Yakobo 2 - Nyangbo New Testament

Banɔ Amɛɖiɖi Ibui Ma Ɛlɛ Mɛ

¹ Mɛadzya alɛ mɔ, wɔnɔ asɛ banɔ gɛ ɔyɛkɛ ishu dadalɛ anɔ Apalete Yesu Kristo abha ɔŋãa, nɔotɛ oɖi anɔ amɛ.

² Kɛba ɛlɛ mɛ ɔsɛ anɔ teli akpɛ sikã ɛsikpɛ pɛ adã ɛpɔtɛ gbangbã amana wɔnɔ ɔtsyɔakɔ, pɛ etsyuitsyui teli tsyɛ akpɛ ɔdɔ̃ tsatsã amana,

³ onupɛ anunɔ nɛ yɛehoeyiudɔ̃ kpɛkpɛ so pɛ notseɖe yɛɔsɛ, “Zã ɔgbangbãkɔ ɔlɛ,” pɔ notseɖe etsyuitsyuiɛ xɔnɔ ɔsɛ, “Wɔ xɔnɔ lɔ itití nɛ ɛkɛlɛ,” alo “Zã esiakpa nɛ mɛotugbà, nɛ ɛkɛlɛ.”

⁴ Nɔbhɛtɛ ana pɔ, anɛ ɔtɔ nɔkpɛ nɛ bagɔlɔ ishi, pɛ nɔlɔkɔ ekpeɖekpeɖe mɛ zizĩ okulu ebhu nɔ mɔɔ dza?

⁵ Mɛdzya alɛ gɛ ɛdɛmɛ nɔ, nɔtɛ atɔ̃ tɛ nolũ. Pɛnɔsɛ anɛ bagɛ beɖì asɛ balɛ enu betsyutsyuiɛ, balɛ Owusoso Akaa xɔnɔ ebú bedzi ehoeyielete nɛ tɛyɛyɛkɛŋã mɛ, kɛlɛ anɛ balɛ abaŋã itití ukusiɛ gɛ atɔɖɔ elu akɔ agɛ adɛmɛ yɛibuiɛ mɔɔ dza?

⁶ Wɔnɔ pɔ nɔkwɔala betsyutsyuiɛ. Pɛnɔsɛ anɛ ehoeyieleteɛ balɛ ezhini ɔnɔ ɔkpɛ esiɛ mɔɔ dza? Kɛlɛ anɛ balɛ enu banunɔ gɛ agbana ɔnɔ avɛnɔ ebhu okulukɔ mɔɔ dza?

⁷ Anɛ ehoeyielete alɛ balɛ ebu olugbũ mɛ nɛinye gbangbã gɛ nɔyɛkɛ odenɔ Yesu ede zazã mɛ mɔɔ dza?

⁸ Onupɛ nɔnyana ukusi ɔŋãkɔ ɔsha, nɛ kibuiɛ gɛ bafɔnɔ eluɔ mɛ ɔsɛ, “Dɛmɛ nɛ wɔhagbo asɛ kɛdɛmɛ gɛ ɔdɛmɛ nɔ nɛishu anaa,” kɛlɛ nɔbhɛtɛ piapii.

⁹ Pɔ onupɛ noɖi anɔ amɛɛ, nɔbhɛtɛ ibui kpa, kɛlɛ nɔŋã ɛpɔ asɛ banunɔ gɛ batɛ bhɛtɛ ɔsha abha ana.

¹⁰ Ɔmɔsɛ anunɔ gɛ abhɛtɛ ɔsha pete abha, pɔ pɛ atá esi nɛ toli shuɔ, kɛlɛ ata esi nɛ ɔlɛ pete shu.

¹¹ Ɔmɔsɛ anunɔ gɛ àɖɔ asɛ, “Tɛɔdɛ ɔma mɛɛ,” yɛɛ ke yɛazaɖɔ asɛ, “Tiyí anɔ.” Onupɛ ɔgɛdɛ ɔma mɛ, pɔ oyì anɔ xɔnɔɔ, kɛlɛ odzi anunɔ gɛ ɔgɛbhɛtɛ nɛ ɔsha abha.

¹² Nɔɖɔaɖɔ tɛ nɔbhɛtɛ ibui asɛ banunɔ gɛ babàlɔkɔ ɔsha gɛ lɔkɔ anɔ ishu mɛ ahɔɛ zazã ekulu ebhu akɔ nɔ nɔ̀,

¹³ ɔmɔsɛ babalɔkɔ ashagabui maɖimaɖi ekulu ebhu akɔ bagɛ etiɖi anɔ ashagabuiɛ. Yɛ pɔɔ, ashagabui ɖiɖi yɛenu yɛtɛtɔtɔ ɖɔ nɛ yɛebhu kukulu mɛ. Ashagabui ɖiɖi pɔ yɛaŋã abha nɛ yɛebhu kukulu mɛ.

Tɛyɛyɛkɛŋã Nɛ̀ Ebui Tɛbhɛbhɛtɛ

¹⁴ Mɛadzya alɛ mɔ, kɛgbangbã ɖuwoe lu kinu, onupɛ anɔ teli aɖɔ asɛ tɛyɛyɛkɛŋã lɛ yɛahɔɛ, pɛ ɛxɔ̃ɛ wɔawɔa nanà pɔ ma kɛlɛishuɔ, kɛlɛ́ tɛyɛyɛkɛŋã ɛlɛ nɛidiɛ balà bui mɔ dza?

