Tesalonikanɛ 2 2 - Nyangbo New Testament

Anɔ Gɛenu Kɛtakpumɛ Gagalĩ Eleteɛ

¹ Nɛ Apalete Yesu tɛbaba nɛ̀ bɔlɔ tishoshogò nɛ̀ yɛishuɔ, bubisi wɔnɔ, badzya,

² sɛ tɛ nɔtɛkɔ ɔwɔ̃nyɔnɔ kibui ɖɔlù, bulũ bhui bhui, alo keplukpa tieli gɛ basɛ kede bɔlɔkɔ pɛ kaɖɔ sɛ Apaleteɛ nɛiwuiɛ tɛba kukuku.

³ Nɔtɛkɔ anɔ nanà awɔɛ wɔnɔ ɔganà kidzo nanà abha, ɔmɔsɛ flogo tɛ kiwui ɛlɛ baà, kɛlɛ sɛ kititì lɔlɔ putɔ, kɛlɛ bebebu Satana akasɛ, anunɔ gɛ batɔɖɔ butsi elu akɔ.

⁴ Anɔ alɛ aba lɔɛtití kɛlɛ ebe feke yɛishu nɛ kɛka nyia ka gɛ bekulu sɛ Owusoso Akaa alo pɛ bakpɛ kɛtakpu esi akɔ shu, sɛ tɛ edidzu yɛishu nɛ Owusoso Akaa uvũɔ mɛ asɛ yɛenu Owusoso Akaa.

⁵ Nɔgɛ baka sɛ gɛ ɛzã wɔnɔ ɔbhaa, izitseɖe wɔnɔ ebui alɛ dza?

⁶ Kɛlɛ otsi alɛ nɔonyi kɛgɛ kɔ yɛawɔ ideɛ, sɛ tɛ bebebu yɛakasɛ nɛ kibè gbangbã nabha.

⁷ Ɔmɔsɛ Satana tikpukpũ mɛ ohumi nɔ gɛonu ɔsha abha mabhɛtɛ mabhɛtɛ lɔtɛ kpɛ ɔlɛ axɔ̃ɛ esi, pɔ anunɔ gɛedzu ahɔɛ nɛ yɛabha abazã ɛlɛ bha vɛnɔ odiyinɔ sɛ bebu yɛeyinɔ nɛidzoɔ ɛlɛ nabha.

⁸ Kɛlɛ bebèbu kɛtakpu mɛ gagalĩ eleteɛ akasɛ, anunɔ gɛ Apalete Yesu abalɔkɔ yɛolugbũ mɛ ɛlɛɛ́ nɔ atsɛ yɛ atɛɛ niegbu nabha kɛlɛ abalɔkɔ yɛ titsetséɛ nɛ yɛ tɛbaba mɛ eyii nɔ.

⁹ Kɛtakpumɛ gagalĩ eleteɛ tɛbaba bashɔnɔ Satana axɔ̃ɛ wɔawɔa gɛ bebu akasɛ nɛ asɛnɛ atsyindzye ebui, bɔdɔ̃ bubu kasɛ nɛ̀ ebui gɛ abhɛtɛ ibi mɛ,

¹⁰ nɛ ebui kpa ka nyia ka ɛdi gɛ lawɔɛ bagɛ ayalaa. Bayala ɔmɔsɛ bagɛ dɛmɛ kibuiɛ gɛlɛ ɛlɛ ɔzãkɔ nɛibui sɛ tɛ bebu alɛ.

¹¹ Kibui ɛlɛ shu soɔ Owusoso Akaa asɛsɛ alɛ asɛnɛ ohumi sɛ tɛ bayɛkɛ asɛnɛ nabha ŋã

¹² sɛ tɛ bebù bagɛ agɛ yɛkɛ kibui gbã nabha ŋã nɛpɔ, pɛ kɛtakpu mɛ gagalĩ ebui bhɛbhɛtɛ eku alɛ same.

Nɔnyanà Ebuiɛ Mɛ Ovunɔ Gagalĩi

¹³ Pɔ badzya gɛ Apaleteɛ adɛmɛ nɔ, kɛlɛ sɛ buzi hu Owusoso Akaa ahɔɛ kiwui nyia wui nɛ wɔnɔ ɛtakpu, ɔmɔsɛ denɔ kesikpɛkpɛ mɛibeɛ, Owusoso Akaa ebu wɔnɔ elú ɔgana ɔfɔfuĩa nɔ nɛ̀ ɔlɛ axɔ̃ɛ dadalɛ wɔawɔa mɛ, nɛ̀ ɔganà kibui gbã tɛyɛyɛkɛŋã mɛ.

¹⁴ Ekulu wɔnɔ akpɛ kɛxɔ̃ɛ ɛlɛ mɛ ɔgana kibui gbangbã mɛ, sɛ tɛ nɔmɔ tɛdadalɛ gɛ kpasɛ ɔlɔ Apalete Yesu Kristoɔ mɛ.

¹⁵ Klisoɔ, mɛadzya alɛ mɔ, nɔzã gagalĩi nɛ bɔdɔ̃ kakasɛ gɛ bɔlɔkɔ kpɛ wɔnɔ ahɔɛ mɛ, onupɛ kizidzì olugbũ mɛibui alo keplukpa fɔfɔnɔ mɛ tsyɛ.

¹⁶ Tɛ bɔlɔ Apalete Yesu Kristoɔ, nɛ̀ Owusoso Akaa, anɔ gɛ adɛmɛ nɛ ɔlɔ pɛ nɛ yɛ tibhui bhuibuɔ mɛɛ, akɔ ɔlɔ kemikpɛkpɛ tihɔɔ ɔkɔ kidzo gbangbã mɛ tiɖiɖiɛ,

¹⁷ abakpɛ wɔnɔ kitúɔ niemi pɛ abakɔ wɔnɔ ohumi nɛ kɛxɔ̃ɛ gbangbã ka nyia ka wɔawɔa nɛ kibuiɛ mɛ.