Yakobo 1 - Nyangbo New Testament

¹ Keplukpa alɛ kede mɛ Yakobo, Owusoso Akaa nɛ̀ Apalete Yesu Kristo yɛaxɔ̃ɛdɛ ɔkɔ. Ɛfɔnɔ alɛ sɛsɛ egbogbo lɔfɔ nɛ̀ taabha gɛ apɔɛ afalanɔ pɛ bakpasɛ ɛmadi bhlatɔ mɛ. Nɔyɛkɛ mɛ ɔsɛsɛnɔo.

Tifefekeɖi Nɛ̀ Anɔ Tɛgbagbana Kpɛ Ebui Kpa Mɛ

² Mɛadzya alɛ mɔ, onupɛ tifefekeɖi ediedi aba ɔnɔ abhaa, nɔkɔ ilidzi same ibui kɔ ɔnɔ,

³ ɔmɔsɛ nonyi ɔsɛ gana ɔnɔ tifefekeɖi mɛɛ, wɔnɔ tɛyɛyɛkɛŋã zɛiwlui mɔ emi kpɛkpɛ ɔtɔɖɔ.

⁴ Nɔkɔ wɔnɔ emi kpɛkpɛ azã wɔnɔ ɛkpã mɛ ɔdɛtɔ̃, tɛ nodzi banɔ gɛ eshe, pɛ nɔna nɛ kɛka nyia ka mɛ, gɛ nɔtɛ bɔpɛ ɛdɔ̃ nanà.

⁵ Onupɛ bubutì ma wɔnɔ ɔmayɛmɛ teli ahɔɛɛ, ebisi Owusoso Akaa gɛ àkɔ anɔ nyɔ̃ɔ ɔdɔ̃ nɛ̀ ɛyamɛ fãa nɔ, pɛ etiɖi ibui kpa nɛ anɔ shu flogo nɔ, kɛlɛ abalɔkɔ akɔɛ.

⁶ Pɔ onupɛ ebisiɛ, ayɛkɛ aŋã, anɛ sɛ tɛ akpɛ ɛlɛ ɔkpɛ, ɔmɔsɛ anɔ gɛ akpɛ ɔkpɛ, alɛ asɛ aƒulĩ gɛitsu guɖaguɖa gɛ kɛlɛ́ fu falanɔ ɔvɛnɔ ɛkɛlɛ odzinɔ mana ana.

⁷ Anɔ alɛ ètiɖi asɛ abamɔ ɛdɔ̃ tili ayɛkɛ edenɔ Apaleteɛ ɔkɔ,

⁸ ɔmɔsɛ yɛekpeɖekpeɖeɛ mɛ ama tenikpo kɛlɛ kibui tinikpo bhɛbhɛtɛ ma yɛebuiɛ pete mɛ.

⁹ Adzya nɔnɔ́ gɛ elu ishu esiɛ, tɛ efeke ishu nɛ yɛɔɖaɖama ɔkɔ shu.

¹⁰ Adzya gɛenu ehoeyielete pɔɔ, tɛ efeke ishu nɛ yɛesi ɔzãkɔ bhlui nɔ shu, ɔmɔsɛ abashɛ nɛ kanɔ alɛ mɛ asɛ kifutu mɛ usi efufu ana.

¹¹ Ɔmɔsɛ iwiɛ tu nɛ̀ kɛlɛ tinyenye gagalĩɛ, kɛkɔ ɔsɛ busiɛ atã pɔɛ, awlɔakpa wɔwɔ tsyɛ atãpɔɛ, kɛlɛ latɛ kapɔ ɖi. Nɛidzo ɛlɛ nabhaa ehoeyieleteɛ nulũ bafala, gɛ abazã yɛaxɔ̃ɛ wɔawɔa abha tsyɛ flogo.

¹² Bebè yula akɔ anyɛ nɔnɔ gɛ akpɛ emi nɛ yɛtifefekeɖi mɛ, ɔmɔsɛ alàkpɛ emiɛ avɛnɔ adɛtɔ̃ɔ, abayɛkɛ ɛkpã ɛkutuɔ gɛ Owusoso Akaa atɔɖɔ elu akɔ bagɛ adɛmɛ niyɛ.

¹³ Onupɛ befeke anɔ teli eɖiɛ, atɛɖɔ asɛ, “Owusoso Akaa yɛefeke mɛ eɖi.” Ɔmɔsɛ kibui zizĩ tɛbalà feke Owusoso Akaa eɖi, alo tɛ yɛtsyɛ etɛefeke anɔ nanà eɖi,

¹⁴ pɔ anɔ nyia anɔ, yɛibui zizĩɛ gɛ apɛ asɛ tɛ abhɛtɛɛ, kɛlɛ gba nii pɛ kɛwɔɛ yɛakpɛ tifefekeɖi mɛ.

