Tesalonikanɛ 1 2 - Nyangbo New Testament

Paulo Axɔ̃ɛ Wɔawɔa Nɛ Tesalonika

¹ Mɛadzya alɛ, nɔonyi ɔsɛ wɔnɔ ɔkɔ tɛbaba dzi kibui gɛ shɔ̃.

² Bɔtɛ mɔ bɔtɔ bafalanɔ pɛ bazakwala bɔlɔ nɛ Filipi, asɛ gɛ nonyi ana, pɔ nɛ bɔlɔ Owusoso Akaa anɔ tɛpɛplɛnɔ mɛɛ, bɔkpɛ kité pɛ ɖɔ yɛibuiɛ tseɖe wɔnɔ nɛ kititì lɔlɔ gagalĩ ɛlɛ mɛ tsyɛ.

³ Ɔmɔsɛ tibibisiɛ gɛ bubisiɛ gɛide kesitata alo ekpeɖekpeɖeɛ gɛ yɛishuɔ gɛ dalɛ mɛ alo sɛ tɛ bɔwɔɛ wɔnɔ.

⁴ Nɛ kidzo bhlatɔ abhaa, bɔɖɔ kaɖɔ asɛ banyɛ gɛ Owusoso Akaa atɔɖɔ ahɔɛ nɛ bɔlɔ abha pɛ alɔkɔ yɛibuiɛ akpɛ bɔlɔ ahɔɛ. Bɔtɛ pɛɛ sɛ tɛ buku banɔdzyrame awɔ̃ pɔ Owusoso Akaa boŋ gɛ efeke bɔlɔ etúɔ mɛ eɖiɛ.

⁵ Nɔonyi ɔsɛ bɔtɛ ɖɔ olugbũ mɛ dzyɛdzyɛ ebui, alo pɛ bukumu bɔdɔ̃ nɛ bamɛ asɛ tɛ bukpũ bɔlɔ ishu tɛpɛpɛ̃ɛ, Owusoso Akaa yɛenu agɛ yɛamɔ ebuiɛ aplɛnɔ bɔlɔ.

⁶ Gɛnɛ banɔ tɛkpɛkpɛ nɛitití bɔpɛ odenɔ banɔ ɔkɔ, bɔtɛ pɛ ana odenɔ wɔnɔ, alo anɔ nanà tsyɛ ɔkɔ. Asɛ banɔkpɛkpɛ ana, tsyɛ alo bɔtadzì bɔtɔ kɔ wɔnɔ,

⁷ pɔ budzi banɔ yɔyɔ nɛ wɔnɔɛshi, asɛ kana gɛ eyielĩ eɖi yɛeyi alɛ abha ana.

⁸ Bɔdɛmɛ wɔnɔɛbui popoopo, klisoɔ bɔmɔ same nɛ wɔnɔ sɛ anɛ Owusoso Akaa ɛbuiɛ ete bɔmana wɔnɔ pɔ tɛ nɔkpasɛ bɔlɔ ɛkpã zazãna tsyɛ, ɔmɔsɛ wɔnɔɛbui baku bɔlɔ awɔ.

⁹ Mɛ adzya alɛ mɔ, kibui gbã, bɔtɔ nɛ ɛkpã zazãna gɛ gagalĩ ɔkɔ bɔlɔ, bɔwɔa axɔ̃ɛ elishi nɛ̀ kemuze sɛ tɛ butidzi bɔtɔ ɔkɔ ananà gɛ onupɛ bɔɖɔ Owusoso Akaa kibuiɛ tseɖe wɔnɔ.

¹⁰ Wɔnɔ onu bagɛ bazã pɛ bamɔ ebuiɛ alɛ, kana Owusoso Akaa tsyɛ, nɛ̀ kana gɛ bɔlɔ ishuɔ dalɛ, kibui gbangbã nɛ kɛpɔ maŋã maŋã gɛ bɔzã wɔnɔ bagɛ nɔyɛkɛŋã nɛishi.

