Timoteo 1 1 - Nyangbo New Testament

¹ Mɛ Paulo gidzi, Yesu Kristo yɛanɔkpɛkpɛ nɛ Owusoso Akaa gɛebu ɔlɔ yɛɔsha kɔkɔ nulũɔ nɛ̀ Yesu Kristoɔ gɛenu anɔ gɛ buɖi kidzo mɛ ɔkɔ,

² Mɛ sɛsɛ Timoteo mɛeyianyɛ gɛ akpasɛ tɛyɛyɛkɛŋã mɛ keplukpa alɛ, Tibhui bhuibu, ashagabui ɖiɖi nɛ̀ ishu yɔyɔ de Owusoso Akaa nɛ̀ Kristo Yesu bɔlɔ Apaleteɛ ɔkɔ.

Titsetseɖe Nɔ Nɛ Asɛnɛ Ɔshadɔkasɛ Shu

³ Asɛ kana gɛ ɛkpalà wɔ nɛ kibeɛ gɛ ɛvɛ Makedonia nɔ, zã Efesoɔ tɛ̀ ɔkpɛ ɔsha ɔkɔ banɔ nɔ teli, sɛ batɛ zakasɛ asɛnɛ bɔdɔ̃

⁴ alo tɛ̀ balɔkɔ ishu ashɔkpɛ asɛnɛ ebui nɛ̀ eshopo tɛshɔshɔrɔ gɛeti beleɛ mɛ. Ebui alɛ amana kawlɔ̃akɛ ebui ɔdɛ Owusoso Akaa kɛxɔ̃ɛ-gɛinu tɛyɛyɛkɛŋã.

⁵ Kɛgɛ kɛlɛishu bakpɛ ɔsha ɔlɛ kɛlɛinu tɛdɛdɛmɛ nɔ, gɛide kitúɔ gɛ dalɛ nɛ̀ ekpeɖekpeɖeɛ gɛ yɛmɛ adalɛ ɔplɛnɔ tɛyɛyɛkɛŋã gbangbã.

⁶ Beteli ashɛ nɛ ebui alɛ ede pɛ betsyina avɛ kaɖɔɖɔɖɔ gɛ kesi lulũ nanà ama kalɛishuɔ mɛ.

⁷ Bapɛ asɛ tɛ̀ bedzi ɔshadɔkasɛ, pɔ betinyi kɛnɔnɔ shu gɛ baɖɔaɖɔ alo kɛnɔnɔ abha gɛ batɔɖɔ kɛklagbuɔ.

⁸ Bunyi sɛ ɔsha pɛ gɛ onupɛ bawɔa ɔlɛ shu axɔ̃ɛ piapii.

⁹ Bunyi tsyɛ sɛ, bagɛ bhɛtɛ ɔsha akɔ banɔ dadalɛ pɔ babhɛtɛ ɔlɛ akɔ bagɛ betso ɔsha nɛ̀ batɔ̃mɛ gagalĩ eleteɛ. Bagɛ betinyi Owusoso Akaa nɛ̀ ebui kpa bhɛbhɛtɛ eleteɛ, bagɛ balɛishu gɛdalɛ nɛ̀ bagɛ batɛ akpɛ ketakpu esiɛ, lɔlɛ ɔkɔ bagɛ eyí balɛ akaalɛ alo balɛ elĩ alɛ, lɔlɛ ɔkɔ bagɛ eyi anɔ,

¹⁰ lɔlɛ ɔkɔ ɔmamɛ dɛdɛ elete, nɛ̀ bagɛ abhɛtɛ atsɔ̃buiɛ, lɔlɛ ɔkɔ bagɛ agã banɔ dzizì edziɛ, basɛnɛ elete nɛ̀ bagɛ betielũ atɔ̃ akɔ ɔsha-nɛ̀ kɛka nyia ka ɛdi gɛ kɛgã ɔtɔ nɛ bɔdɔ̃ kakasɛ gbangbã shuɔ

¹¹ ɔsha gɛ lɔbhɛtɛ tenikpo nɛ̀ Owusoso Akaa gɛ beyulà yɛibui gbangbã, kibui gɛ alɔkɔ akpɛ mahɔɛ mɛ.

