Timoteo 1 5 - Nyangbo New Testament

Hu Buluhũ Ɔkɔ Bavɛvɛ Edziniɛ Beshesheɛ Nɛ̀ Banɔ Dzidziɛ

¹ Titseɖenɔ nɛ̀ anɔ sheshè gagalĩ, pɔ hu buluhũ kɔɛ asɛ wɔ akaa ana. Lɔkɔ bunuvɔɛ nɔ asɛ baadzya ana,

² badzɛ sheshèɛ asɛ beelĩ ana, nɛ̀ badzɛnuvɔɛ nɔ asɛ baada ana, tɛ banyana ishu ovunɔ nɛishu dadalɛ mɛ.

³ Plɛnɔ bavɛvɛ edzɛniɛ gɛ ɛdɔ̃ nanà ma alɛ ahɔɛ.

⁴ Pɔ onupɛ beyi alo beshui alɛ avɛvɛ yɛedzini ahɔɛɛ, kɛlɛ sɛ banɔ alɛ eputɔ ebu balɛ tɛyɛyɛkɛŋã nɛ Akaa mɛ akasɛ, ɔgana kiɖi gɛ beɖi balɛ eshopo alɛ abha pɛ edzinì kɛbhɛ abuia akɔ balɛ elĩ nɛ̀ balɛ akaalɛ, ashuĩ nɛ̀ balɛ edze alɛ, ɔmɔsɛ kɛlɛ ikù Owusoso Akaa nawɔ̃.

⁵ Avɛvɛ yɛedziniɛ gɛ kɛdɔ nana ma yɛahɔɛ pɛ yɛ ete yɛalɛ, yɛotugbà mɛ ɖiɖiɛ petee otsiɖi Owusoso Akaa nabha, kɛlɛ azã ɛlɛ abha elishi nɛ̀ kiwui mɛ tɛ ekulu Owusoso Akaa tɛ ezebisi tepɛplɛnɔ edenɔ yɛahɔɛ mɛ.

⁶ Pɔ avɛvɛ yɛedziniɛ gɛ alɔkɔ ɛkpã ŋaŋã xɔnɔɔ, alɛ nɛkpã pɔ etitsí.

⁷ Lɔkɔ ɔsha lɛ ɔkɔ banɔ nɔ tsyɛ, sɛ tɛ ananà atɛba mɔ̃ bamɛ tsitsí.

⁸ Onupɛ anɔ teli etieɖi yɛeshopo alɛ abhaa, asɛ yɛɔpã mɛ anɛ anaa, agɛ yɛkɛ tɛyɛyɛkɛŋã kɛlɛ ezĩ adɛ anɔ gɛ agɛ yɛkɛŋãa.

⁹ Kɛma ɔsɛ bakalà avɛvɛ yɛedzini nanà akpɛ bavɛvɛ edzini alɛ nɛishi odiyinɔ sɛ eshè afala ɔgɔ afɛtehlo, pɛ abhɛtɛ kibui gɛlɛ ɛlɛ ɔzãkɔ akɔ yɛenyineɛ

¹⁰ pɛ benyi yɛ piapii ɔkɔ yɛ ebui gbangbã tɛbhɛbhɛtɛ, asɛ beyi abha tiɖiɖi ana, asɛ beefu tɛyɛyɛkɛ, anɔ gɛ eplu bɔtsɛɖɛkpɔ akɔ banɔ dadalɛ, anɔ gɛ aplɛnɔ bagɛ beku kibui mɛ pɛ alɔkɔ yɛishu akpɛ ebui gbangbã ka nyia ka tɛbhɛbhɛtɛ mɛ.

¹¹ Bavɛvɛ edzini alɛ gɛenu bubiteɛ xɔnɔɔ, tɛ kalà balɛ ɔkpɛ enyé alɛ nɛishi. Ɔmɔsɛ anyɛ tɛzazãna kibui bakɔsɛ batɛ balà alɔkɔ balɛishu akɔ Kristo, baba pɛ asɛ tɛ bazana anyɛ.

¹² Kɛlɛ ba mana kebhu kukulu nɛ balɛ ishu abha, ɔmɔsɛ bata esi nɛ balɛ bɔdɔ̃ tatanàa gɛiputɔɔ shu.

