Tesalonikanɛ 1 1 - Nyangbo New Testament

¹ Paulo, Silvano Nɛ̀ Timoteo, balɔkɔ keplukpa alɛ asɛsɛ Tesalonika ɔhaa nɛ Owusoso Akaa gɛenu bɔlɔ Akaa nɛ̀ Apalete Yesu Kristo balɛ inyeɛ mɛ, tibhui bhuibu nɛ̀ ishu yɔyɔ zã ɔplɛnɔ wɔnɔ.

Ahɔɛhuhu Tesalonikanɛ Nɛ Alɛ Tɛyɛyɛkɛŋã Shu

² Buuhu Owusoso Akaa ahɔɛ kibe nyia be kɔ wɔnɔ pete pɛ bukulu wɔnɔ kpɛ ɔlɔ Owusoso Akaa tikukulu mɛ̀.

³ Butsiɖi ɛlɛ abha bakà wɔnɔ nɛ bɔlɔ Owusoso Akaa namɛ, anɔ gɛenu bɔlɔ Akaa nɛ wɔnɔ kɛxɔ̃ɛ wɔawɔa gɛ mana tɛyɛyɛkɛŋã shu, wɔnɔ bɔtɔ mana tɛdɛdɛmɛ nɔ, nɛ̀ wɔnɔ kemi kpɛkpɛ gɛ mana ohumi kpɛkpɛ nɛ bɔlɔ Apalete Yesu Kristo mɛ.

⁴ Ɔmɔsɛ bunyi sɛ, Owusoso Akaa adɛmɛ nɛ̀ wɔnɔ baadzya, kliso pɛ ebu wɔnɔ,

⁵ ɔmɔsɛ bɔlɔ ibui gbangbã ba wɔnɔ ɔkɔ anɛ nɛ kaɖɔ bhlui ete, pɔ nɛ̀ ohumi, ɔlɔkɔ plɛnɔ Ɔfɔfuĩa Gbangbã nɛ̀ ebuesilulũ gɛ alɛ mɛ edzuɔ. Nonyi kanà gɛ bɔzã wɔnɔɛshi nɛ wɔnɔ ɛtakpu.

⁶ Nobodzi banɔ gɛ nɔgã nɛ bɔlɔ nɛ̀ Apaleteɛ bɔwɔalũɔ mɛ, nɛ bɔtɔ lɛ pete ede tsyɛ, nɔyɛkɛ kibuiɛ nɛ sameɛ gɛ Ɔfɔfuĩa Gbangbã ɔkɔɔ.

⁷ Klisoɔ nobodzì banɔ gɛ bayɛyɛkɛŋã pete nɛ Makedonia nɛ̀ Axarya beɖi wɔnɔ pɛ bagã atɔɖɔ.

⁸ Apaleteɛ nɛibuiɛ gɛiku wɔnɔ batɔ̃ mɛ̀ nɛ Makedonia nɛ̀ Axaya ete, bebetì wɔnɔ tɛyɛyɛkɛŋã nɛ Owusoso Akaa nabha nɛ ɔkɔ nyia ɔkɔ. Klisoɔ kɛbha ma ɔsɛ tɛ bɔkaɖɔ kibui nyiɛ bui nɛ kɛlɛ shu,

⁹ ɔmɔsɛ batɛɖɔ kɛlɛ nɛ balɛishu ahɔɛ mɛ nɛ kana gɛ nɔyɛkɛ bɔlɔ shu. Betseɖe bɔlɔ nɛ kana gɛ notsyina odenɔ ibudiɛ ɔkɔ pɛ nɔba ɔsɛ tɛ nɔkpɛ kɛtakpu esi ɔkɔ Owusoso Akaa gbangbã gɛ alɛ nɛ ɛkpãa pɛ enu enunuɔ,

¹⁰ nɛ tɛ buupo Yɛeyianyɛ gɛ ede kititiɛ anɔ gɛ anyɛmɛ edenɔ bekpuɔ mɛ, Yesu, gɛ ayɛkɛ bɔlɔ edenɔ ɔmɔpɔɛ nɔ gɛ lɔbaa shu.