Timoteo 1 3 - Nyangbo New Testament

Ɛsofo Nɔ Nɛ̀ Ɛhamɛ Ɛzãkɔ Bhlui Eleteɛ

¹ Kɛlɛ nu tɛyɛyɛkɛŋã ibui gɛɖɔ ɔsɛ, Onupɛ anɔ teli atɔɖɔ edenɔ yɛitúɔ mɛ ɔsɛ tɛ edzì osofo, ebu kɛxɔ̃ɛ gɛiku awɔ̃.

² Kɛma ɔsɛ tɛ̀ bazã amɔ bamɛ tsitsí ebui nɛ osofo nɔ shu, edzì anɔ gɛ agbana adzɛ tenikpo, anɔ gɛ elu kitú esi, pɛ aŋã yɛishu abha, anɔ gɛ atɛkpɛ yɛishu awũi, anɔ gɛ adɛmɛ beefu tɛyɛyɛkɛ ibui pɛ alà kasɛ ɔdɔ̃ tsyɛ,

³ anɔ gɛ agɛ lɔkɔ yɛishu akɔ bunù gbagbla tɛwɔɛwɔɛ, etidzi agbagbà ebui bhɛbhɛtɛ elete pɔ edzì anɔ yɔyɔ, etidzi ebela pɛelete, pɛ adzã kiwuhũ nɛ ehoeyi shu.

⁴ Kɛlɛ ɔsɛ edzi anɔ gɛeɖi yɛɔpã abha piapii, tɛ̀ eɖi ɛlɛ ɔkɔ asɛ beyi gɛ elu atɔ̃ piapii pɛ bakpɛ kɛtakpu esi akɔɛ alɛ yɛahɔɛ.

⁵ (Onupɛ anɔ teli etinyi kana gɛ ebeɖi yɛahɔɛ bɔpã abhaa pɔ, kɛlɛ yɛabalà eɖi Owusoso Akaa ɔhaa nabha dza?)

⁶ Kɛma ɔsɛ tɛ̀ edzi anɔ gɛ etsyina avɔvɔ, onu gɛnɛ ana, ebefeke yɛishu kɛlɛ ebeku kebhu kukulu mɛ asɛ gɛ abosam tsyɛ ezhieku ana.

⁷ Kɛlɛ sɛ edzi anɔ gɛ bagɛ ama ɔhaa mɛ tsyɛ adɛmɛ yɛibui, sɛ tɛ̀ atɛba mɔ awũi ebui, tɛ̀ ebezhieku abosam kɛgbã mɛ.

⁸ Nɛidzo ɛlɛ nabha, ɔhamɛ ɛzãkɔ bhlui eleteɛ tsyɛ, kɛlɛ sɛ bedzi banyɛ gɛ badɛmɛ alɛ ibui, banɔ gɛ baɖɔ kibui gbã, batɛ lɔkɔ ishu ɔkpɛ bunu gbagbla tɛwɔɛwɔɛ mɛ, pɛ batɛ kpatɔnɔ bɔdɔ̃ pɛpɛ gana edzo kpa abha.

⁹ Kɛlɛ sɛ bedzi banɔ gɛ banyana tɛyɛyɛkɛŋã ebui kpukpũɔ gɛedzuɔ mɛ evunɔ nɛitú dadalɛ mɛ.

¹⁰ Kɛlɛ sɛ beputɔ feke alɛ eɖi, kɛlɛ onupɛ kibui nanà ma balɛishuɔ, tɛ badɛ axɔ̃ɛ asɛ ɛzãkɔ bhlui elete ana.

¹¹ Nɛ kidzo ɛlɛ nabha, balɛ edzini alɛ tsyɛ, kɛlɛ sɛ bedzi baadzɛ gɛ banɔ adɛmɛ nɛ alɛ, betinu banɔ gɛ baɖɔ banɔ tibui, pɔ benu badzɛ gɛ belu kitu esi pɛ bayɛkɛ balɛ abha ŋã nɛ kɛka nyia ka mɛ.

¹² Kɛlɛ sɛ ɔzãkɔ bhlui anɔ eleteɛ edzi anɔ gɛ agbana adzɛ tenikpo, pɛ alà eɖi yɛeyi alɛ nɛ̀ yɛɔpã abha piapii.

¹³ Bagɛ akpɛ ɛtakpu esi piapi nɔ amɔ tɛzazã gagalĩ piapi nɛ̀ kɛklagbu tɔtɔɖɔ nɛ balɛ tɛyɛyɛkɛŋã nɛ Kristo Yesu mɛ.

¹⁴ Gɛ ɛtɔɖɔ ɛlɛ sɛ tɛ ɛba wɔ bha gulũi tsyɛ elo, efɔnɔ ebui alɛ akɔ wɔ sɛ tɛ,

¹⁵ onupɛ ɛbawɔ kideɛ, obotì kana gɛ kɛlɛ sɛ anɔ azã nɛ̀ ɛkpã nɛ Owusoso Akaa bɔpã mɛ, ɔhaa gɛenu Owusoso Akaa enunuɔ ɔyɛ, kɛgɛ inu bubhi asha, nɛ̀ buvũ esi kpɛkpɛ ɛklagbuɔ ɔkɔ kibui gbã.

¹⁶ Kɛgɛ dɛ ebui bibisi alɛ petee kɛlɛinu ɔsɛ, Owusoso Akaa mɛ ebuiɛ gɛ abhɛtɛ ibiɛ egbogblo. Owusoso Akaa ebu yɛishu akasɛ nɛ ishudzya mɛ Ɔfɔfuĩa nɔ bu ɛlɛ ɔkasɛ, baxɔ̃ɛdɛ amɔ ɛlɛ, baɖɔ ɛlɛ nɛ amadiɛ nɛishi, bayɛkɛ ɛlɛ abha ŋã nɛ kanɔ nɔ̀ mɛ̀, befeke ɛlɛ avɛnɔ kitití nɛ tɛdadalɛ mɛ.