Timoteo 2 4 - Nyangbo New Testament

¹ Nɛ Owusoso Akaa nɛ̀ Kristo Yesu amɛɛ, anunɔ gɛ yɛebè kulu kebhu nɛ̀ bagɛ alɛ nɛkpã nɛ betsitsiɛ, kɛlɛ nɛ yɛ tɛbaba nɛ yɛikusi ɔŋãkɔɔ, ɛkɔ wɔ ɔsha ɔlɛ sɛ,

² Ɖɔ Owusoso Akaa nɛibuiɛ, balɛ sɛ onupɛ banɔ apɛ asɛ tɛ belũ kibuiɛ alo tɛ betielũ ɛlɛ tsyɛo, woese anɔ, tseɖe nɛ̀ anɔ tɛ̀ ɔkpɛ banɔ emi-nɛ kitu esi lulũ nɛ̀ bɔdɔ̃ kakasɛ piapii mɛ.

³ Ɔmɔsɛ kibèɛ baba gɛ, banɔ azapɛ asɛ tɛ belũ batɔ̃ akɔ bɔdɔ̃ kakasɛ piapii nɔ. Pɔ tɛ beku ishu awɔ̃ soɔ, babalɔkɔ badɔ̃ kakasɛ kpekpè akana balɛ ishu tɛ betseɖe alɛ kɛgɛ batɔ̃ gɛ awɔɛsɛ̃ alɛ apɛɛ asɛ tɛ belũɔ.

⁴ Bebè tsyina balɛ atɔ̃mɛ ashɛnɔ nɛ kibui gbã shu kɛlɛ bebè tsyina avɛ ɛdzɛdzɛ ebui shu.

⁵ Pɔ wɔ xɔnɔɔ, zã gagalĩi nɛ kɛka nyia ka mɛ, kpɛ emi nɛ ebui gagalĩ mɛ, wɔa kɛxɔ̃ɛ asɛ anɔ gɛ akanà kibuiɛ ana, wɔa axɔ̃ɛ petee ɔkɔ wɔ ɔhaa.

⁶ Ɔmɔsɛ batɛ lɔkɔ mɛ xɔnɔ a kpɛ ahɔɛ asɛ beyí, kɛlɛ kibeɛ na kɔmɛ tɛshɛshɛ.

⁷ Ɛta keyu gbangbã, ibu tɛtsɛɖɛ mɛ beke, ɛnyana mɛ tɛyɛyɛkɛŋã mɛ vunɔ.

⁸ Otsi alɛ xɔnɔ, balɔkɔ kibui gbangbã tɛbhɛbhɛtɛ kikutuɔ abalɛ elu akɔ mɛ, kɛgɛ Apalete gɛenu kebhu gbangbã kukulu eleteɛ, abalɔkɔ akɔ mɛ nɛ kiwui ɛlɛ nabhaa, kɛlɛ gɛnɛ mɛ ete yɛabakɔ, pɔ abakɔ bagɛ eɖi yɛ tɛbaba idzo mɛ tsyɛ.

Kɛgɛ Ɛmɔlu Nɛ Mɛishu Ahɔɛ Mɛ

⁹ Bhɛtɛ kɛgɛ pɛɔdɛ tɛ ɔba mɛɔkɔ tsĩɔɔ,

¹⁰ Dema xɔnɔ gɛ adɛmɛnɔ nɛ̀ kanɔ alɛ mɛ soɔ, ashɛ ayɔlɔ mɛ avɛ Tesalonika. Kreske tsyɛ avɛ Galatia, kɛlɛ Tito tsyɛ avɛ Dalmatia.

¹¹ Luka ete yɛalɛ mɛɔbha. Nɔpɛ Marko tɛ nɔgbanà yɛɔmana ɔmɔsɛ akɔ mɛ tɛpɛplɛnɔ nɛ mɛ axɔ̃ɛ wɔawɔa mɛ.

¹² Ɛsɛsɛ Tixiko nɛ Efeso.

¹³ Onupɛ ɔbaa, lɔkɔ mɛ akpɛkpɛ dzloloɔ gɛ ɛshɛ yɔlɔ nɛ Karpo ɔkɔ nɛ̀ Troa nɔɔ, mana mɛ, ɔlɔkɔ plɛnɔ buplukpa nɛ̀ bagã bupiɛ.

¹⁴ Aleksandro gɛ anɔ bɔdɔ̃ɔ, abhɛtɛ kibui kpa tili nɛ mɛ. Apaleteɛ aba bhuia kɛbhɛ ɔkɔ yɛ nɛ kɛgɛ yɛabhɛtɛ shu.

¹⁵ Wɔ tsyɛ ɖi wɔ ishu abha piapi nɛ yɛishu, ɔmɔsɛ alɔɛtití nɛ bɔlɔ ebuiɛ shu gagalĩi.

¹⁶ Nɛ mɛ ishu ulũ bubuɔ gɛ iputɔ shuɔ, ananà agɛba plɛnɔ mɛ, pɔ aka nyia aka ashɛ ayɔlɔ mɛ. Batɛ̀ lɔkɔ ɛlɛ abuia kɛbhɛ akɔ alɛ nɔ.

¹⁷ Pɔ, Apaleteɛ azã aplɛnɔ mɛ pɛ akpɛ mɛ ohumi, sɛ tɛ ɔgana mɛabhaa, baba ɖɔ kibuiɛ akana, kɛlɛ bagɛ betinu Yudanɛ tsyɛ ebelũ ɛlɛ. Kɛlɛ bebu mɛ edenɔ dzata olugbũ mɛ.

¹⁸ Apaleteɛ ebe bu mɛ odenɔ kibui kpa ka nyia ka ɛdi gɛ balɔkɔ nɛ mɛ shuɔ mɛ, kɛlɛ aba gbanà mɛ avɛnɔ yɛititì bukusi ɔŋãkɔ nɛ ishu yɔyɔ mɛ. Ishu dadalɛ ɔkɔ yɛ ɔvɛnɔ tihɔɔ. Amen.

Bɔdɔ̃ Sɛsɛnɔ Gɔgɔɛ Nɔ

¹⁹ Sɛnɔ Priskila nɛ̀ Akwila nɛ̀ Onesiforo balɛ ɔpã mɛ anɛ ɔkɔ mɛ.

²⁰ Erasto azã Korinto, kɛlɛ ɛshɛ yɔlɔ Trofimo gɛ adɔ bɔnyã nɛ Mileto.

²¹ Ɖi ɛlɛ ɔkɔ sɛ obo ku ɛkɛlɛ flogo pɛ ekukùɔ ana. Eubulo, Pude, Lino nɛ̀ Klaudia nɛ badzya petee asɛnɛ̀ wɔ.

²² Apaleteɛ azã plɛnɔ wɔ ɔfɔfuĩa nɔ. Tibhui bhuibuɔ zã plɛnɔ wɔ o.