¹⁵ Kɛba ɛlɛ mɛ ɔsɛ, wɔadzya alo woelɛ adzɛ teli alɛ pɛ kɛpɔtɛ alo kɛdɔ̃ kpɛkpɛ ma yɛahɔɛ, alo kɛŋaŋã ete tsyɛ ma yɛahɔɛ ɔkɔ kiwui nyiɛ wui udɔ̃ ŋaŋã,

¹⁶ onupɛ wɔnɔ mɛ anɔ teli aɖɔ etseɖe yɛasɛ, “Gavɛ nɛ ishu yɔyɔ mɛ, tɛ kɛkpɛkpɛ ku wɔ mɛ, kɛlɛ tɛ ɔŋã ɔdɔ̃ tɛ oxuiɛ,” tixuxui ɖuwoe luidi yɛabamɔ, onupɛ agɛkɔɛ tɛpɛplɛnɔ nanà nɛ yɛɔtɔ mɛ pɔɔ dza?

¹⁷ Kidzo ɛlɛ nabha anɔ yɛtɛyɛyɛkɛŋã lɛ́, onupɛ kɛxɔ̃ɛ wɔawɔa ma kɛlɛishuɔ, kinu kɛlɛ́ mɛ tɛyɛyɛkɛŋã.

¹⁸ Anɔ teli abaɖɔ asɛ, “Tɛyɛyɛkɛŋã lɛ wɔahɔɛ, kɛlɛ mɛ pɔ kɛxɔ̃ɛ wɔawɔa kɛlɛ ɛlɛ mɛahɔɛ.” Ɛbabu kɛliulũ kɔɛ ɔsɛ, kasɛ mɛ wɔtɛyɛyɛkɛŋã nɛ̀ ɛxɔ̃ɛ mawɔa mawɔa, tɛ mɛ tsyɛ ɛkasɛ wɔ mɛ tɛyɛyɛkɛŋã gana mɛxɔ̃ɛ gɛ ɛwɔaa mɛ.

¹⁹ Nɔyɛkɛ ɔŋã ɔsɛ Owusoso Akaa tenikpo ko yɛalɛ. Gɛ kɛpɛ ana tsyɛ! Ɛfɔfuĩa zizĩɛ tsyɛ yɛkɛŋã ana-kɛlɛ ɛkɔ ɔsɛ tɛ lishuku wawawa.

²⁰ Awɔaga, ɔpɛ ɔsɛ bebu akasɛ wɔ asɛ tɛyɛyɛkɛŋã gɛ ɛxɔ̃ɛ wɔawɔa nanà ma kɛlɛishuɔ ma kɛnanà mɛɛ dza?

²¹ Kiɖuwoe gɛkɔ ɔsɛ balɔkɔ ɔlɔ ashuĩ Abraham asɛ anɔ gbangbã yɛenu? Anɛ gɛ alɔkɔ yɛeyi Isak avɛnɔ bɔdɔ̃ pɔpɔɛ osubha nabha soɔ dza?

²² Yɛtɛyɛyɛkɛŋã nɛ̀ yɛaxɔ̃ɛ wɔawɔa alɛ tenikpo, kɛlɛ yɛtɛyɛyɛkɛŋã wɔ̃ɛ ɔgana ɛxɔ̃ɛ gɛ abhɛtɛ mɛ.

²³ Kɛkɔ ɔsɛ ibui fɔfɔnɔ lu ɛlɛ bá ɛlɛ mɛ ɔsɛ, “Abraham ayɛkɛ Owusoso Akaa nabha aŋã, kɛlɛ balɔkɔɛ ɛlɛ akɔɛ asɛ, enu anɔ gbangbã,” kɛlɛ bekului asɛ Owusoso Akaa yɛɔbhia.

²⁴ Kinu ibui gbã ɔsɛ, bebu utsyɔa akɔ anɔ ɔgana yɛebuiɛ gɛ abhɛtɛ mɛ, kɛlɛ anɛ gana yɛtɛyɛyɛkɛŋã mɛ ete.

²⁵ Kidzo ɛlɛ nabha balɔkɔ Rahab gɛedzi kedulũ azazãelete asɛ enu anɔ gbangbã, nɛ kɛgɛ abhɛtɛ pɛ ayɛkɛ bagɛ bakpɛ asɛ bedi zuru, elu awɔ̃ eɖi esiakpa mɛ, pɛ akasɛ alɛ idzo bhlatɔ pɛ bashɛ mɔɔ dza?

²⁶ Ɔmɔ asɛ kinu gɛ anɔ teli enu anɔ tsitsí onupɛ ɔfɔfuĩa ɔma yɛmɛɛ, kidzo ɛlɛ nabha tɛyɛyɛkɛŋã tsyɛ nui idɔ̃ tsitsí onupɛ ɛxɔ̃ɛ wɔawɔa gɛ plɛnɔ nɔ ɛlɛ.