Timoteo 2 3 - Nyangbo New Testament

Owusoso Akaa Matimatì Nɛ Ewui Gɔgɔɛ Nɔ Mɛ̀

¹ Pɔ kpɛ kibui ɛlɛ awɔ̃ olu ɔsɛ. Kibè kpa babà nɛ ewui gɔgɔɛ nɔ mɛ.

² Baanɔ abadɛmɛ nɔ nɛ̀ balɛishu, banɔ aba adɛmɛ nɔ nɛ̀ ehoeyi, bebetũ ahɔɛ nɛitélũ, bebe feke ishu, babà kwɔalà ɔdɔ̃, babà gagalĩ atɔ̃ mɛ nɛ balɛ elĩ nɛ̀ balɛ akaa alɛ shu, ahɔɛ mahumahu, ishu madalɛ madalɛ,

³ tɛdɛdɛmɛ nɔ mazã mazã, batɛ balɔkɔ kibui etsye anɔ, bebezĩ banɔ shu, batɛ balà balɛishu abha aŋã, atakpu mɛ gagalĩ ebui, batɛ badɛmɛ nɔ̀ nɛ̀ kibuiɛ gɛpɛ̃,

⁴ babà kpɛ anɔ ahɔɛ, babà pɛ bɔdɔ̃ ziazia, baba yɛkɛ balɛishu abha aŋã, baba dɛmɛ nɔ nɛ̀ kanɔ mɛ same mɔmɔ ebui ɔdɛ Owusoso Akaa-

⁵ babà abhɛtɛ ishu asɛ Owusoso Akaa ibuiɛ kpasɛ alɛ mɛ, pɔ babà shɛnɛ ahɔɛ nɛ kɛlɛ ohumi nɔ shu. Tɛ kpɛ alɛ ɔha.

⁶ Benu banɔ ɛdi tili gɛ shɔku bapãmɛ asɛ kɛsɔ̃ pɛ baŋã badzɛ gɛ ohumi ɔma balɛ ahɔɛ nabhaa, badzɛ gɛ apɛ ana, pɛ ebui kpa bhɛbhɛtɛ akpasɛ alɛ mɛ pɛ bawɔɛ alɛ nɛ̀ ebui kpa ka nyia ka ɛdi tɛpɛpɛ mɛ,

⁷ babà kpasɛ bɔdɔ̃ kibe nyia be pɔ batɛ bamɔ kibui gbã alɔkɔ elu eɖi.

⁸ Asɛ kana gɛ Yane nɛ̀ Yambre alɔɛtití nɛ Moses shuɔ, kana ɛbe banɔ alɛ tsyɛ abalɔɛtití nɛ kibui gbã shu-banɔ gɛ balɛ ekpeɖekpeɖe mɛ agɛ dalɛ, banɔ gɛ bashɛnɛ ahɔɛ nɛ balɛishu nɛ tɛyɛyɛkɛŋã mɛ.

⁹ Pɔ batɛ bamɔ otugbà vɛvɛ, ɔmɔsɛ asɛ kana gɛ kɛlɛ nɛ banɔ alɛ shuɔ, balɛ bɔga dɔdɔ mɛ badalɛ ɔkɔ aka nyia aka.

Kɛxɔ̃ɛ Gɔgɔɛ Nɔ Gɛ Paulo Akɔ Timoteo

¹⁰ Wɔ, onyi ibui odenɔ mɛɔdɔ̃ kakasɛ petee shu, mɛ ɛkpã gɛ idzinɔ, kɛgɛ ɛtɔɖɔ, mɛ tɛyɛyɛkɛŋã, mɛ kitú esi lulu, mɛ tɛdɛdɛmɛ nɔ, mɛ kemì tɛkpɛkpɛ,

¹¹ kede tɛtɔtɔnɔ, mɛ bɔtɔ mɔmɔ, ebui nɔnɔ ɛdi gɛ laba mɛabha nɛ Antioxia, Ikonio nɛ̀ Listra nɔ, kede tɔtɔnɔ nɔnɔ ɛdi gɛ ɛkpɛ kemi nɛ alɛ mɛ. Pɔ Apaleteɛ ebu mɛ edenɔ alɛ petee mɛ.

¹² Nɛ kibui gbã mɛɛ, babatɔnɔ anɔ ka nyia ka gɛ apɛ asɛ tɛ azãna ɛkpã kɔ Owusoso Akaa nɛ̀ Yesu Kristoɔ niede,

¹³ kɛlɛ banɔ kpa nɛ̀ bagɛ abhɛtɛ ishu asɛ bapɛ xɔnɔ ebèzĩ atɔɖɔ, babawɔɛ banɔ kɛlɛ babawɔɛ alɛ tsyɛ.

¹⁴ Pɔ wɔ xɔnɔɔ, zã ɛlɛ abha ɔzɔbhɛtɛ kɛgɛ ɔkpasɛ, pɛ olũ kɛlɛ esiɛ, ɔmɔsɛ onyi banɔ alɛ gɛ balɛ ɔkɔ wɔ kpasɛ alɛ odenɔ,

¹⁵ kɛlɛ nɛ kana gɛ onyi Owusoso Akaa kibui odenɔ kinuvɔbe soɔ, kibui gɛ bhɛtɛ wɔ pɛ odzì ebuitinɛ ɔkɔ wɔ tibubu ɔgana tɛyɛyɛkɛŋã nɛ Kristo Yesu abha.

¹⁶ Ebui fɔfɔnɔ luɔ petee enu Owusoso Akaa ɛbui gɛ afuĩa kpɛ ɛlɛ mɛ, kɛlɛ kɛpɛ̃ ɔsɛ balɔkɔ ɛlɛ akasɛ bɔdɔ̃ nɔ, tɛ̀ balɔkɔ ɛlɛ etseɖe nɔ nɛ̀ anɔ, tɛ balɔkɔ akpalà anunɔ, tɛ bewoese anɔ nɛ̀ bɔdɔ̃ kakasɛ nɛ ishu dadalɛ mɛ,

¹⁷ sɛ tɛ Owusoso Akaa anunɔ abalɔkɔ ɛlɛ epo yɛishu nɔ ɔkɔ kɛxɔ̃ɛ wɔawɔa gbangbã ka nyia ka ɛdi.