Tesalonikanɛ 2 3 - Nyangbo New Testament

Owusoso Akaa Tikukulu Tibibisi

¹ Gɔgɔɛ nɔ, mɛadzya alɛ mɔ, nokulu Owusoso Akaa ɔkɔ ɔlɔ, sɛ tɛ Apaleteɛ nɛibuiɛ yì falanɔ nɛ tɛtsɛɖɛ bubu mɛ tɛ bakpɛ kɛtakpu esi akɔ ɛlɛ, asɛ kɛlɛ gɛ kɛlɛ wɔnɔ ɔkɔ ana.

² Klisoɔ nokulu Owusoso Akaa sɛ tɛ bebu ɔlɔ odenɔ atakpu mɛ gagalĩ elete nɛ̀ banɔ zizĩ ahɔɛ mɛ, ɔmɔsɛ gɛnɛ aka nyia aka yayɛkɛ aŋã.

³ Pɔ Apaleteɛ atɛasɛ asɛnɛ, abakpɛ wɔnɔ ohumi kɛlɛ ebebu wɔnɔ odenɔ anɔ kpa ahɔɛ mɛ.

⁴ Bɔyɛkɛ Apaleteɛ nabha ɔŋã sɛ notsiɖì ɛlɛ abha pɛ nɔbhɛtɛ, kɛlɛ nɔbɔ zã ɛlɛ abha ɔzɔbhɛtɛ ɔtɔɖɔ ɔsha gɛ bɔkpɛ kɔ wɔnɔ abha.

⁵ Nɔkɔ Apaleteɛ ashɔrɔ wɔnɔ etúɔ akpɛ tɛdɛdɛmɛ nɔ nɛ̀ Owusoso Akaa nɛ kemi kpɛkpɛ nɛ Kristo mɛ.

Titsetseɖe Nɔ Nɛ Kɛxɔ̃ɛ Mawɔa Mawɔa Shu

⁶ Mɛadzya alɛ mɔ, nɛ Apalete Yesu Kristo kinyeɛ mɛ, bɔɔkpɛ wɔnɔ ɔsha, sɛ nɔtɛ kpɛ ɔha nɛ adzya ka nyia ka gɛ edzi nɛ ahɔɛkpakpa pɛ atɛa zana ɛkpã nɛ bɔdɔ̃ kakasɛ gɛ nɔyɛkɛ odenɔ bɔlɔ ahɔɛ mɛ shu.

⁷ Ɔmɔsɛ nɔonyi katsɛɖɛ gɛ kɛlɛ sɛ nobu tɛ nɔgã nɛ bɔlɔ ebui bhɛbhɛtɛ nulũ. Bɔgɛ zã kɛxɔ̃ɛ mawɔa mawɔa nɛ kibeɛ gɛ bɔzã wɔnɔ ɔbha,

⁸ alo pɛ bɔŋã anɔ teli bɔdɔ̃ gɛ bɔgɛ buia bɔlɛ ɛbhɛ. Kibui ɛlɛ shu soɔ, bɔwɔa axɔ̃ɛ elishi nɛ̀ kemuze, kɛlɛ buuwu pɛ buuzhì nɛ bɔtɔ mɛ sɛ tɛ bɔtɛ badzi bɔtɔ ɔkɔ wɔnɔ mɛ anɔ nanà.

⁹ Kibui ɛlɛ gɛ bɔbhɛtɛ, kitinu sɛ gɛ bɔgɛ shɔnɔ sɛ bɔyɛkɛ tɛpɛplɛ nɔ ɛlɛ nɛidi denɔ wɔnɔ ɔkɔ so, pɔ sɛ tɛ bɔbhɛtɛ kasɛ wɔnɔ tɛ nɔgã nɛ ɛlɛ shu.

¹⁰ Gɛ bɔzã wɔnɔ ɔbha tsyɛ elo, bɔkɔ wɔnɔ ɔsha ɔlɛ sɛ, “Onupɛ anɔ atɛba wɔa kɛxɔ̃ɛ, atɛŋã bɔdɔ̃ tsyɛ.”

¹¹ Bulũ sɛ banɔ teli nɛ wɔnɔɛishi bedzi nɛ ahɔɛ kpakpa. Batɛ adɛmɛ kɛxɔ̃ɛ wɔawɔa ɛbui, pɔ olugbũ kedzi ete bagã.

¹² Banɔ alɛ nɛidi bɔkɔ ɔsha pɛ bɔkpalà alɛ nɛ Apalete Yesu mɛ sɛ bapɛ ɔkɔ toli azã tɛ bawɔa kɛxɔ̃ɛ tɛ baŋã ɔdɔ̃.

¹³ Pɔ mɛadzya alɛ mɔ, wɔnɔ xɔnɔ, nɔtɛ mɔ ɔtɔ odenɔ kibui gbangbã tɛbhɛbhɛtɛ mɛ.

¹⁴ Onupɛ anɔ teli agɛ bhɛtɛ atɔɖɔ bɔlɔ ɔsha kpɛkpɛ ɔlɛ nabha nɛ keplukpa alɛ mɛɛ, nɔolú awɔ̃ oɖi piapii. Nɔtɔ kpɛ yɛɔha, sɛ tɛ kiwũi yii.

¹⁵ Pɔ nɔtɛ lɔkɔ yɛasɛ anɔ gɛ nɔtɔɖɔ olú ana, pɔ notseɖe nii asɛ adzya ana.

Tɛsɛsɛnɔ Piapii Tili Idi

¹⁶ Nɔkɔ ishu yɔyɔ Apaleteɛ, akɔ wɔnɔ ishu yɔyɔ kibe nyia be nɛidzo ka nyia ka abha. Apaleteɛ azã aplɛnɔ wɔnɔ petee.

¹⁷ Mɛ, Paulo mɛfɔnɔ ɔsɛsɛnɔ ɔlɛ nɛ̀ mɛahɔɛ, gɛ kenu mɛeplukpa gɛ kagã ɔtɔ nɛ mɛ buplukpa petee nɛishi. Tɛ̀ nɔmɔ ɔsɛ mɛahɔɛ bɔdɔ̃ fɔfɔnɔ nɔlɛ.

¹⁸ Tɛ̀ bɔlɔ Apalete Yesu Kristo tibhui bhuibuɔ zã ɔplɛnɔ wɔnɔ petee.