Timoteo 1 4 - Nyangbo New Testament

Ɔshaa Gɛ Bakɔ Timoteo

¹ Ɔfɔfuĩa nɔ dalɛ ɛlɛ mɛ ɔsɛ nɛ ewui gɔgɔɛ nɔ mɛɛ, beteli aba shɛnɛ ahɔɛ nɛ tɛyɛyɛkɛŋã shu pɛ babà kpatɔnɔ asɛnɛ ɛfɔfuĩa nɛ̀ ebui gɛ ɛfɔfuĩa zizĩɛ kasɛ.

² Bɔdɔ̃ kakasɛ ɛlɛ nɛidi de asɛnɛ bɔdɔ̃ kakasɛ elete ɔkɔ, banɔ gɛ balɛ ekpeɖekpeɖeɛ atã asɛ gɛ balɔkɔ ɔɖa kpɛkpɛ apɔɛ ɔdɔ̃ ana.

³ Bagɛ dɛmɛ asɛ tɛ banɔ agbana adzɛ, kɛlɛ bakpɛ alɛ ɔsha sɛ batɛ ŋã bɔdɔ̃ tuli idi, bɔdɔ̃ gɛ Owusoso Akaa abhɛtɛ asɛ bagɛ ayɛkɛ aŋã pɛ benyi kibui gbã ayɛkɛ nɛ̀ ahɔɛ huhu.

⁴ Ɔmɔsɛ kɛka nyia ka gɛ Owusoso Akaa abhɛtɛ pɛ̃, kɛlɛ kɛma ɔsɛ bashɛnɛ ahɔɛ nɛ kɛnanà shu onupɛ bayɛkɛ kɛka nyia ka nɛ̀ ahɔɛ huhuɔ,

⁵ ɔmɔsɛ Owusoso Akaa nɛibuiɛ nɛ̀ yɛ tikukuluɔ kɔ sɛ bɔlɛ ishu dalɛ.

⁶ Onupɛ obu ebui alɛ ɔkasɛ badzyaa, obodzi axɔ̃ɛdɛ gbangbã ɔkɔ Kristo Yesu, gɛ banyɔnɔ nɛ kibui gbã tɛyɛyɛkɛŋã mɛ nɛ̀ bɔdɔ̃ kakasɛ gbangbã gɛ bɔlɛ ede wɔlɛ mɛ.

⁷ Tɛ kpɛ olugbũ nɛ bagɛ ama Owusoso Akaa edeɛ asɛnɛ ebui nanà mɛ, nɛ̀ badzɛ sheshèɛ balɛ ɛdzɛdzɛ tata mɛ, pɔ nyɔnɔ wɔ shu nɛ Owusoso Akaa kidzo nabha.

⁸ Ɔmɔsɛ kedzì yɛyɛkɛ tieli idi akpasɛ ishu dzya bɔdɔ̃ kakasɛ mɛ, pɔ Owusoso Akaa mɛ tɛzazã yɛkɛ kedzi ɔkɔ bɔdɔ̃ petee, kɛgɛ nyanã kibuiɛ gɛ batɔɖɔ elu ɔkɔ obo kanɔ alɛ, nɛ̀ kanɔ nɔ gɛ kababa mɛ ovunɔ.

⁹ Kɛlɛ nu kibui tɛɖɔɖɔ gɛ yɛkɛ kedzi pɛ kɛlɛ ɔsɛ bayɛkɛ ɛlɛ

¹⁰ (ɔmɔsɛ kibui ɛlɛ shu bɔmɔ̃ bɔtɔ pɛ wlɔãkɛ ɔkɔ), sɛ bɔlɔkɔ bɔlɔ otugbà mɛ ɖiɖiɛ ɔkpɛ Owusoso Akaa enunuɔ ahɔɛ mɛ, anɔ gɛ yɛebu banunɔ petee nɛ butsi mɛ, asɛ bɔnɔ nɔ̀ gɛ bayɛkɛ aŋã ana.

¹¹ Kɔ ɔsha tɛ̀ ɔkasɛ ebui alɛ.

¹² Tɛkɔ ɔsɛ ananà eɖi wɔ asɛ anuvɔ wɔonu so, pɔ kpɛ kibui tili olu ɔgana kaɖɔ ɖɔɖɔ mɛ, nɛ wɔɛkpã mɛ, wɔtɛdɛdɛmɛ nɛ̀ anɔ, nɛ tɛyɛyɛkɛŋã nɛ̀ ɛkpã dadalɛ mɛ.

¹³ Ɔvɛnɔ kibeɛ gɛ ɛba baa, lɔkɔ wɔ ishu ɔkpɛ bɔdɔ̃ kakla ɔlɛ mɛ nɛ banɔ ɛshi, ɔkɔ kibuiɛ tɛɖɔɖɔ nɛ̀ kɛlɛ bɔdɔ̃ kakasɛ.

¹⁴ Tɛ shɛnɛ ahɔɛ nɛ wɔ bɔdɔ̃ kɔkɔ gɛ bakɔ wɔ ɔgana ebuiɖɔɖɔ luɔ shu, nɛ kibeɛ gɛ banɔ sheshèɛ ɛzaa nɛ̀ ɔhaa mɛ tɔɖɔ ahɔɛ nɛ wɔabhaa.

¹⁵ Zã ebui alɛ tɛbhɛbhɛtɛ abha, lɔkɔ wɔ ishuɔ petee kpɛ alɛ tɛbhɛbhɛtɛ mɛ, sɛ tɛ anɔ nyia anɔ amɔ wɔ otugbà vɛvɛɛ.

¹⁶ Lu awɔ̃ nɛ̀ wɔ ɛkpã nɛ̀ bɔdɔ̃ kakasɛ shu piapii. Kpɛ kemi nɛ bɔlɛ mɛ, ɔmɔsɛ ɔbhɛtɛ ana, obo bu wɔ ishu nɛ bagɛ ɔkasɛ bɔdɔ̃.