Romanɛ 8 - Nyangbo New Testament

Ɛkpã Nɛ Ɔfɔfuĩa Nɔ Tɛpɛpɛ Ulũ

¹ Otsiɛ alɛ, kɛpɔ bubu nanà ma ɔkɔ bagɛ alɛ Kristo Yesu mɛ,

² ɔmɔsɛ gana Kristo Yesu abha, ɔfɔfuĩa mɛ ɛkpã ɔsha oboele mɛ odenɔ kibui kpa ɔsha nɛ̀ butsí mɛ.

³ Kɛgɛ ɔsha ɔgɛmɔ ohumi ɔbhɛtɛ, ɔmɔsɛ kanɔ alɛ mɛ ɛkpã kpa ŋã ɔlɛ abha soɔ, kɛlɛ Owusoso Akaa abhɛtɛ aganà yɛahɔɛ Eyiɛ gɛ asɛsɛ nɛ ebui kpa bhɛbhɛtɛ anɔ tɛzazã mɛ, tɛ edzi asɛ kɛdɔ̃ kɔkɔ nɛ ebui kpa ɛtakpu ana. Kliso ebu kibui kpa ɛpɔ nɛ kibui kpa bhɛbhɛtɛ anɔ mɛ,

⁴ tɛ kɛkɔ ɔsɛ kɛpiapi nɔ gɛ bapɛ asɛ tɛ kɛna nɛ ɔsha nulũɔ, tɛ bamɔ kɛlɛ nɛ bɔlɔ mɛ. Bɔlɔ agɛ tɛzã nɛ̀ ebui kpa bhɛbhɛtɛ mɛ, pɔ pɛ bɔzã nɛ Ɔfɔfuĩa nɔ tɛpɛpɛ ulũ.

⁵ Bagɛ bazã nɛ ɛkpã asɛ kanɔ alɛ mɛanɔ anaa, balɛ ekpeɖekpeɖeɛ alɛ kanɔ nɔ̀ mɛ ebui tɛdɛdɛ mɛ nɔ shu, pɔ bagɛ balɛ nɛ ɛkpã nɛ Ɔfɔfuĩa nɔ tɛpɛpɛ ulũɔ, balɛ ekpeɖekpeɖeɛ alɛ kɛgɛ Ɔfɔfuĩa nɔ ɔdɛ mɛ nɔ shu.

⁶ Kɛgɛinu ebui kpaelete yɛtɛtɔtɔɖɔɔ, kɛmana butsí, pɔ ekpeɖekpeɖeɛ gɛ Ɔfɔfuĩa nɔ lɔgbana xɔnɔ lonu ɛkpã nɛ̀ ishu yɔyɔ,

⁷ ebui kpa bhɛbhɛtɛ ekpeɖekpeɖe enu kitití lɔlɔ nɛ Owusoso Akaa shu. Atɛ bhɛtɛ Owusoso Akaa ɔsha nabha, kɛlɛ atɛ balà abhɛtɛ tsyɛ.

⁸ Bagɛ kanɔ alɛ mɛ ɛkpã gbana, batɛ balà eku Owusoso Akaa awɔ̃.

⁹ Wɔnɔ xɔnɔ anɛ kanɔ alɛ mɛ ɛkpã kpa ɛlɛ gbana ɔnɔ, pɔ Ɔfɔfuĩa nɔ, onupɛ Owusoso Akaa Ɔfɔfuĩa nɔ ɔlɛ ɔnɔ mɛ. Kɛlɛ onupɛ Kristo yɛ Ɔfɔfuĩa nɔ ɔma anɔ teli yɛahɔɛ, etinu Kristo yɛayɛ.

¹⁰ Onupɛ Kristo alɛ ɔnɔ mɛ, pɛ wɔnɔ ishupi lɛ tsí nɛ kibui kpa shu tsyɛ elo, wɔnɔ ɔfɔfuĩa nɔ xɔnɔ ɔlɛ nɛ ɛkpã, ɔmɔsɛ balɔkɔ wɔnɔ asɛ banɔ gɛ alɛ piapii ana so.

¹¹ Kɛlɛ onupɛ anunɔ gɛ yɛ Ɔfɔfuĩa ɔlɛ ofeke Yesu edenɔ bekpuɔ mɛ ɔlɛ wɔnɔ mɛɛ, kɛlɛ yɛ gɛ efeke Kristo edenɔ bekpuɔ mɛɛ, yɛ ke abakɔ wɔnɔ ishupi tsitsí ɛlɛ ɛkpã ɔgana yɛ Ɔfɔfuĩa nɔ, gɛ ɔlɛ wɔnɔ mɛɛ.

¹² Kliso, mɛelɛ alɛ mɔ, kɛxɔ̃ɛ lɛ ɔlɔ shu, pɔ anɛ nɛ kanɔ mɛ ebui kpa bhɛbhɛtɛ, sɛ tɛ bɔzã nɛ̀ ɛkpã nɛ alɛ ulũ.

