Tesalonikanɛ 1 4 - Nyangbo New Testament

Ɛkpã Zazãna Gɛ Shɔnɔ Owusoso Akaa

¹ Otsi alɛ mɛ adzya alɛ mɔ, bɔkɔ wɔnɔ ɔsha nɛ kana gɛ nɔbɔzã nɛ̀ ɛkpã pɛ lɛba shɔnɔ Owusoso Akaa, asɛ ɛkpã gɛ nodzinɔ. Otsi nɔ bubisi denɔ wɔnɔ ahɔɛ mɛ kɛlɛ bɔkpalà wɔnɔ nɛ Apaleteɛ Yesu mɛ tɛ nɔbhɛtɛ kana odzinɔ bhɛtɛ.

² Ɔmɔsɛ nonyi ɔsha gɛ bɔkpɛ kɔ wɔnɔ gana Apalete Yesu ohumi nabha.

³ Kinu Owusoso Akaa tɛpɛpɛ sɛ tɛ wɔnɔ shu dalɛ, sɛ tɛ nɔyɔlɔ ɔmamɛdɛdɛ,

⁴ sɛ tɛ wɔnɔ mɛ aka nyia aka akpasɛ kana gɛ aba nyanà yɛishu evunɔ, nɛ kidzo dadalɛ

⁵ gɛnɛ sɛ tɛ tɛwɔwɔsɔ̃ nɛ̀ bagɔlɔ zɛlɔ̀ nɛ wɔnɔ shu mɛ asɛ bagɛ bakpɛ kɛtakpu esi akɔ ibudi gɛ betinyi Owusoso Akaa,

⁶ kɛlɛ nɛ kibui lɛ mɛ, ananà atɛ bhɛtɛ kibui kpa nɛ yɛelé shu alo tɛ efeke yɛeɖi. Apaleteɛ abapɔ batɔ akɔ banɔ nɛ ebui kpa alɛ nɛidi shu, asɛ gɛ buti tseɖe wɔnɔ ɔbɔfalanɔ pɛ itseɖe nɛ wɔnɔ.

⁷ Ɔmɔsɛ Owusoso Akaa egi kulu bɔlɔ asɛ bututru shu, pɔ tɛ bɔza nɛ ɛkpã gɛ ɛlɛ shu dalɛ.

⁸ Klisoɔ, anunɔ gɛ agɛ yɛkɛ ɔsha kɔkɔ ɔlɛ gɛnɛ anɔ yagɛ yɛkɛ pɔ Owusoso Akaa, gɛ akɔ wɔnɔ Ɔfɔfuĩa Gbangbã.

⁹ Otsi nɛ adzya tɛdɛdɛmɛ nɔ shuɔ, kɛga shɔnɔ ɔsɛ bɔfɔnɔ kɔ wɔnɔ, ɔmɔsɛ Owusoso Akaa atɛ kasɛ wɔnɔ sɛ nɔdɛmɛ nɛ bagɔlɔ.

¹⁰ Kɛlɛ nɛ kibui gbã mɛɛ, nɔdɛmɛ nɛ baadzya petee nɛ Makedonia. Mɛ adzya alɛ, pɔ bɔkà kpalà wɔnɔ sɛ tɛ nɔbhɛtɛ kana odzi nɔ bhɛtɛ.

¹¹ Nɔlɔkɔ kɛlɛ ɔtɔɖɔ ishu abha sɛ tɛ nɔzãnà ɛkpã yɔyɔ, tɛ noɖi wɔnɔ kɛxɔ̃ɛ ɔkɔ tɛ nɔwɔa axɔ̃ɛ nɛ wɔnɔ ɛhɔɛɛ, asɛ kana gɛ butseɖe wɔnɔ,

¹² sɛ tɛ kɛkɔ sɛ wɔnɔ kibe nyia be ɛkpã zazãna sɛ tɛ bagɛ etinu Kristoanɛ bamɔ wɔnɔ tɛpɛpɛ, tɛ nɔtɛ zã ananà yɛabha.

Apaleteɛ Tɛbaba

¹³ Mɛ adzya alɛ mɔ, bɔpɛ ɔsɛ tɛ̀ notì kibui nɛ bagɛ etsiɛ shu, alo tɛ nɔmɔ ɔwɔ̃nyɔnɔ asɛ banɔ gɔgɔɛ nɔ, gɛ betieɖi kidzo mɛ akɔ kibui nanà.

¹⁴ Bɔyɛkɛ ŋã sɛ Yesu etsi kɛlɛ azalɔ, klisoɔ bɔyɛkɛŋã ɔsɛ Owusoso Akaa aba nyɛmɛ bagɛ betsi nɛ Yesu mɛɛ aplɛnɔ yɛ.

¹⁵ Nɛ Apaleteɛ kibuiɛ gɛ aɖɔ mɛɛ, butseɖe wɔnɔ ɔsɛ bɔlɔ bagɛ bɔkà lɛ nɛ ɛkpãa, pɛ bɔlɛ odi yinɔ Apaleteɛ tɛbabaa, bɔtɛbà putɔ ɔkɔ bagɛ etitsíɛ.

¹⁶ Ɔmɔsɛ Apaleteɛ ebezhi aba odenɔ kititiɛ, nɛ ɔsha kɔkɔ nɛ̀ ozĩ, nɛ axɔ̃ɛdɛ gɛeɖi ulugbũ nyanyã aɖaka nɔ nabha yɛozĩ kpɛkpɛ, nɛ Owusoso Akaa kexoele nɔ gɛ ebe kulu banɔ nɔ, kɛlɛ́ bagɛ etitsí nɛ Kristo mɛɛ bebè putɔ alɔ.

¹⁷ Nɛ kɛlɛ́ niedeɛ, bɔlɔ bagɛ kalɛ nɛ̀ ɛkpã bebè feke ɔlɔ ewunɔ kitsù nɛ alɛ nɛ ɔmɔlɔ nɔ mɛ tɛ̀ bɔtsyanà Apaleteɛ nɛ kɛlɛ́ɛ nɔ mɛ. Klisoɔ, bɔbaza plɛnɔ Apaleteɛ tihɔɔ.

¹⁸ Klisoɔ nɔkpɛ bagɔlɔ kemi nɛ̀ ebui alɛ.