Tito 3 - Nyangbo New Testament

Kɛgbangbã Tɛbhɛbhɛtɛ

¹ Baka banunɔ ɔsɛ bezhinì ishu esi akɔ bekusiɛ nɛ̀ ɔshaeleteɛ, tɛ belũ atɔ̃, tɛ babalɛ elù asɛ babà abhɛtɛ kibui gbangbã,

² tɛ̀ batɛ gã olugbũ kedzi nɛ ananà shu, bazã ishu yɔyɔ mɛ tɛ beɖi anɔ ashagabui, tɛ bezhini ishu esi ɔkɔ aka nyia aka.

³ Kibè tili gɛ bafala, bɔlɔ tsyɛ zɛdɔ bɔga, bugizi lũ atɔ̃, bawɔɛ ɔlɔ budzi banɔ dzidzi ɔkɔ kanɔ mɛ bɔdɔ̃ nɛ̀ kalɛ mɛ same ebuiɛ petee. Bɔzana ɛkpã kpa kɛlɛ bɔkpɛ banɔ awɔ̃, bɔkɔ sɛ banɔ anyanã ɔlɔ akpɛ ɛyamɛ kɛlɛ bɔlɔ tsyɛ nyanã bagɔlɔ kpɛ ɛyamɛ.

⁴ Pɔ nɛ kibeɛ gɛ ɛyamɛ gbangbã gɛide Owusoso Akaa gɛ yɛebu ɔlɔ ekoeyiɛ,

⁵ ebu ɔlɔ, gɛnɛ nɛ bɔlɔ ebui gbangbã bhɛbhɛtɛ shu so, pɔ nɛ yɛ ashagabui ɖiɖiɛ shu so. Ebu ɔlɔ ɔgana tiwuwlunɔ odenɔ tɛmɔmɔ vɔvɔ, nɛ̀ Ɔfɔfuĩa Gbangbã gɛ lodzinì ɔlɔ mɔ́ avɔvɔ mɛ,

⁶ ɔfɔfuĩa nɔ gɛ alɔkɔ ɛyamɛ gbangbã abalɛ̀ bɔlɔ abha ɔgana Yesu Kristoɔ gɛ ebu ɔlɔ nabha,

⁷ sɛ tɛ, onupɛ bebhui bɔtsyɔa akɔ ɔlɔ gana yɛ tibhui bhuibuɔ mɛɛ, bɔbadzi kaŋãsi elete gɛ bɔbà ziɖi otugbàa mɛ ɔkɔ ɛkpã tihɔɔ nɔ.

⁸ Kibui ɛlɛ tɛɖɔɖɔ nu kibui gbã. Kɛlɛ ɛpɛ sɛ tɛ ɔɖɔ ebui alɛ odzinɔ ɔɖɔ, sɛ tɛ bagɛ ayɛkɛ Owusoso Akaa nabha aŋãa beɖi ishu abha piapii tɛ̀ balɔkɔ balɛishu akɔ kibui gbangbã bhɛbhɛtɛ. Ebui alɛ apɛ̃ kɛlɛ labà manà kibui gbangbã ɔkɔ aka nyia aka.

⁹ Pɔ yɔlɔ bɔga ebui wɔawlɔ̃akɛ, eshopo tɛshɔshrɔ nɛ̀ ebela ebui nɛ ɔsha shu ɔzɔ wlɔ̃akɛ, ɔmɔsɛ kɛnanà ma ebui alɛ mɛ kɛlɛ alɛ shu axɔ̃ɛ waɔwɔa nanà tsyɛ ama.

¹⁰ Kpɛ ɔsha ɔkɔ anɔ gɛ amana ɔtɔbubuɔ bɔkpɛ tunikpo, tɛ̀ owlui ɔkpɛ ɔsha ɔkɔɛ bɔbhalà. Nɛ kɛlɛ edieɛ, tɔɔkɔ fɔɛnii.

¹¹ Kɛlɛ sɛ otì ɔsɛ anɔ alɛ nɛidiɛ, yɛtakpumɛ ku otumũ kɛlɛ enu ebui kpa bhɛbhɛtɛ elete, ebe bu yɛishu ipɔ.

Buluhũ Huhu Gɔgɔɛ Nɔ

¹² Kibè nɔnɔ gɛ ɛnya sɛsɛ Artena alo Tixiko nɛ wɔkɔ koɔ, kpɛ emi tɛ̀ ɔba mɛɔbha nɛ Nikopolis, ɔmɔsɛ ɛtɔɖɔ ɛlɛ sɛ ɛbazã ɛkɛlɛ nɛ ekukù mɛ.

¹³ Bhɛtɛ kɛka nyia ka gɛ ɔbɔlà bhɛtɛ tɛ ɔplɛnɔ Zena gɛenu ɔshaetinɛ nɛ̀ Apolo gɛ onupɛ batɔnɔ kidzoɔ abaa, kɛlɛ ɖi ɛlɛ ɔkɔ sɛ kɛka nyia ka gɛ baba pɛ nɔ lɛ balɛ ahɔɛ.

¹⁴ Kɛlɛ sɛ bɔlɔ banɔ nɔ akpasɛ kana gɛ babalɔkɔ balɛishu akɔ kibui gbangbã bhɛbhɛtɛ, sɛ tɛ balà amɔ kɛdɔ̃ ɔkɔ kiwui nyia wui ebui bhɛbhɛtɛ tɛ batɛ zãna ɛkpã gɛ lɛgɛ kpa plɛnɔ kɛxɔ̃ɛ wɔawɔa.

¹⁵ Anɔ ka nyia ka gɛalɛ mɛɔbha asɛnɛ wɔ. Sɛnɔ bagɛ adɛmɛ nɛ bɔlɔ nɛ tɛyɛyɛkɛŋã mɛ. Tibhui bhuibuɔ zã plɛnɔ wɔnɔ petee.