¹³ Nɛ kɛlɛ̀ niedeɛ, balɔkɔ balɛishu akpɛ kɛxɔ̃ɛ mawɔa mawɔa mɛ, pɛ banyɔ afala ode bɔpã ɔlɛ mɛ ɔvɛnɔ bɔlɛ̀ mɛ. Gɛnɛ sɛ gɛ bedzi kɛxɔ̃ɛ mawɔa mawɔa ete, pɔ baɖɔ banɔ shu tibui pɛ bezĩ banɔ shu, pɛ baɖɔ ebui nɔnɔ gɛ kɛma sɛ tɛ baɖɔɔ.

¹⁴ Kliso pɛ itseɖe badzɛ gɛ beke shè pɛ benu bavɛvɛ edzini alɛ asɛ bazana anyɛ, tɛ bamɔ eyi, tɛ beɖi balɛ bɔpã abha tɛ batɛkɔ Satana idzo nɛ olugbũ kedzi gagã shu.

¹⁵ Kibui gbã beteli xɔnɔ eti tsyina pɛ batɔnɔ Satana kukuku.

¹⁶ Onupɛ adzɛ teli gɛ ayɛkɛ aŋã, pɛ bavɛvɛ yɛedzini alɛ yɛɔpã mɛɛ, akɔ alɛ tɛpɛplɛnɔ tɛ betidzi bɔtɔ ɔkɔ ɔhaa, sɛ tɛ ɔhaa tsyɛ alà aplɛnɔ bavɛvɛ edzini alɛ gɛ bapɛ tɛpɛplɛnɔ gagalĩ nɔ.

¹⁷ Besheshèɛ gɛ beɖì ɔhaa nabha, kɛshɔnɔ ɔsɛ balɔkɔ kɛtakpu esi kpɛkpɛ gbangbã tili idi akɔ alɛ, asɛ banunɔ gɛ balɛxɔ̃ɛ wɔawɔa kɛlɛinu kibuiɛ tɛɖɔɖɔ nɛ̀ kɛlɛ tɛkakasɛ.

¹⁸ Ɔmɔsɛ kibuiɛ ɖɔ ɔsɛ, “Nɔtɛnyã olugbũ ɔkɔ enyíɛ gɛ yɛehu amɔɔ, “kɛlɛ” Axɔ̃ɛwɔa ashɔnɔ ɔkɔ yɛbhɛ babuia nɔ.”

¹⁹ Nɔtɛ obu anɔ sheshè nanà ɛpɔ, odiyinɔ ɔsɛ banɔ taabha alo tata azã amɔ̃ pɛ baɖɔaɖɔ adalɛ ɛlɛ shu.

²⁰ Bagɛ abhɛtɛ ebui kpaa xɔnɔɔ, kɛlɛ sɛ betseɖe nɛ balɛ nɛ ɔmaɛshi, sɛ tɛ bagɔgɔ alɔkɔ eɖi balɛ ishu abha nɔ.

²¹ Ɛlɛkɔ ɛlɛ kpɛ wɔahɔɛ sɛ, nɛ Owusoso Akaa nɛ̀ Kristo Yesu nɛ̀ baxɔ̃ɛdɛ namɛɛ, tɛ ɔnyana ebui alɛ mɛ ovunɔ banɔ amɛ maɖi maɖi, kɛlɛ tɛbhɛtɛ kɛnanà tsyɛ ɔlɔkɔ oku banɔ awɔ̃ nɔ.

²² Dɔ fɔ̃ɔ ɔkɔ ahɔɛ tɔtɔɖɔ nɛ anɔ abha, kɛlɛ tɛzã ebui kpa bhɛbhɛtɛ elete ede. Za nɛkpã nɛ wɔshu dadalɛ mɛ.

²³ Yɔlɔ bulĩ ete tɛwɔwɔ̃ɛ, tɛ ɔwɔ̃ɛ bunu tsyɛ ɛbɔbhlui ɔkɔ wɔ ɛyamɛ gɛtã wɔ nɛ̀ banyã gɛ bakpɛ wɔ buluhũɔ so.

²⁴ Banɔ teli ebui kpa gɛ babhɛtɛ abawɔ̃ɛ, gɛ leeku kebhu okulukɔ gɛ ɔlɛ otugbà, ebui kpa gɛ beteli xɔnɔ abhɛtɛ alɛ balɛ ede.

²⁵ Nɛidzo ɛlɛ abhaa, ebui gbangbã bhɛbhɛtɛ tsyɛ awɔ̃ɛ, kɛlɛ agɛ atɛawɔ̃ɛ tsyɛɛ, batɛ balà alɛ ekpũ.

« Roimhe

Air adhart »

Lean sinn:

Ceanglaichean taic

Sanasan