¹³ Onupɛ nɔzã nɛ̀ ɛkpã nɛ kanɔ alɛ ɛkpã kpa ulũɔ, nobotsí, pɔ onupɛ nɔlɔkɔ Ɔfɔfuĩa nɔ oyí kanɔ mɛ ebui kpa gɛ nɔdɛmɛ nɔ nɔ̀ɔ, nɔbɔzã nɛ ɛkpã,

¹⁴ ɔmɔsɛ bagɛ Owusoso Akaa Ɔfɔfuĩa nɔ ɔgbanaa, Owusoso Akaa yɛeyi alɛ benu,

¹⁵ ɔmɔsɛ anɛ ɔfɔfuĩa nɔ gɛ lɔkɔ ɔsɛ tɛ anɔ dzidzi esi ifuɔ ɔlɛ lɛ wɔnɔ mɛ, pɔ Ɔfɔfuĩa nɔ gɛ lɔzã beyi mɛɛ, nɔyɛkɛ. Kliso bɔkpɛ ozĩ ɔsɛ, “Ao, lɔɛitití.”

¹⁶ Ɔfɔfuĩa nɔ ɔbhɛtɛ tenikpo nɛ̀ bɔlɔ ɔyɛ, pɛ lɔdalɛ bɔlɔ ishu ɔsɛ Owusoso Akaa yɛeyi alɛ bunu.

¹⁷ Kliso onupɛ yɛeyi alɛ bunuɔ, kɛlɛ budzi kaŋãsiɛelete-Owusoso Akaa kaŋãsiɛelete ɔplɛnɔ Kristo. Kɛmɔ̀ gɛ bɔmɔ̀ ɔtɔ ɔplɛnɔ Kristoɔ, kidzo ɛlɛ nabha babakpɛ bɔlɔ tsyɛ nɛ kitití ɔmɔ asɛ yɛ ana.

Tɛdadalɛ Gɛbaba Kidegbaa

¹⁸ Nɛ mɛɔdɔ̃ mɔmɔ lũɔ, kibe ɛlɛ ɔtɔ tinu kɛdɔ̃ gɛ babalà alɔkɔ ashɔnɔ ishu dadalɛ gɛ bebebu akasɛ nɛ ɔlɔ mɛɛ.

¹⁹ Kanɔ mɛ bɔdɔ̃ bhɛbhɛtɛ pete epo nɛ̀ awuhũ dzadzã ɔkɔ Owusoso Akaa yɛeyi alɛ tibubu kasɛ.

²⁰ Ɔmɔsɛ bebu Owusoso Akaa kanɔ mɛɔdɔ̃ gɛ ebuɔ nɛ pɔ asɛ, bɔma kɛnanà mɛ, gɛ anɛ yɛtɛtɔtɔɖɔ kinu, Owusoso Akaa yɛapɛ asɛ kɛzã ana, nɛ awɔ̃ lulu asɛ kɛbàba ɛlɛ mɛ,

²¹ sɛ kiwui tiliɛ kanɔ mɛ bɔdɔ̃ pete baboele ishu odenɔ nɛ banɔ esi, kɛlɛ beti betsí atsɔmɔ, kɛlɛ babà mana alɛ nɛ ishu ahɔɛ mɛ zazã dadalɛ gbangbã mɛ, gɛ babàkɔ Owusoso Akaa yɛeyi alɛ.

²² Nɛ kibe ɛlɛ mɛɛ, bunyi sɛ kanɔ mɛ bɔdɔ̃ petee nimi asɛ kɛtã gɛ ɛya tã ayamunɔ ana ɔlɔkɔ mana oboewui nabha.

²³ Anɛ kanɔ mɛ bɔdɔ̃ ete, pɔ bɔlɔ bagɛ buputɔ nimi nɛ Ɔfɔfuĩa mɛ ɛdɔ̃ kɔkɔ shu tsyɛ, bunimi nɛ ɔlɔ ishu mɛ, nɛ kibeɛ gɛ bupo bɔlɔ tɛyɛyɛkɛ ɔmɔ asɛ beyi anà, tɛ bɔmɔ ɔlɔ ishu ahɔɛmɛ zazã.

²⁴ Ɔmɔsɛ nɛ awɔ̃ lulu alɛ mɛɛ, bayɛkɛ ɔlɔ elu nɛ̀ ɛkpã. Pɔ awɔ̃ lulu nɔnɔ́ gɛ alɛ tɛmɔmɔ mɛɛ, letinu awɔ̃ lulu kura. Afana gɛ ezebelu awɔ̃ nɛ kɛdɔ̃ gɛ kɛlɛ yɛahɔɛ kukukuɔ nabhaa dza?

²⁵ Pɔ onupɛ bulu awɔ̃ nɛ kɛdɔ̃ gɛ kaku ɔlɔ ahɔɛ mɛɛ, kɛlɛ bulú kitú esi ipo ɛlɛ.

²⁶ Kidzo ɛlɛ nabha ke Ɔfɔfuĩa nɔ ɔplɛnɔ ɔlɔ nɛ ɔlɔ tibobotsò mɛ. Butinyi kɛgɛ bɔbaɖɔ nɛ Owusoso Akaa tikukulu mɛ, pɔ Ɔfɔfuĩa nɔ ɔyɛkɛ ebuiɛ nɛ ɔlɔ lu nɛ tininimi gele gɛ olugbũ ɔtɛ bɔlà ɔɖɔɔ mɛ.

