Timoteo 2 1 - Nyangbo New Testament

¹ Paulo, gɛenu Yesu Kristo yɛanɔkpɛkpɛ nɛ Owusoso Akaa tɛpɛpɛ ulũ, nɛ tɛtɔtɔɖɔ olu ɔkɔ ɛkpã zazãna gɛlɛ Kristo Yesu mɛ,

² Ɛsɛsɛ Timoteo, mɛeyianyɛ gɛ ɛdɛmɛ nɔ keplukpa alɛ, Tibhui bhuibu, ashagabui ibi nɛ̀ ishu yɔyɔ odenɔ Owusoso Akaa nɛ̀ Kristo Yesu gɛenu bɔlɔ Apaleteɛ ɔkɔ.

Kemikpɛkpɛ Banɔ Tɛ̀ Baɖɔ Olugbũ Tonikpo

³ Ihu Owusoso Akaa ahɔɛ, anɔ gɛ ɛkpɛ kɛtakpu esi ɔkɔ, asɛ kana gɛ mɛashuĩ alɛ abhɛtɛ, nɛ̀ ekpeɖekpeɖe dadalɛ mɛ, ɔmɔ asɛ kɛbakà gɛ ɛbakà wɔɛbui elishi nɛ̀ kemuze kibe nyia be nɛ mɛ Owusoso Akaa tikukulu mɛ.

⁴ Ɛbakà ɛwɔmɛ gɛ ozobiɛ, kinu mɛ tɛpɛpɛ sɛ tɛ ɛmɔ wɔ, sɛ tɛ same eku mɛ tsyɛ.

⁵ Batɛkɔ mɛitì nɛ wɔ tɛyɛyɛkɛŋã gbangbã shu, gɛ kiputɔ zã wɔedzé Lois nɛ̀ wɔelĩ Eunike mɛ, kɛlɛ kɛzã mɛuli sɛ kɛkpasɛ wɔ tsyɛ mɛ ana.

⁶ Nɛ kibui ɛlɛ shu soɔ, ɛbaka wɔ sɛ tɛ̀ ɔkpɛ kifù nɛ kɛxɔ̃ɛ gɛinu Owusoso Akaa ɛdɔ̃ kɔkɔ gɛkpasɛ wɔ mɛ, ɔgana mɛahɔɛ tɔtɔɖɔ nɛ wɔabha mɛ.

⁷ Ɔmɔsɛ Owusoso Akaa agɛ kɔ ɔlɔ ɔfɔfuĩa gɛ lodzi yɔɔ nɔ, pɔ ɔfɔfuĩa nɔ gɛ ohumi ɔkpasɛ ɔlɛ mɛ pɛ lɔonu tɛdɛdɛmɛ nɔ, nɛ̀ ishu abha tɛŋaŋã.

⁸ Kliso tɛkɔ kiwũi yi wɔ nɛ Apaleteɛ nɛibuiɛ tɛɖɔɖɔ shu, alo tɛ kiwũi yi wɔ nɛ mɛ ɔɖavũɔ mɛ gɛ ɛkpasɛ shu. Pɔ plɛnɔ mɛ nɛ bɔtɔ gɛ ɛmɔ nɛ kibui gbangbã shu, nɛ Owusoso Akaa ohumi nɔ shu,

⁹ anɔ gɛ yɛebu ɔlɔ pɛ ekulu bɔlɔ amana ɛkpã gɛ ɛlishu dalɛ mɛ, gɛnɛ kɛnanà gɛ bɔbhɛtɛ shu so, pɔ nɛ yɛ tɛtɔtɔɖɔ nɛ̀ tibhui bhuibuɔ shu so. Bakɔ ɔlɔ tibhui bhuibu ɛlɛ nɛ Kristo Yesu mɛ flogo pɛ kanɔ alɛ mɛ abakpɛ esi,

¹⁰ pɔ otsi alɛ bebu ɛlɛ akasɛ ɔgana agɛ yayɛkɛ akɔ ɔlɔ tɛbaba mɛ, Kristo Yesu, anɔ gɛ aŋã butsì abha pɛ alɔkɔ ɛkpã gɛ bazã tihɔɔ nɔ amana tɛdadalɛ ɔgana kibui gbangbã mɛ.

¹¹ Nɛ kibui gbangbã ɛlɛ shuɔ, bedzu mɛ otugbà anɔ, anɔkpɛkpɛ nɛ̀ adɔkasɛ.

¹² Kliso pɛ ɛmɔ bɔtɔ ɔlɛ asɛ gɛ ɛmɔ ana. Pɔ kiwũi tiyi mɛ, ɔmɔsɛ inyi anunɔ gɛ yɛabha mɛyɛkɛŋã, kɛlɛ ɛyɛkɛŋã sɛ abalà anyanã kibuiɛ gɛ ɛkpɛ yɛahɔɛ ovunɔ ɔvɛnɔ kiwui ɛlɛ nabha.

¹³ Kɛgɛ nɔolũ odenɔ mɛɔkɔ, nɔnyanà ɛlɛ ovunɔ asɛ bɔdɔ̃ kakasɛ piapii, ɔplɛnɔ tɛyɛyɛkɛŋã nɛ̀ tɛdɛdɛmɛ nɔ nɛ Kristo Yesu mɛ.

¹⁴ Nyanà kibui gbangbã gɛ balɔkɔ akpɛ wɔ ahɔɛ mɛ ovunɔ piapii, nyanà ɛlɛ mɛ ovunɔ ɔganà Ɔfɔfuĩa Gbangbã gɛ ɔkpasɛ ɔlɔ mɛ tɛpɛplɛnɔ mɛ.

¹⁵ Onyi ɔsɛ aka nyia aka gɛ akpasɛ Asia ɔdɔ̃ mɛ ashɛnɛ ahɔɛ nɛ mɛishu, ɔlɔkɔ plɛnɔ Figelo nɛ̀ Hermogene tsyɛ.

¹⁶ Kɛkɔ sɛ tɛ̀ Apaleteɛ ebu yɛashagabui bibiɛ akasɛ Onesiforo yɛɔpã, ɔmɔsɛ akpɛ mɛ kemi kibe nyia be kɛlɛ kiwũi tiyii nɛ ɛɖahuiɛ mɛ gɛ ɛkpasɛ shu.

¹⁷ Nɛ kɛlɛ shuɔ, gɛ ebeku Roma nɔ, apɛɛ mɛ nɛ̀ awuhũ dzadzã ɔvɛnɔ kibeɛ gɛ amɔ mɛ.

¹⁸ Kɛkɔ sɛ tɛ̀ Apaleteɛ aplɛnɔ yɛ tɛ amɔ ashagabui ɖiɖi nɛ kiwui ɛlɛ nabha. Onyi edzo kpekpèɛ gɛ alɛ abha yɛaplɛnɔ mɛ piapii nɛ Efesoɔ.