Timoteo 1 6 - Nyangbo New Testament

¹ Banunɔ petee gɛ akpasɛ banɔ dzidzì ɔsha niesiɛ, kɛlɛ sɛ tɛ bakpɛ kɛtakpu esi akɔ balɛ apalete alɛ, sɛ tɛ̀ batɛ bagã olũgbu kedzi nɛ Owusoso Akaa yɛinyéɛ nɛ̀ yɛɔdɔ̃ kakasɛ shu.

² Bagɛ balɛ apaleteɛ ayɛkɛ Kristo abha ŋã batɛ ɖɔ ɔsɛ badzya benu soɔ batɛ akpɛ kɛtakpu esi akɔ balɛ apalete alɛ. Nɛ kɛlɛ inye mɛɛ, kɛlɛ sɛ tɛ bedzi baxɔ̃ɛdɛ gbangbã ɔkɔ alɛ, ɔmɔsɛ bagɛ amɔ kibui gbangbã odenɔ balɛ axɔ̃ɛ wɔawɔa mɛ enu bayɛyɛkɛŋã, pɛ badɛmɛ alɛ kibui. Ebui alɛ kɛlɛ sɛ tɛ ɔkasɛ tɛ nɔlɔkɔ kpalà alɛ nɔ.

Ehoeyi Tɛdɛdɛmɛ Nɔ̀

³ Onupɛ anɔ teli akasɛ asɛnɛ ɔdɔ̃ pɛ agɛ dɛmɛ atɔɖɔ Apalete Yesu Kristo yɛebuiɛ nɛ̀ Owusoso Akaa ɔdɔ̃ kakasɛ nabhaa,

⁴ efeke yɛishu kɛlɛ etielũ kɛnanà esi. Enu anɔ gɛ akpɛ same nɛ ebui wɔawlɔ̃akɛ gɛ kesilulũ nanà ama alɛ shuɔ mɛ, ebela pɛpɛɛ nɛ̀ ebui gɛ la mana kiwuhũ dzadzã, anɔ nyanyana kpɛ ɛyamɛ, anɔ shu zizĩ ebui tɛɖɔɖɔ, kizizĩ tɛlɔlɔkɔ nɛ anɔ shu,

⁵ nɛ̀ kawlɔ̃akɛ ebui kibe nyia be nɛ banɔ gɛ balɛ ekpeɖekpeɖe mɛ agɛ dalɛ nɛishi, banɔ gɛ bagɛ pɛasɛ eti kibui gbã pɛ abhɛtɛ alɛ asɛ Owusoso Akaa mɛ tɛzazã nu kidzo ɔkɔ ehoeyi tɛmɔmɔ.

⁶ Pɔ Owusoso Akaa mɛ tɛzazã gɛixui anɔ nu kɛdɔ̃ gikpe.

⁷ Ɔmɔsɛ bɔgɛ mana kɛdɔ̃ nanà nɛ kanɔ nɔ̀ mɛ, kɛlɛ bɔtɛ balɔkɔ kɛnanà tsyɛ ɔshɛnɔ nɛ kalɛ mɛ.

⁸ Pɔ onupɛ kɛdɔ̃ ŋaŋã nɛ̀ bɔdɔ̃ kpɛkpɛ lɛ bɔlɔ ahɔɛɛ, nɔkɔ kiku ɔlɔ awɔ̃.

⁹ Banɔ gɛ bapɛ asɛ tɛ bamɔ ehoeyiɛ, bezhieku tifefekeɖi nɛ̀ kɛgbã dɔdɔ mɛ nɛ bɔga dɔdɔ ebui, nɛ̀ ebui kpa gɛ lagbana anɔ kpɛ kizizĩ nɛ̀ butsi mɛ.

¹⁰ Ɔmɔsɛ ehoeyi tɛdɛdɛmɛ nɔ alɛenu iguɔ ɔkɔ ebui kpa bhɛbhɛtɛ petee. Banɔ teli gɛ bapɛ asɛ tɛ bamɔ ehoeyiɛ, betsyina nɛ tɛyɛyɛkɛŋã shu kɛlɛ bakpɛ balɛishu apɔ̃ nɛ̀ ɔwɔ̃nyɔnɔ gelee.

Kɛgɛ Paulo Akpɛ Ahɔɛ Akɔ Timoteo

¹¹ Pɔ wɔ, Owusoso Akaa anɔ, bu tɛtsɛɖɛ mɛ ɔshɛ nɛ ebui alɛ petee shu, tɛ ɔtɔnɔ ebui gbangbã tɛbhɛbhɛtɛ, Owusoso Akaa mɛ tɛzazã, tɛyɛyɛkɛŋã, tɛdɛdɛmɛ nɔ, kemikpɛkpɛ nɛ̀ anɔ yɔyɔ tidzidzi ede.