²⁷ Owusoso Akaa gɛ amɔ pɛ enyi bɔlɔ etúɔ mɛɛ, enyi Ɔfɔfuĩa nɔ ekpeɖekpeɖe mɛ, ɔmɔsɛ Ɔfɔfuĩa nɔ ɔyɛkɛ ebui nɛ banɔ dadalɛ nulũ, nɛ Owusoso Akaa tɛpɛpɛ ulũ.

Bɔŋã Kabha Ɔdɛ Kɛɖɔ Gɛ Bɔbaɖɔ

²⁸ Bunyi nɛ kɛka nyia ka mɛɛ ɔsɛ, Owusoso Akaa abhɛtɛ ɛlɛ kidzi kɛgbangbã ɔkɔ bagɛ adɛmɛ nɛ yɛ, bagɛ alɛ yɛekulu nɛ yɛtɛtɔtɔɖɔ ɔluɔ.

²⁹ Bagɛ Owusoso Akaa enyi elu kukukuɔ, balɛ ke yɛebu asɛ bazã nɛ ɛkpã asɛ Yɛeyiɛ, sɛ tɛ ebedzi Yɛeyi gɛ eputɔ nɛ beyianyɛ gelee ishi.

³⁰ Bagɛ balɛishu yɛabhɛtɛ tɛtɔtɔɖɔ ɛlɛ elu akɔɔ, balɛ tsyɛ yɛekulu, bagɛ ekuluɔ balɛ tsyɛ yɛebhui utsyɔa akɔ, kɛlɛ bagɛ balɛ yɛebhui utsyɔa akɔɔ, balɛ tsyɛ shu yɛadalɛ.

³¹ Kiɖuwoe bɔbaɖɔ otsiɛ tɛ bɔlɔkɔ bu kibui ɛlɛ nulũ nɔ? Onupɛ Owusoso Akaa enu ɔlɔ ayɛɛ, afana gɛ abalà alɔɛtití nɛ ɔlɔ shu?

³² Owusoso Akaa alɛ gɛ agɛkɔ ɛtakpu asɛ atɛ ashɛnɛ ahɔɛ nɛ Yɛeyiɛ shu, pɔ ashɛnɛ ahɔɛ nɛ yɛishu akɔ ɔlɔ petee nɔ, kiɖeso pɛ atɛ alɔkɔ bɔdɔ̃ pete tsyɛ aplɛnɔ akɔ ɔlɔ nɛ̀ sameɛ dza?

³³ Afana gɛ abalà alɔkɔ kibui nɛ Owusoso Akaa anunɔ gɛ ebu eluɔ shu? Owusoso Akaa yɛebu utsyɔa akɔ banɔ.

³⁴ Afana gɛ yɛebu kɛpɔ? Kristo Yesu, anunɔ gɛ yɛetsíɛ, kɛgɛ plɛnɔ ɔdɛɛ yɛenu anunɔ gɛ befeke edenɔ bekpu mɛ pɛ alɛ nɛ ɛkpã, adɛzã Owusoso Akaa nɛ̀ ɛŋã mɛ, kɛlɛ akɔ yɛtakpu tsyɛ nɛ bɔlɔ lũ.

³⁵ Afana gɛ ebebhui tɛdɛdɛmɛ nɔ gɛlɛ bɔlɔ nɛ̀ Kristo ishi? Kɛba dzi bɔtɔ alo banɔ buluhũ kpɛkpɛ alo banɔ edetɔtɔ nɔ alo bɔbhɛ alo kɛdɔ̃ makpɛ makpɛ alo kifu ibui alo bɛtɛ̀ɛ dza?

³⁶ Asɛ kɛfɔ̀nɔ gɛ bafɔnɔ kɛlɛ eluɔ, “Nɛ wɔɛtakpuɔ, bɔmɔ butsí ɛlɛ nɛ kiwui mɛ pete, balɔkɔ bɔlɔ asɛ ibhoshi gɛ bedi yí.”

³⁷ Ao, nɛ alɛ pete mɛɛ, bɔŋã abha ɔdɛ tɛɖɔɖɔ ɔgana Kristo gɛ adɛmɛ nɛ bɔlɔɔ nabha.

³⁸ Ɔmɔsɛ ɛyɛkɛŋã ɔsɛ, onu butsí tsyɛo alo ɛkpã, akaa axɔ̃ɛdɛ alo ɛfɔfuĩa zizĩ, kibe ɛlɛ alo kɛgɛ babaa, alo ihumi,

³⁹ ɔɖaɖama ɔkɔ alo odzudzukɔ alo kɛka nyia ka idi nɛ kanɔ alɛ pete mɛɛ, tɛ balà ebhui ulɔ ɔtɛ nɛ Owusoso Akaa tɛdɛdɛ mɛ nɔ gɛ akɔ bɔmɔ odenɔ bɔlɔ Apalete Kristo Yesu mɛ shu.