Tesalonikanɛ 1 5 - Nyangbo New Testament

¹ Mɛ adzya alɛ mɔ, otsi alɛ, nɛ kiwuiɛ nɛ̀ kibeɛ shuɔ, anɛ ibui kinu sɛ tɛ bɔfɔnɔ sɛsɛ wɔnɔ,

² ɔmɔsɛ nonyi piapii ɔsɛ Apaleteɛ nɛewuiɛ labatɔnɔ wɔnɔ asɛ kɛba gɛ ezĩ aba elishi ana.

³ Gɛ banɔ aɖɔ asɛ, “Ishuyɔyɔ nɛ̀ tɛzazã piapii,” kizizĩ babà alɛ abha nɛ matì matì mɛ, asɛ kɛtã gɛ ɛya tã ayamunu ana, kɛlɛ batɛ balà ebu tɛtsɛɖɛ mɛ nɛ kɛlɛ ulũ.

⁴ Pɔ mɛadzya alɛ, nɔma otumũ mɛ̀ ɔsɛ tɛ kiwui ɛlɛ̀ babhɛtɛ wɔnɔ asɛ ezĩ tɛbaba ana.

⁵ Wɔnɔ petee onu beyi nɛ ɔdadalɛ ɔkɔ nɛ̀ beyi nɛ kiwui mɛ.

⁶ Klisoɔ, nɔtɛkɔ bɔzã asɛ bagɔgɔ̃ gɛ adɔ taɖa, pɔ nɔkɔ bɔzã nɛ awɔ̃ tɛ bɔnyana ishu ovunɔ.

⁷ Ɔmɔsɛ bagɛ apɛ asɛ adɔ taɖa, badɔ tɛlɛ elishi, kɛlɛ bagɛ awɔɛ ebukuɔ tsyɛ awɔ̃ɛ ebuku elishi.

⁸ Pɔ gɛ bɔlɛ kɔ kelizaza soɔ, nɔkɔ bɔnyana ishu vunɔ, tɛ bɔkpɛ tɛyɛyɛkɛŋã nɛ tɛdɛdɛmɛ nɔ asɛ kitelũ ɔɖa akpɛkpɛ ana, tɛ bukumũ kidzo mɛ ɖiɖi ɔkɔ tibubu asɛ kikutu ana.

⁹ Ɔmɔsɛ Owusoso Akaa egi bu ɔlɔ asɛ tɛ bɔtɔ nɛ ɔmɔpɔɛ esi, pɔ tɛ bɔyɛkɛ tibubu ɔgana Apalete Yesu Kristo abha.

¹⁰ Etsi akɔ ɔlɔ, sɛ tɛ edzi asɛ budzi nɛ̀ awɔ̃ alo bɔdɔ̃ taɖa tsyɛ elo, bɔba zã ɛkpã plɛni.

¹¹ Klisoɔ, nɔkpɛ bagɔlɔ kemi tɛ nɔbhɔ bagɔlɔ owunɔ, asɛ kɛbhɛtɛ gɛ nɔbhɛtɛ ɛlɛ ana.

Ɔshakɔkɔ Gɔgɔɛ

¹² Bɔlɔ adzya alɛ mɔ, otsiɛ alɛ bubisi denɔ wɔnɔ ɔkɔ ɔsɛ tɛ, nozhinɔ ishu esi ɔkɔ bagɛ awɔa axɔ̃ɛ gagalĩ nɛ wɔnɔɛshi, pɛ bagbanà nɔ nɛ Apalete nɛinye mɛ pɛ behu buluhũ akɔ ɔnɔ.

¹³ Nɔkpɛ ɛtakpu esi ɔkɔ alɛ tɛ nɔdɛmɛ nɔ alɛ piapii nɛ balɛ axɔ̃ɛ wɔawɔa shu so. Nɔzã ishu yɔyɔ mɛ nɛ bagɔlɔ.

¹⁴ Bɔlɔ adzya alɛ mɔ, bɔkpalà ɔnɔ sɛ tɛ notseɖe nɔ nɛ̀ bagɛ benu banɔ zhɔzhɔrɛ, nɔkpɛ bagɛ kitu bhui balɛ ohuiɛ kemi, nɔplɛnɔ bagɛ ebotsoɔ, tɛ̀ nɔdɔ fɔ̃ɔ ɔkɔ anɔ ka nyia ka.

¹⁵ Noɖi kɛlɛ ɔkɔ sɛ ananà agɛ lɔkɔ kibui kpa abuia kɛbhɛ akɔ kibui kpa nɔ, pɔ nɔkpɛ kemi ɔsɛ nɔbhɛtɛ ɛyamɛ gbangbã ɔkɔ bagɔlɔ nɛ aka nyia aka tsyɛ.

¹⁶ Nɔmɔ samɛ kibe nyia be,

¹⁷ Nɔzã kɛlɛ abha tɛ nokulu Owusoso Akaa,

¹⁸ Nɔohu ahɔɛ nɛ ebui ka nyia ka mɛ, ɔmɔsɛ kɛlɛinu Owusoso Akaa tɛpɛpɛɛ ɔkɔ wɔnɔ nɛ Kristo Yesu mɛ.

¹⁹ Notilĩ Ɔfɔfuĩa nɛifúɔ,

²⁰ nɔtɛ lɔkɔ ebuiɖɔlu ebuiɛ wɔ ufù nɔ.

²¹ Nɔlũ awɔ̃ oɖi kɛka nyia ka piapii. Nɔnyana kɛgɛ pɛ̃ɛ ovunɔ.

²² Nɔshɛnɛ ahɔɛ nɛ kibui kpa ka nyia ka shu.

²³ Owusoso Akaa, yɛahɔɛ ishu yɔyɔ, dalɛ wɔnɔ shu tɛ̀ edzinɔ adalɛ. Tɛ̀ Wɔnɔ ɔfɔfuĩa nɔ petee, kɛtɔwuiɛ nɛ̀ ishudzyaa zã kɛpɔ mabu mabu nɛ Apalete Yesu Kristo tɛbabaa shu.

²⁴ Anunɔ gɛ ekulu wɔnɔ enu kibui gbã ɖɔɖɔ elete, kɛlɛ ababhɛtɛ ɛlɛ abha.

²⁵ Bɔlɔ adzya alɛ mɔ, nokulu Owusoso Akaa ɔkɔ ɔlɔ.

²⁶ Nɔsɛnɔ baadzya petee nɛ̀ ahɔɛ kpɛkpɛ dadalɛ nɛ balɛ olí.

²⁷ Ɛlɔkɔ ɛlɛ kpɛ̀ wɔnɔ ahɔɛ nɛ Apaleteɛ inye mɛ sɛ̀ tɛ̀ nɔkalà keplukpa alɛ ɔkɔ badzya petee.

²⁸ Apalete Yesu Kristo tibhui bhuibuɔ zã plɛnɔ wɔnɔ.