Tesalonikanɛ 2 1 - Nyangbo New Testament

¹ Paulo, Silvano Nɛ̀ Timoteo, bɔlɔ sɛsɛ ɔhaa nɛ Tesalonika gɛ akpasɛ Owusoso Akaa gɛenu bɔlɔ Akaa nɛ̀ Apalete Yesu Kristo mɛ keplukpa alɛ,

² Tibhui bhuibu nɛ̀ ishu yɔyɔ ɔkɔ wɔnɔ odenɔ Owusoso Akaa nɛ̀ bɔlɔ Apalete Yesu Kristo ɔkɔ.

Ahɔɛhuhu Nɛ̀ Owusoso Akaa Tikukulu

³ Mɛadzya alɛ mɔ, kɛlɛ sɛ tɛ buhu Owusoso Akaa ahɔɛ kibe nyia be ɔkɔ wɔnɔ, kɛpɛ ana, ɔmɔsɛ gɛ wɔnɔ tɛyɛyɛkɛŋã kpe tɔɖɔ soɔ, tɛdɛdɛmɛ nɔ gɛ kpasɛ wɔnɔ mɛ ɔkɔ bagɔlɔ tsyɛ kpe tɔɖɔ.

⁴ Klisoɔ, nɛ Owusoso Akaa ɔhaa nɛishiɛ, butũ ahɔɛ nɛitélũ nɛ kana gɛ nɔkpɛ kemi nɛ wɔnɔ tɛyɛyɛkɛŋã, kede tɛtɔtɔnɔ nɛ̀ tifefekeɖiɛ gɛ nɔkpɛ emi ɔkɔ.

⁵ Alɛ pete ebu akasɛ asɛ Owusoso Akaa kebhu kukuluɔ alɛ kalɛ ɔzãkɔ, kɛlɛ nɛ kibui ɛlɛ shu soɔ, babà kalà wɔnɔ asɛ banɔ gɛ ɔna ɔkɔ Owusoso Akaa bukusi ɔŋãkɔɔ, gɛ bɔlɛ shu nɔmɔ bɔtɔ ɔlɛ.

⁶ Owusoso Akaa atɛasɛ asɛnɛ, aba buia bɔtɔ ɛbhɛ akɔ bagɛ bakpɛ wɔnɔ buluhũɔ

⁷ kɛlɛ abakɔ wɔnɔ bagɛ bakpɛ buluhũɔ emoelè, kana bɔlɔ tsyɛ. Kibui ɛlɛ babà ɛlɛ mɛ gɛ onupɛ Apalete Yesu ekoeyì denɔ kititíɛ nɛ kifu gɛtã ɔplɛnɔ yɛ ohumi axɔ̃ɛdɛ.

⁸ Abapɔ̃ batɔ̃ akɔ bagɛ betinyi Owusoso Akaa pɛ batɛ abhɛtɛ atɔɖɔ kibui gbangbã gɛide Apalete Yesu ɔkɔ nabha.

⁹ Babà pɔ̃ atɔ akɔ alɛ nɛ̀ butsi tihɔɔ kɛlɛ abàdã kidzo akpɛ alɛ nɛ Apaleteɛ nɛ̀ yɛ bukusiŋaŋã ohumi namɛ

¹⁰ nɛ kiwui ɛlɛ nabha gɛ ababaa sɛ tɛ badalɛ yɛishu nɛ yɛ banɔ dadalɛ nɛishiɛ, nɛ̀ tɛ yɛibui bhɛtɛ bagɛ ayɛkɛ yɛabha ŋã pete nɛibì. Wɔnɔ tsyɛ ɔkpasɛ ɛlɛ mɛ, ɔmɔsɛ nɔyɛkɛ kibuiɛ gɛ bɔmɔlú pɛ butseɖe wɔnɔ nabha ɔŋã.

¹¹ Gɛ kibui ɛlɛ kpasɛ bɔlɔ ekpeɖekpeɖeɛ mɛ soɔ, bukulu Owusoso Akaa nɛ wɔnɔ ɛtakpu kibè nyia bè, sɛ tɛ̀ bɔlɔ Owusoso Akaa ayɛkɛ wɔnɔ asɛ nɔna ɔkɔ yɛ tikukuluɔ, kɛlɛ nɛ yɛ ohumi nulũɔ, ababhɛtɛ tɔɖɔ wɔnɔ ebui gbangbã tɔtɔɖɔ nɛ̀ katsɛɖɛ bubu ka nyia ka gɛ wɔnɔ tɛyɛyɛkɛŋã kɔ nobuɔ nabha.

¹² Buukulù Owusoso Akaa nɛ kibui ɛlɛ ɛtakpu sɛ tɛ̀ badalɛ Apaleteɛ Yesu kinye nɛ wɔnɔ mɛ, kɛlɛ wɔnɔ tsyɛ nɛ yɛ mɛ, nɛ kibhuiɛ gɛ bɔlɔ Owusoso Akaa nɛ̀ Apalete Yesu Kristo ebhui bɔlɔ buɔ nulũ.