Tesalonikanɛ 1 3 - Nyangbo New Testament

¹ So gɛ bɔzalà kɛlɛ ulũ zãa, bɔbhɛtɛ ekpeɖekpeɖe mɛ sɛ tɛ bɔlɔ ete zã Atene.

² Bɔsɛsɛ Timoteo, gɛenu bɔlɔ adzya nɛ̀ Owusoso Akaa axɔ̃ɛwɔa ɔkɔ Kristo yɛibuiɛ tɛkakanà, sɛ tɛ akpɛ wɔnɔ ohumi nɛ̀ tɛ̀ akpɛ wɔnɔ kemi nɛ wɔnɔ tɛyɛyɛkɛŋã mɛ,

³ sɛ tɛ ananà atɛba mɔ ɔwɔ̃nyɔnɔ denɔ tifefekeɖi lɛ mɛ. Ɔmɔsɛ nonyi piapii ɔsɛ babhɛtɛ bɔlɔ ɔkɔ tifefekeɖi ebui alɛ.

⁴ Kibui gbã, kibeɛ gɛ bɔzã wɔnɔ ɔbhaa, buzi tseɖe wɔnɔ ɔsɛ babatɔnɔ bɔlɔ kede. Kɛlɛ kɛba ɛlɛ mɛ anà, asɛ gɛ nɔonyi piapii nɔ.

⁵ Nɛ kibui ɛlɛshu, gɛ ɛzaka là zã kɛlɛ ulũ soɔ, ɛkpɛ banɔ sɛ tɛ̀ milũ wɔnɔ tɛyɛyɛkɛŋã shu ebuiɛ. Kifu ziyi mɛ sɛ nɛ kidzo tili abhaa, Satana gɛ efeke banɔ eɖiɛ ebe feke wɔnɔ kɛlɛ bɔlɔ katsɛɖɛ bubuɔ abawɔ kɛlɛ́ɛ mɛ.

Timoteo Ohumi kpɛkpɛ Gɛ Amana

⁶ Pɔ otsi ko Timoteo ede wɔnɔ ɔkɔ aba bɔlɔ ɔbha, kɛlɛ amana bɔlɔ ɔklasɔ̃ gbangbã nɛ wɔnɔ tɛyɛyɛkɛŋã nɛ̀ tɛdɛdɛmɛ nɔ shu. Etseɖe bɔlɔ asɛ nɔkɔ baka ebui gbangbã nɛ bɔlɔ shu kɛlɛ nɔpɛ ɔsɛ tɛ nɔmɔ bɔlɔ, asɛ kana gɛ bɔlɔ tsyɛ pɛ sɛ tɛ bɔmɔ wɔnɔ ana.

⁷ Klisoɔ, mɛ adzya alɛ mɔ, nɛ bɔlɔ ɔwɔ̃nyɔnɔ nɛ kede tɛtɔtɔnɔ pete mɛɛ, nɔzɔkpɛ bɔlɔ kemì nɛ wɔnɔ tɛyɛyɛkɛŋã shu.

⁸ Otsiɛ nɔ bɔlɛ nɛkpã gɛ nodzi gagalĩ nɛ Apaleteɛ mɛ so.

⁹ Kɛlɛ́ bɔbà là hu Owusoso Akaa nɛahɔɛ nɛ wɔnɔ kɛtakpu ɔlɔkɔ plɛnɔ sameɛ gɛ nɔkpɛ ɔlɔ nɛ Owusoso Akaa namɛ dza?

¹⁰ Elishi nɛ̀ kemuze bukulu Owusoso Akaa gagalĩi sɛ tɛ̀ buwlui mɔ wɔnɔ sɛ tɛ bɔkɔ wɔnɔ kɛgɛ ma wɔnɔ ahɔɛ nɛ tɛyɛyɛkɛŋã mɛ.

¹¹ Otsiɛ nɔ tɛ̀ bɔlɔ Owusoso Akaa gɛenu Akaa nɛ̀ bɔlɔ Apalete Yesu adalɛ kidzoɔ mɛ akɔ ɔlɔ sɛ tɛ bɔbà wɔnɔ ɔbha.

¹² Tɛ̀ Apaleteɛ akɔ wɔnɔ tɛdɛdɛmɛ nɔ wlui kpè tɔɖɔ tɛ kiyuku balɛ̀ ɔkɔ bagɔlɔ nɛ̀ anɔ nyia anɔ tsyɛ, asɛ gɛ bɔlɔ ɛyɛ bhɛtɛ kɔ wɔnɔ.

¹³ Tɛ̀ Yesu akpɛ wɔnɔ etúɔ ohumi sɛ tɛ betibu wɔnɔɛpɔ tɛ wɔnɔ shu dalɛ nɛ Owusoso Akaa namɛ gɛ onupɛ bɔlɔ Apalete Yesu aba nɛ yɛ̀ banɔ dadalɛ petee.