¹⁵ Kɛlɛ onupɛ wɔ tɛpɛpɛ nɔ munɔ ɛya bekeɛ, kɛmɔ kibui kpa, kɛlɛ onupɛ kibui kpa shè piapii nɔ, kɛmɔ butsí.

¹⁶ Mɛadzya alɛ gɛ ɛdɛmɛ nɔ, nɔtɛkɔ anɔ nanà awɔɛ ɔnɔ.

¹⁷ Bɔdɔ̃ kɔkɔ gbangbã nɛ̀ bɔgɛ na piapii nɔ, kitití bude, nɛ kitití udɔ̃ gɛitseɛ bɔlɛ Akaa ɔkɔ, anunɔ gɛ etitsyina asɛ atɔwui gɛ tsrakɛ ɔzãkɔ ana.

¹⁸ Adɛmɛ ayɛkɛ ɔlɔ amɔ aganà yɛibuiɛ gɛlɛ ɛlɛ ɔzãkɔ mɛ, sɛ tɛ budzi asɛ yɛɔdɔ̃ eyuyu gɛiputɔ odenɔ yɛɔdɔ̃ bhɛbhɛtɛ nɛishi.

Kibui Tilulũ Nɛ̀ Kɛlɛ Abha Tɛbhɛbhɛtɛ

¹⁹ Mɛadzya alɛ gɛ ɛdɛmɛ nɔ, nolu awɔ̃ nɛ̀ ibui ɛlɛ ɔsɛ, anɔ nyia anɔ àhɔa nɛ ibui tilulũ mɛ, tɛ adɔfɔ̃ nɛ kaɖɔ ɖɔɖɔ nɛ̀ ɔmɔpɔɛ kpɛkpɛ mɛ,

²⁰ ɔmɔsɛ ɔmɔpɔɛ ɔtɛkɔ ɔsɛ anɔ azã nɛ ɛkpã gbangbã gɛ Owusoso Akaa adɛmɛ nɔɔ.

²¹ Kliso nɔshɛnɛ ahɔɛ nɛ atsɔ̃bui idi ka nyia ka bhɛbhɛtɛ, nɛ̀ ɛkpã zizĩ ka nyia ka gɛ likpũ kpasɛ ɔnɔ mɛɛ shu olu, tɛ nozhinɔ ishu esi tɛ nɔyɛkɛ yɛibui gbangbã gɛ baɖa kpɛ wɔnɔ mɛ. Gɛ kɛlɛ balà yɛkɛ ɔnɔ olu nɛ ɛkpãa.

²² Notɛ odzi kibuiɛ elulũelete ete, tɛ nɔzɔwɔɛ ɔnɔ shu. Nɔzɔbhɛtɛ kɛgɛ ibuiɛ tseɖe ɔnɔɔ.

²³ Ɔmɔsɛ anɔ nyia anɔ gɛ eelũ ibui pɛ atɛ bhɛtɛ ɛlɛ abhaa, alɛ asɛ anyɛ teli gɛ eɖi yɛamɛ nɛ ahuhɔ̃ɛ mɛ,

²⁴ kɛlɛ tsĩɔ ɔlɛ gɛ etsyina ashɛ koɔ, atɛ dzɛkɛ kidzi gɛ edziɛ kukuuku.

²⁵ Anunɔ pɔ gɛ elu awɔ̃ nɛ̀ ɔsha gɛɔná, pɛ lɔkɔ anɔ ishu ahɔɛ mɛ zazã, pɛ avɛ ɛlɛ abha, atɛ dzɛkɛ pɛ adɛmɛ aabhɛtɛ nɛ kɛgɛ elũ nabhaa, bebeyulà atɔɖɔ kɛka nyia ka gɛ abhɛtɛ nabha.

²⁶ Onupɛ anɔ teli akpɛ ɛtakpu esi akɔ Owusoso Akaa, pɔ pɛ atɛ nyana yɛinike piapii nɛ kaɖɔ ɖɔɖɔ mɛɛ, awɔɛ yɛishu kɛlɛ yɛtakpu esi kpɛkpɛɛ ma kɛnanà mɛ.

²⁷ Kɛtakpu esi kpɛkpɛ gɛ kɛli shu bhui pɛ kibo nanà ma kɛlɛishu, nɛ bɔlɔ Owusoso Akaa namɛɛ nu ɔsɛ tɛ nɔplɛnɔ batsyãnbhi nɛ̀ bavɛvɛ edzini nɛ balɛ ɔtɔ mɛ. Kɛlɛ tɛ anɔ alà yɛishu ebu nɛ kanɔ mɛ ebuiɛ gɛ letuturu anunɔɔ mɛ.