Tito 2 - Nyangbo New Testament

Kɛgɛ Ɛlɛ Sɛ Bakasɛ Aza Ediediɛ

¹ Kɛlɛ sɛ ɔkasɛ kɛgɛ shɔnɔ pɛ kinu bɔdɔ̃ kakasɛ gbangbã.

² Kasɛ banɔ sheshèɛ tɛ belu kitu esi, sɛ tɛ bakpɛ kɛtakpu esi akɔ alɛ, ishu abha ŋaŋã, bazã piapi nɛ tɛyɛyɛkɛŋã mɛ, nɛ tɛdɛdɛmɛ nɔ nɛ̀ kemikpɛkpɛ mɛ.

³ Kana ɛbe, kasɛ badzɛ sheshèɛ tɛ bakpɛ kɛtakpu esi nɛ kana gɛ baba zana ɛkpã shu, betidzi banɔ gɛ agã olugbũ edzi alo banɔ gɛ bawɔ̃ɛ bunu ebuku, pɔ tɛ bakasɛ kɛgɛ pɛ̃.

⁴ Kɛlɛɛ babalà kasɛ badzɛnuvɔɛ nɔ tsyɛ ɔsɛ tɛ badɛmɛ nɔ nɛ̀ balɛ enyine nɛ̀ balɛ eyi alɛ,

⁵ tɛ baŋã balɛishu abha tɛ balɛishu dalɛ, tɛ bazadɛ bɔpã mɛ axɔ̃ɛ, tɛ balɛ ɛyamɛ pɛ, tɛ bakpɛ kɛtakpu esi ɔkɔ balɛ enyine alɛ, sɛ tɛ ananà atɛɖɔ kaɖɔ kpà nɛ Owusoso Akaa nɛibuiɛ shu.

⁶ Kidzo ɛlɛ nabha, nɔkpɛ bayisɔ̃ nɔ emi tɛ baŋã balɛishu abha.

⁷ Nɛ kɛka nyia ka mɛɛ, bhɛtɛ ibui ɔkasɛ alɛ ɔganà wɔɛbui gbangbã bhɛbhɛtɛ mɛ. Nɛ wɔ bɔdɔ̃ kakasɛ mɛɛ, kasɛ kana gɛ bazã nɛkpã, nɛ̀ bamɛ gagalĩ.

⁸ Kasɛ kaɖɔ gbangbã gɛ batɛ balà lɔɛtití nɛ alɛ shu tɛɖɔɖɔ, sɛ tɛ kiwũi yi bagɛ balɔɛtití nɛ wɔ shuɔ, ɔmɔsɛ bagɛ mɔ kibui kpa nanà gɛ abaɖɔ nɛ bɔlɔ shu.

⁹ Kasɛ banɔ dzidziɛ ɔdɔ̃ tɛ bakpɛ kɛtakpu esi akɔ balɛ apalete alɛ nɛ kɛka nyia ka mɛ, babhɛtɛ tɛ beku alɛ awɔ̃, tɛɖɔ kaɖɔ kpa kpɛ balɛ ɔkɔ,

¹⁰ kɛlɛ beti zuru alɛ, pɔ kasɛ alɛ ɔsɛ ɔyɛkɛ alɛ abha ɔŋã, sɛ tɛ nɛ kidzo ka nyia ka abha bɔdɔ̃ kakasɛ gɛ bayɛkɛ nɛ Owusoso Akaa agɛ yɛebu ɔlɔ shu tɛ̀ apɔ ɔɖi.

¹¹ Ɔmɔsɛ Owusoso Akaa tibhui bhuibuɔ gɛ mana tibubuɔ koeyì ɔkɔ banɔ nɔ petee.

¹² Kɛkasɛ ɔlɔ sɛ bɔɖɔ sɛ, “Ao” nɛ kɛgɛ gɛ kpaplɛnɔ Owusoso Akaa pɛ kinu kanɔ mɛ ebui tɛpɛpɛ shu, nɛ tɛ̀ bɔŋã bɔlɔ shu abha, bɔɖɔ olugbũ tonikpo tɛ bɔzana ɛkpã ɔkɔ Owusoso Akaa nɛ obo kanɔ alɛ mɛ,

¹³ nɛ kibeɛ gɛ buɖi kidzo mɛ ɔkɔ tiyuyula gɛ buɖi kidzo mɛ ɔkɔɔ, nɛ kibeɛ gɛ bupo tiyuyula ɛwuiɛ gɛ buɖi kidzo mɛ ɔkɔ nɛ Owusoso Akaa gbagbla yɛ tɛdadalɛ nɛ̀ Yesu Kristo gɛ ebu ɔlɔ tɛbaba nabha,

¹⁴ anɔ gɛ yɛalɔkɔ yɛishu akɔ asɛ tɛ̀ ebu ɔlɔ denɔ atakpu mɛ gagalĩɛ petee mɛ. Tɛ̀ epulu ɔlɔ akɔ yɛishu asɛ banɔ gɛenu yayɛ, banɔ gɛ apɛɛ asɛ tɛ̀ babhɛtɛ kɛgɛ pɛ.

¹⁵ Ebui alɛ kɛlɛ sɛ tɛ ɔkasɛ. Kpɛ balɛ emi tɛ̀ ɔlɔkɔ ɔshakpɛkpɛ petee otseɖenɔ nɛ alɛ. Tɛkɔ ananà amɔ wɔ esi.