Timoteo 2 2 - Nyangbo New Testament

¹ Wɔ, mɛeyianyɛ, zã gagalĩi nɛ tibhui bhuibuɔ gɛ kpasɛ Kristo Yesuɔ mɛ.

² Nɛ̀ ebuiɛ gɛ olũ mɛɖɔ nɛ banɔ kpekpèɛ gɛ azã amɔ ebui alɛ amɛ, lɔkɔ ɛlɛ ɔkɔ banɔ gɛ belu awɔ̃ nɛ balɛ abha pɛ balɛ tsyɛ ashɔ̃ asɛ bakasɛ banɔ bhlatɔ ɔdɔ̃.

³ Kpɛ emi nɛ ebui gagalĩ mɛ asɛ keyuadɛ akɔ Kristo Yesu ana.

⁴ Anɔ nanà atɛwɔa axɔ̃ɛ asɛ keyuadɛ ana, pɛ aza lɔkɔ yɛishu akpɛ kɛxɔ̃ɛ bhlatɔ wɔawɔa mɛ, onupɛ apɛ asɛ tɛ eku yɛanɔ gbagbla nawɔ̃.

⁵ Kana ɛbeɛ, onupɛ anɔ teli awlɔ̃akɛ nɛ̀ awuhũ dzadzã mɛ asɛ anɔ gɛ ebu tɛtsɛɖɛ mɛ ana, atɛ yɛkɛ kabha ŋaŋã eleteɛ ikutúɔ ɔvɛnɔ kibeɛ gɛ apɔ̃ ohuiɛ nɛ kawlɔ̃akɛ ɔsha gɛ bakpɛ nulũ.

⁶ Ayadɛ gɛ awɔa axɔ̃ɛ gagalĩɛ, kɛlɛ sɛ yɛeputɔ ayɛkɛ kɛŋaŋã gɛ bapɔ̃ kawɔ̃pɛ tieli.

⁷ Nɔbaka kibuiɛ gɛ ɛɖɔɔ, ɔmɔsɛ Apaleteɛ abakɔ nolũ ebui alɛ petee esi.

⁸ Baka Yesu Kristoɔ, anɔ gɛ befeke edenɔ bekpuɔ nɛishi pɛ enu David yɛeshui nɔ. Kɛlɛ nu mɛibui gbangbã,

⁹ gɛ kɛlɛ shu mɛmɔ bɔtɔ ɔlɛ vɛnɔ sɛ bakpɛ mɛ nɛ ɛɖahui mɛ asɛ kɛtakpu mɛ gagalĩ elete ana. Pɔ bagɛ kpɛ ɛɖahui nɛ Owusoso Akaa nɛibuiɛ xɔnɔ shu.

¹⁰ Klisoɔ ɛkpɛ kemi ka nyia ka ɛdi ɔkɔ bagɛ bebuɔ, sɛ tɛ balɛ tsyɛ amɔ tibubuɔ gɛ kpasɛ Yesu Kristoɔ mɛ, nɛ tɛdadalɛ tihɔɔ.

¹¹ Kɛlɛ nu kibui gɛlɛ ɛlɛ ɔzãkɔ gɛ baɖɔ asɛ, Onupɛ butsi plɛnɔ yɛɛ, bɔba zã nɛ ɛkpã nɛ yɛ tsyɛ,

¹² onupɛ bɔkpɛ kemiɛ, bɔlɔ tsyɛ baŋã bukusi plɛnɔ yɛ. onupɛ bɔdã kadã nɛishuɔ, yɛtsyɛ abadã kadã nɔ ɔlɔ shu,

¹³ onupɛ bɔgɛ yɛkɛ ŋãa, yɛxɔnɔ abazã tɛyɛyɛkɛŋã nabha, ɔmɔsɛ atɛ balà adã kadã sɛ etinyi yɛishu.

Axɔ̃ɛwɔa Gɛ Owusoso Akaa Atɔɖɔ Ahɔɛ Nɛ Yɛabha

¹⁴ Zã kɛlɛ abha tɛ ɔzɔ bakà alɛ nɛ̀ ebui alɛ shu. Kpɛ alɛ ɔsha nɛ Owusoso Akaa namɛ nɛ ebelà ebui ɖɔɖɔ shu, gɛ kɛnanà maɛlɛ mɛ, bagɛ elũ ɛlɛ ete kiizĩ.