¹² Bu tɛyɛyɛkɛŋã tɛtsɛɖɛ gbangbã mɛ. Nyana kanɔ tihɔɔ ɛkpã mɛ ovunɔ, agɛ alɛ shu bekulu wɔ nɛ kibeɛ gɛ ɔdalɛ ishumɛ nɛ banɔ kpekpèɛ gɛ bazã mɔ ebuiɛ namɛ.

¹³ Nɛ Owusoso Akaa namɛɛ, anɔ gɛ yɛakɔ kɛdɔ̃ ka nyia ka ɛkpã, nɛ̀ Kristo Yesu, anɔ gɛ nɛ kibeɛ gɛ adalɛ kibuiɛ mɛ nɛ Pontio Pilatoɔ amɛ, adalɛ kibui mɛ piapii, gɛ kɛlɛ mɛlɔkɔ kpɛ wɔahɔɛ

¹⁴ ɔsɛ tɛ ɔnyana ɔsha mɛ ovunɔ tɛ kihututũ alo kɛpɔ bubu nanà tɛ ba kɔ wɔ ɔvɛnɔ kibeɛ gɛ Apalete Yesu Kristo ebetsyina aba,

¹⁵ kɛgɛ Owusoso Akaa aba mana nɛ yɛahɔɛ kibeɛ gɛ atɔɖɔ mɛ, Owusoso Akaa gɛ beyula pɛ yɛete yɛaŋã Ukusiɛ, bekusiɛ petee balɛ Ekusi, nɛ̀ bapaleteɛ petee balɛ Apalete,

¹⁶ anɔ gɛ yɛete yɛetitsì, nɛ̀ anɔ gɛ akpasɛ kifu gɛ anɔ atɛ balà tsoplɛnɔ nɛishiɛ, anɔ gɛ ananà aka mɔ yɛeɖi alo pɛ abamɔ eɖi tsyɛ. Yɛ kɛlɛ ɔsɛ tɛ bakpɛ yɛinye nɛ̀ yɛohumi nɛitití ɔvɛnɔ tihɔɔ. Amen.

¹⁷ Kpɛ obo kanɔ alɛ mɛ ehoeyi eleteɛ ɔsha tɛ betifeke ishu alo tɛ balɔkɔ otugbà mɛ tiɖiɖiɛ atɔɖɔ ehoeyi mɔmɔ abha, gɛ betinyi kɛgɛ baba, pɔ balɔkɔ balɛ otugbà mɛ tiɖiɖiɛ atɔɖɔ Owusoso Akaa nabha, anɔ gɛ yɛakɔ bɔlɔ ehoeyi nɛ̀ kɛka nyia ka ɔkɔ bɔlɔ samɛ mɔmɔ.

¹⁸ Kpɛ alɛ ɔsha sɛ babhɛtɛ kibui gbangbã, sɛ tɛ bamɔ ehoeyi ɔdɔ̃ nɛ ebui gbangbã tɛbhɛbhɛtɛ mɛ, nɛ̀ tɛ balɛ ɛyamɛ pɛ̃ tɛ kɛdɔ̃ kɔkɔ anɔ zã alɛ mɛ.

¹⁹ Nɛidzo ɛlɛ abhaa, bebe shogò ehoeyi ɔdɔ̃ akɔ balɛishu asɛ buvũ esi kpɛkpɛ ɛklagbu gɛ gagalĩ ɔkɔ kibèɛ gɛbaa, sɛ tɛ bamɔ ɛkpã gɛ ɛlɛinu ɛkpã gbangbã.

²⁰ Timoteo, balɛ gɛdɔɔ gɛ balɔkɔ akpɛ wɔahɔɛ piapii lo. Tsyina ɔshɛ nɛ ebui ɖɔɖɔ nɔnɔ gɛ lagɛ kpaplɛnɔ Owusoso Akaa, nɛ̀ kititì lɔlɔ ebui gɛenu asɛnɛ ebui gɛ baɖɔ asɛ alɛ enu kibui titìɛ shu,

²¹ ebui gɛ banɔ teli baɖɔ elu, kɛlɛ nɛ ebui alɛ tɛbhɛbhɛtɛ mɛɛ, bashɛ nɛ tɛyɛyɛkɛŋã niede. Tibhui bhuibuɔ zã plɛnɔ wɔ o.