¹¹ Ɔmɔsɛ nonyi kana gɛ bɔnyana wɔnɔ mɛ aka nyia aka vunɔ asɛ kana gɛ eyiaka abhɛtɛ̀ yɛeyi alɛ ana,

¹² pɛ bɔkpɛ wɔnɔ kemi, bɔyɔ wɔnɔ ishuɔ mɛ̀ pɛ bɔkpalà wɔnɔ ɔsɛ tɛ nɔza nɛ̀ ɛkpã gɛ pɛ ɔkɔ Owusoso Akaa, anɔ gɛ yɛekulu wɔnɔ ɔkpɛ yɛ bukusiŋaŋã nɛ̀ tɛdadalɛ mɛ.

¹³ Kɛlɛ butsiɖi ɛlɛ abha hu Owusoso Akaa ahɔɛ kibe nyia be, ɔmɔsɛ gɛ nɔyɛkɛ Owusoso Akaa nɛibuiɛ, kibuiɛ gɛ nolũ odenɔ bɔlɔ ɔkɔɔ, nɔgɛ yɛkɛ ɛlɛ asɛ banɔdzyrame ɛbui kinu, pɔ asɛ kana gɛ kɛlɛ nulũ, Owusoso Akaa nɛibuiɛ gɛ ɛwɔa kɛxɔ̃ɛ nɛ wɔnɔ bagɛ nɔyɛkɛŋã mɛ.

¹⁴ Mɛ adzya alɛ, ɔmɔsɛ wɔnɔ obodzì banɔ gɛ bagã nɛ Owusoso Akaa ɔhaa nɛ Yudea gɛ akpasɛ Yesu Kristo mɛ. Nɔtɔ odenɔ wɔnɔ ahɔɛ kesiakpa abha anɔ nɔ̀ tɛhɔɛ mɛ, bɔtɔ lɛ nɛidi ɔha alɛ tsyɛ amɔ denɔ Yudanɛ ahɔɛ mɛ,

¹⁵ banɔ gɛeyí Apalete Yesu nɛ̀ ebuiɖɔluanɔ nɔ kɛlɛ baza kakà bɔlɔ tsyɛ eyinɔ. Begiku Owusoso Akaa nawɔ̃ kɛlɛ benu banɔ gɛ batɛ dɛmɛ banɔɛbui

¹⁶ babhɛtɛ ɛlɛ ana tɛ badã kidzo akɔ bɔlɔ tɛ bɔtɛ ɖɔ kibuiɛ ɔkɔ bagɛ betinu Yudanɛ sɛ tɛ bayɛkɛ balɛ elu nɛkpã. Nɛidzo ɛlɛ nabhaa, bakaa bhɔ balɛ ebui kpa bhɛbhɛtɛ atɔɖɔ sɛ tɛ lewu kabha. Owusoso Akaa ɔmɔpɔɛ nɔ tɛba balɛ abha otsi alɛ.

Kana Gɛ Paulo Apɛ Asɛ Tɛ Amɔ Tesalonika Ɔhaa

¹⁷ Mɛ adzya alɛ mɔ, gɛ bɔshɛ nɛ wɔnɔ ɔbha nɛ kibe gulũi mɛ (nɛ ishupi mɛ, gɛnɛ ekpeɖekpeɖe mɛ), nɛ kana gɛ bɔpɛɛ sɛ mɔ wɔnɔ soɔ, bɔbhɛtɛ kɛka nyia ka tɛ bɔmɔ ɔnɔ.

¹⁸ Ɔmɔsɛ bɔpɛ sɛ tɛ bɔba wɔnɔ kɔ, kibui gbã mɛ Paulo, ɛbhɛtɛ ɛlɛ zɛbhɛtɛ ɛlɛ-pɔ Satana edzu ahɔɛ nɛ bɔlɔ abha.

¹⁹ Pɔ kiɖuwoe gɛ kɛlɛinu bɔlɔ kidzo mɛ ɖiɖiɛ, bɔlɔ sameɛ, alo kikutuɔ gɛ kɛlɛ mɛ bɔba mɔ ishu dadalɛ nɛ Apalete Yesu amɛ gɛ onupɛ abaa dza? Gɛnɛ wɔnɔ dza?

²⁰ Kɛgbã, wɔnɔ onu bɔlɔ tɛdadalɛ nɛ̀ sameɛ.