¹⁵ Bhɛtɛ piapii tɛ̀ ɔlɔkɔ wɔ shu ɔkɔ Owusoso Akaa, asɛ anɔ gɛ batɔɖɔ ahɔɛ nɛ yɛabha ana, axɔ̃ɛwɔa gɛ kɛma sɛ tɛ kiwũi yii pɛ enu axɔ̃ɛwɔa gɛ anyanã kibui gbã mɛ ovunɔ piapi.

¹⁶ Yɔlɔ kaɖɔɔ gɛetinu Owusoso Akaa shu ebuiɛ tɛɖɔɖɔ, ɔmɔsɛ banɔ nɔ gɛ balɔkɔ ishu akpɛ kaɖɔ alɛ nɛidi mɛɛ, bebe zĩ atɔɖɔ adɛ nɛ Owusoso Akaa shu.

¹⁷ Balɛ bɔdɔ̃ kakasɛ bayɛɛ asɛ kɛpɔ̃ ana. Balɛ mɛ beteliɛ balɛenu Himenaio nɛ̀ Fileto,

¹⁸ banɔ gɛ beyì ide nɛ kibui gbã shu. Baɖɔ asɛ tɛlɔlɔ denɔ bekpuɔ mɛ tɛba bafalanɔ, kɛlɛ bezĩ beteli tɛyɛyɛkɛŋã mɛ.

¹⁹ Pɔ, Owusoso Akaa uvũ esi kpɛkpɛ klagbuɔ xɔnɔ dzi gɛ ɛtɛbà hɔa, pɛ badã ɛlɛ ɔdɔ̃ nɛ̀ kibui fɔfɔnɔ ɛlɛ ɔsɛ, “Apaleteɛ enyi bagɛ enu yɛayɛ, kɛlɛ anɔ ka nyia ka gɛ adalɛ Apaleteɛ nɛinye shuɔ, kɛlɛ sɛ eyidè nɛ kɛtakpu mɛ gagalĩ ebui shu.”

²⁰ Nɛ bɔpã hohoe mɛɛ, gɛnɛ sikã balɔkɔ abhɛtɛ kɛka nyia ka nɔ, pɔ babhɛtɛ tili tsyɛ nɛ̀ isi nɛ̀ tisi, teli alɛ akɔ ebui dadalɛ kɛlɛ teli tsyɛ alɛ akɔ ebui gɛ lagɛ dalɛ.

²¹ Onupɛ anɔ teli eplu yɛishu edenɔ ebui kukuɔ mɛɛ, ebedzi anɔ gɛ abazã akɔ ebui piapii, gɛ babhɛtɛ ladalɛ, pɛ lapɛ̃ akɔ Apaleteɛ asɛ alɔkɔ awɔa axɔ̃ɛ gbangbã ka nyia ka ɛdi nɔ.

²² Bu tɛtsɛɖɛ mɛ ɔshɛ nɛ bɔyisɔ̃ mɛ ebui zizĩ tɛpɛpɛ shu, tɛ ɔtɔnɔ ebuiɛ gɛ alɛishu adalɛ, gɛenu tɛyɛyɛkɛŋã, tɛdɛdɛmɛ nɔ nɛ̀ ishu yɔyɔ ede, ɔlɔkɔ plɛnɔ bagɛ bekulu Apaleteɛ odenɔ kitúɔ gɛ dalɛ mɛ.

²³ Tɛkpɛ ɔha nɛ̀ bɔga ebui tɛwɔawlɔakɛ, ɔmɔsɛ onyi ɔsɛ lamanà ebelá ebui.

²⁴ Pɔ kɛma ɔsɛ Apaleteɛ axɔ̃ɛdɛ apɛ ebelá, pɔ, kɛlɛ sɛ yɛyamɛ pɛ ɔkɔ aka nyia aka, kɛlɛ sɛ alà bɔdɔ̃ akasɛ, atɛza akpɛ ɔmɔpɔɛ.

²⁵ Bagɛ balɔ kititì nɛishuɔ tsyɛɛ, kɛlɛ sɛ yɛishu mɛ yɔ tɛ ebu ebui esi ɔkɔ alɛ, nɛ̀ kidzo mɛ ɖiɖi ɔsɛ Owusoso Akaa abakɔ alɛ etú mɛ tsyitsyina gɛ ɛba gbana alɛ vɛnɔ kibui titìɛ gɛinu kibui gbã mɛ,

²⁶ kɛlɛ babavɛ balɛ ekpeɖekpeɖe mɛ, pɛ bebu tɛtsɛɖɛ mɛ ashɛ nɛ abosam kɛgbã shu, anɔ gɛ alɔkɔ alɛ asɛ banɔ dzidzi tɛ̀ babhɛtɛ kɛgɛ yɛapɛɛ nɔ.