Timoteo 1 2 - Nyangbo New Testament

Bɔdɔ̃ Kakasɛ Nɛ Kɛtakpu Esi Kpɛkpɛ Nɛ Ɔhaa Mɛ

¹ Putɔ nɔɔ, ɛkpalà wɔ ɔsɛ, kɛdɔ̃ bibisi, Owusoso Akaa tikukulu, pɛnɔsɛ tɛ̀ bekulu Owusoso Akaa ɔkɔ anɔ teli alo tɛ behu ahɔɛ, kɛlɛ sɛ babhɛtɛ alɛ akɔ anɔ ka nyia ka,

² akɔ bekusiɛ nɛ̀ bagɛ alɛ ɔsha nulũɔ, sɛ tɛ bɔzã nɛ ishu yɔyɔ nɛ̀ ɛkpã gɛyɔ nɛ Owusoso Akaa nɛ̀ ishu dadalɛ pete mɛ.

³ Kibui ɛlɛ pɛ̃, gɛ kiku Owusoso Akaa gɛ ebu ɔlɔ awɔ̃,

⁴ anɔ gɛ apɛ asɛ tɛ bebu anɔ ka nyia ka sɛ tɛ baba kibui titìɛ gɛ lɛ ɛlɛ ɔzãkɔ mɛ.

⁵ Ɔmɔsɛ Owusoso Akaa tenikpo yɛalɛ, nɛ̀ anɔ tenikpo gɛevũ iboe nɛ Owusoso Akaa nɛ̀ banɔdzyrame ishi, gɛenu Kristo Yesu,

⁶ anɔ gɛ alɔkɔ yɛ ɛkpã akɔ nɛ banunɔ petee takpu-kibui gɛ badalɛ kɛlɛishu nɛ kɛlɛ ibè gbangbã mɛ.

⁷ Nɛ kibui ɛlɛ shu soɔ, bebu mɛ asɛ anɔkpɛkpɛ nɛ̀ adɔkasɛ ɔkɔ bagɛ etinu Yudanɛ, tɛ ɛdɛ ɖɔ tɛyɛyɛkɛŋã ibuiɛ gɛlɛ ɛlɛ ɔzãkɔ ɔkɔ alɛ. Kibui gbã mɛɖɔ, gɛnɛ asɛnɛ mɛsɛ.

⁸ Ɛpɛ sɛ banɔ gɛede ɔkɔ nyia ɔkɔ efeke balɛ ahɔɛ dadalɛ nɛitití ɔkɔ Owusoso Akaa tikukulu, tɛ̀ ɔmɔpɔɛ alo kibui wɔawlɔãkɛ tɛzã ɛlɛ mɛ.

⁹ Ɛpɛ tsyɛ sɛ tɛ badzɛ akpɛ bɔdɔ̃ asɛ badzɛ ana, tɛ̀ apɔɔɖi, ɔkɔ ɔhaɛshi tɛzazã asɛ baadzɛ ana, gɛnɛ tɛ beyu ɛtakpu alo tɛ bazã sikã ɔdɔ̃ nɛ̀ bɔdɔ̃ kpɛkpɛ gɛ yɛkɛ kedziɛ mɛ,

¹⁰ pɔ nɛ̀ ebui gbangbã tɛbhɛbhɛtɛ gɛ ashɔnɔ badzɛ gɛ apɛ asɛ tɛ̀ bakpɛ kɛtakpu esi ɔkɔ Owusoso Akaa.

¹¹ Kɛlɛ sɛ anɔdzɛ akpasɛ bɔdɔ̃ nɛ kaɖɔ maɖɔ maɖɔ nɛ̀ ishu esi zhizhinɔ mɛ.

¹² Ɛgɛ kɔ idzo sɛ anɔdzɛ akasɛ ɔdɔ̃ alo tɛ̀ akɔ anɔnyɛ ɔsha, kɛlɛ sɛ ataatɔ̃.

¹³ Ɔmɔsɛ Adam beputɔ abhɛtɛ, flogo pɛ babhɛtɛ Xawa.

¹⁴ Kɛlɛ gɛnɛ Adam bawɔɛ, adzɛ bawɔɛ pɛ ebedzì ebui kpa bhɛbhɛtɛ elete.

¹⁵ Pɔ bebèbu badzɛ ɔgana eyimɔmɔ mɛ, onupɛ bazã ɛlɛ abha nɛ tɛyɛyɛkɛŋã mɛ, tɛdɛdɛmɛ nɔ, ishu dadalɛ nɛ̀ ɛkpã zazãna gbangbã mɛ.