Kibhuiɛ Gɛ Apaleteɛ Ebhui Paulo Ebu

¹² Ihu bɔlɔ Apalete Kristo Yesu ahɔɛ, anɔ gɛ yɛakɔ mɛ ohumi, pɛ ayɛkɛ mɛabha aŋã sɛ ɛtɛsɛ asɛnɛ, pɛ ebu mɛ akɔ yɛxɔ̃ɛ wɔawɔa.

¹³ Gɛ itidzì anɔ gɛ ɛbhɛtɛ ebusoebui eɖi, anɔ gɛ atɔnɔ banɔ ede nɛ̀ anɔ gɛ azabhɛtɛ agbagbà ebui tsyɛ elo, ebi mɛ ashagabui, ɔmɔsɛ ɛbhɛtɛ alɛ petee nɛ matì matì nɛ̀ mayɛkɛ mayɛkɛŋã mɛ.

¹⁴ Apaleteɛ akɔ mɛ yɛ tibhui bhuibuɔ nɛ tikpekpe mɛ, ɔlɔkɔ plɛnɔ tɛyɛyɛkɛŋã nɛ̀ tɛdɛdɛmɛ nɔ gɛ kɛkpasɛ Kristo Yesu mɛ.

¹⁵ Kɛlɛ kɛlɛinu kibui gbã tɛɖɔɖɔ gɛ kɛlɛ sɛ bayɛkɛ ɛlɛ sɛ, Kristo Yesu aba kanɔ nɔ̀ mɛ tɛ ebu ebui kpa bhɛbhɛtɛ eleteɛ, gɛ nɛ balɛishiɛ, mɛinu ezizĩɛ ɔdɛ.

¹⁶ Pɔ nɛ kibui ɛlɛ shu so pɛ beɖi mɛ ashagabui, sɛ tɛ nɛ mɛtakpuɔ, anɔ gɛezĩ adɛ nɛ ebui kpa bhɛbhɛtɛ elete nɛishi, tɛ̀ Kristo Yesu ebu yɛitu esi luluɔ gɛ ɛlɛ ɔtɔ̃kɔ ma akasɛ. Sɛ tɛ̀ bagɛ aba yɛkɛ yɛabha aŋã amɔ ɛkpã tihɔɔ.

¹⁷ Otsi nɔ, tɛ̀ Ekusiɛ gɛ abazã tihɔɔ nɔ, anɔ gɛ etibetsì eɖi, anɔ gɛ batɛamɔ yɛ, Owusoso Akaa gɛ yɛ ete, yɛ kɛlɛ sɛ balɔkɔ kɛtakpu esi kpɛkpɛ nɛ̀ ishu dadalɛ akɔ ɔvɛnɔ tihɔɔ mɛ. Amen.

¹⁸ Mɛeyianyɛ Timoteo, ɛkɔ wɔ ɔsha ɔlɛ sɛ tɛ ebuiɛ gɛ ebuiɖɔluanɔ aɖɔ nɛ wɔshuɔ aba alɛ mɛ, sɛ tɛ onupɛ ɔzã alɛ edeɛ, obodzi axɔ̃ɛ gbangbã wɔawɔa elete,

¹⁹ tɛ ɔnyana tɛyɛyɛkɛŋã mɛ ovunɔ nɛ ekpeɖekpeɖeɛ gɛ adalɛ mɛ. Beteli agɛ yɛkɛ ebui alɛ abha aŋã, klisoɔ balɛ tɛyɛyɛkɛŋã tsí.

²⁰ Balɛ mɛ beteli balɛenu Himenaio nɛ̀ Aleksandro, banɔ gɛ ɛlɔkɔ alɛ kpɛ ahɔɛ ɔkɔ Satana sɛ akasɛ alɛ ɔdɔ̃ asɛ batɛɖɔ ebusoebui.