alɛ mɔ, anɛ ɔnɔ mɛ anɔ ka nyia ka kɛlɛ sɛ yɛalɔkɔ ishu asɛ enu adɔ̃kasɛ, ɔmɔ asɛ kinyeɛ gɛ nonyi ana, bebèkulu ebhu gagalĩ akɔ bɔlɔ agɛ ɛkasɛ ɔdɔ̃ ɔdɛ anɔ nyia anɔ.

² Bɔlɔ pete ɛta esi nɛ ebui gelee mɛ. Onupɛ anɔ teli atɛtà esi nɛ kɛgɛ aɖɔ mɛɛ, kɛlɛ anɔ alɛ ana piapii, kɛlɛ abalà eɖi yɛishu pete tsyɛ abha.

³ Onupɛ bɔkpɛ ɛɖa nɛ ilugbũ mɛ ɔkɔ basɔ asɛ tɛ belũ atɔ̃ɔ, bɔlà tsyina alɛ ɔvɛnɔ ɛkɛlɛ gɛ bɔpɛ ɔsɛ tɛ bavɛɛ.

⁴ Alo ɔmɔ asɛ kelĩabha ihu ana. Gɛ linu ihu hohoe pɛ kɛlɛ́ gagalĩ kɛlɛ ifu ɛlɛ ɛvɛnɔ tsyɛ elo, ogegè bhlui toli ko ɔlɛ otsyina ɔlɛ ɔvɛnɔ ɛkɛlɛ gɛ anunɔ gɛ egè ɔlɛ apɛ asɛ tɛ lɔvɛɛ.

⁵ Kidzo ɛlɛ nabha kineke tsyɛ nu idzya bhlui tili ko nɛ anɔdzyrame yɛdzya shu, pɔ kinu idɔ̃ gɛifeke ishu. Kɛlɛ̀ asɛ ɛsɔlɛ gɛ ofuɖà ɔsɔlɛ ɔtã nɛ̀ ɔɖɛklɛmɛ, pɛ eplelee bhlui mɛ ete kide ana.

⁶ Kineke tsyɛ inu ifu. Kinu kanɔ alɛ mɛ ɛdɔ̃ zizĩ tili gɛinu ɔlɔ ishudzya awɔ̃pɛ tieli. Kituturu anɔ pɛ kitsu anunɔ yɛkpã zazã nɛifú, kɛlɛ̀ xɔnɔ pɔɔ, kifu gɛtã tihɔɔ nɔ kɛlɛ batsu ɛlɛ ifu.

⁷ Banɔ abalà akɔ baagã petee gɛenu, bɔzhɔɛ, bagã gɛetsì nɛ kesiakpa, nɛ̀ aƒu mɛ agã ka nyia ka idi amɔ̃ awɔ̃,

⁸ kineke xɔnɔ anɔ nanà atɛlà ɛlɛ akpakà. Kinu kɛdɔ̃ zizĩ gɛiti moele, gɛ kabɔɛ kpa kalɛ alɛ ɛlɛ ulũ.

⁹ Bɔlɔkɔ inikeɛ kpɛ Apaleteɛ nɛ̀ Akaa enye nɛitití nɔ, kɛlɛ bɔlɔkɔ ɛlɛ ɖɔ ibui kpɛ anunɔ tsyɛ, anunɔ gɛ Owusoso Akaa abhɛtɛ nɛ yɛtɛzazã mɛɛ.

¹⁰ Nɛ olugbũ tonikpo ɔlɛ mɛɛ, Apalete nɛinye kpɛkpɛ nɛitití nɔ, nɛ̀ kibui ɖɔɖɔ kpɛ anɔ ede ekoeyi. Mɛadzya alɛ mɔ, kidzo ma sɛ tɛ kɛzã ana.

¹¹ Kɛpɛ sɛ tɛ bulĩ gbangbã nɛ̀ bɔmɔɛlĩ zide koeyi nɛ ulĩhɔ tinikpo ɛlɛ mɛɛ dza?

¹² Mɛadzya alɛ mɔ, nɔyɛkɛ ɔŋã ɔsɛ nɛ kamɔtɔ̃si tunikpo ɔlɛ nabhaa, bɔbaapɔ̃ bɔbɔ osi eyuyu dza? Alo wain ihui balà yu kibisɛ busi eyuyu tsyɛ dza? Kidzo ɛlɛ nabha kɛhɔ mɛ gɛ bɔmɔɛlĩ kuɔ, bulĩ gbangbã tsyɛ tɛ balà ziku nɛ kɛhɔ tinikpo ɛlɛ mɛ.

Bubutiɛ Gɛide Kitití

¹³ Afana gɛenu ebuitinɛ nɛ̀ ebui esi lulũelete nɛ wɔnɔ mɛ? Anɔ alɛ alɔkɔ ɛkpã gbangbã ebu ɛlɛ akasɛ ɔgana yɛebui bhɛbhɛtɛ mɛ, kɛlɛ tɛ abhɛtɛ alɛ ɔgana ishu esi zhizhinɔ gɛide ubuti mɛ.

¹⁴ Onupɛ kiwuhũ dzadzã kɛtɛ́kɛtɛ́, nɛ̀ mɛ ete yɛtɛpɛpɛ ebui alɛ akpasɛ ɔnɔ etúɔ mɛɛ, nɔtɛotũ itelũ nɛ alɛishu alo tɛ nɔzɔdɛ adã nɛ ibui gbangbã shu.

¹⁵ “Bubuti” ɛlɛ nɛidiɛ, anɛ kitití bude ba, pɔ kanɔ mɛ ɔyɛ bunu, gɛ ɔfɔfuĩa ɔma ɔlɛ mɛ, Abosam ɔyɛ ulinu.

¹⁶ Ɔmɔsɛ ɛkɛlɛ gɛ kiwuhũ dzadzã nɛ̀ mɛete ɛyɛ ko kɛlɛ pɛ lɛ̀ɛ, ɛkɛlɛ ɔtɔ bubú nɛ̀ ebui kpa bhɛbhɛtɛ ka nyia ka idi tsyɛ azã.

¹⁷ Bubutiɛ gɛide kititíɛ pɔɔ, putɔ nɔɔ, bɔlɛishu dalɛ, gɛ bɔdɛmɛ nɛ anɔ nɛishu yɔyɔ mɛ, ɔhagbo esi tilulũ, ishu esi tizhizhinɔ, gɛ ashagabui ɖiɖi nɛ̀ eyuyu gbangbã akpasɛ, banɔ amɛ maɖimaɖi nɛ̀ ebui mɛ dadalɛ alɛ.

¹⁸ Iboe evuvũeleteɛ gɛ aɖa ɔdɔ̃ nɛishu yɔyɔ mɛɛ, bapɔ ɔdɔ̃ gɛinu ibui gbangbã bhɛbhɛtɛ.

« Roimhe

Air adhart »

Lean sinn:

Ceanglaichean taic

Sanasan