Tito 1 - Nyangbo New Testament

¹ Paulo, anɔ gɛedzì axɔ̃ɛdɛ akɔ Owusoso Akaa nɛ̀ anɔkpɛkpɛ akɔ Yesu Kristo ɔkɔ bagɛ Owusoso Akaa ebu alɛ tɛyɛyɛkɛŋã, nɛ̀ kibuititìɛ gɛlɛ kibui gbã shu pɛ kɛgbanà anɔ vɛnɔ Akaa mɛ tɛzazã,

² tɛyɛyɛkɛŋã nɛ̀ kibuititiɛ gɛipo ɛkpã tihɔɔ gɛ buɖi kidzo mɛ, gɛ Owusoso Akaa, anɔ gɛ atɛ sɛ asɛnɛ, atɔɖɔ elu akɔ ɔlɔ flogo pɛ kanɔ nɔ̀ abakpɛ esi,

³ kɛlɛ nɛ yɛ kibeɛ gɛ atɔɖɔ eluɔ shuɔ, amana yɛibuiɛ nɛ tɛdadalɛ mɛ ɔgana kibuiɛ tɛɖɔɖɔ gɛ balɔkɔ akpɛ mahɔɛ ɔgana Owusoso Akaa gɛ ebu ɔlɔ yɛɔsha kpɛkpɛ mɛ,

⁴ Ɛlɔkɔ asɛsɛ wɔ Tito, mɛeyianyɛ gɛ ɔkpasɛ bɔlɔ tɛyɛyɛkɛŋã mɛ, Tibhui bhuibu nɛ̀ ishu yɔyɔ de Owusoso Akaa nɛ̀ Kristo Yesu gɛenu agɛ yɛebu ɔlɔ kɔ.

Kɛxɔ̃ɛ Gɛ Bakɔ Tito Nɛ Kreta

⁵ Kɛnɔnɔ shu so pɛ ɛshɛ yɔlɔ wɔ nɛ Kreta kɛlɛinu ɔsɛ tɛ owoese ebuiɛ gɛatɔ̀ pɛ balɔkɔ akpɛ wɔahɔɛ tɛ obu bagɛ abazã ɔha nulũ nɛ ɔma ka nyia ka mɛ, asɛ kana gɛ ɛkasɛ wɔ ana.

⁶ Kɛma sɛ tɛ kɛpɔ bubu zã osofo shu, edzi anɔ gɛ agbana adzɛ tenikpo, anyɛ gɛ yɛeyi alɛ ayɛkɛ aŋã pɛ betinu banɔ gɛ babhɛtɛ agbagbà ebui pɛ betielũ atɔ̃.

⁷ Gɛ balɔkɔ Owusoso Akaa ɛxɔ̃ɛ akpɛ osofo ahɔɛ soɔ, kɛma sɛ tɛ bamɛ tsitsí ebui azã yɛishu-kɛma ɔsɛ tɛ eze feke yɛishu, etidzi anɔ gɛ akpɛ ɔmɔpɔɛ nɛ ebui mɛ, etidzi enuwɔ̃ɛ, etidzi ebelapɛ, etidzi anɔ gɛ apɛ kanɔ mɛ ɔdɔ̃ ɔgana kidzo kpa abha.

⁸ Pɔ kɛlɛ sɛ tɛ yɛyamɛ pɛ̃, anɔ gɛ adɛmɛ nɔ nɛ̀ kɛgɛ pɛ, anɔ gɛ aŋã yɛishu abha, aɖɔ kibui nɛ ɛlɛ ɔzãkɔ, yɛishu dalɛ pɛ anyana yɛishu evunɔ.

⁹ Kɛlɛ sɛ anyana kibuiɛ gɛ lɛ ɛlɛ ɔzãkɔ pɛ balɔkɔ akpɛ yɛahɔɛ mɛ ovunɔ gagalĩ asɛ gɛ bakasɛ yɛana, sɛ tɛ alà akpɛ bagɔgɔɛ nɔ emi nɛ̀ bɔdɔ̃ kakasɛ piapi tɛ etilũ bagɛ balɔ kititì nɛishuɔ atɔ̃.

¹⁰ Ɔmɔsɛ batɔ̃mɛ gagalĩ elete kpekpè alɛ, banɔ gɛ baɖɔaɖɔ ete, pɛ bawɔɛ anɔ, banɔ asɛ bagɛ bakpasɛ Yudanɛ ɛkɔɔ mɛ ana.

¹¹ Kɛlɛ sɛ bakɔ bata atɔ̃, ɔmɔsɛ bezĩ bapãmɛ nɛ̀ bɔdɔ̃ kakasɛ gɛma ɔsɛ bakasɛ ɔkɔ kidzo kpa abha ɔdɔ̃ mɔmɔ.

¹² Balɛ ahɔɛ ebuiɖɔluanɔ tenikpo gɛ ede Krete nɔ tsyɛ aɖɔ asɛ, “Kretanɛ enu basɛnɛ elete ɖaa, ebui kpa bhɛbhɛtɛ elete nɛ̀ banɔ zhyɔzhyɔrɛ elete gɛ baŋã bɔdɔ̃ ɔtsɔ̃.”

¹³ Kibui ɛlɛ shu gɛ baɖɔaɖɔ nu kibui gbã. Klisoɔ, notseɖe nɛ alɛ odunu ɔlɛ, sɛ tɛ bazã piapi nɛ tɛyɛyɛkɛŋã shu

¹⁴ tɛ batɛ taatɔ̃ nɛ̀ Yudanɛ asɛnɛ ebuiɛ, alo bagɛ atɛapɛ kibui gbã asɛ elũɔ ɔsha.

¹⁵ Nɛ banɔ gɛ balɛishu dalɛ shuɔ, kɛka nyia ka shu dalɛ, pɔ nɛ bagɛ batsɔmɔ̃ pɛ bagɛ yɛkɛ aŋã ɔkɔ xɔnɔ, kɛnanà shu gɛ dalɛ. Nɛ kibui gbã mɛ, balɛ ekpeɖekpeɖe nɛ̀ balɛ etúɔ mɛ atsɔmɔ.

¹⁶ Baɖɔ asɛ enyi Owusoso Akaa, pɔ nɛ balɛ ebui bhɛbhɛtɛ mɛ xɔnɔɔ, betinyi yɛ. Banyana anɔ akpɛ ɛyamɛ, betielũ atɔ̃, kɛlɛ bagɛ na ɔkɔ kɛgbangbã nanà bhɛbhɛtɛ.