Romanɛ 7 - Nyangbo New Testament

Adzɛ Gbagbana Idzo Gbangbã Tɛkakasɛ

¹ Bunyi notinyiɛ mɔ dza, mɛelɛ alɛ, bagɛ benyi ɔshaa mɛɖɔaɖɔ ɔkɔ ɔsɛ nɛ kibeɛ gɛ anɔ alɛ nɛ̀ ɛkpã koɔ, alɛ ɔsha esiɛ mɔɔ dza?

² Nɛ kibui nulũɔ, ɔsha ɔnyã anyɛedzini nɛ yɛenyine shu nɛ kibeɛ gɛ anyɛ alɛ nɛ ɛkpã, pɔ onupɛ yɛenyineɛ etsíɛ, kɛlɛ ekoeyì nɛ tɛgbagbana ɔsha ɔlɛ niesi.

³ Kliso onupɛ alɔ pɛ adɛzãna anyɛ bhlatɔ nɛ kibeɛ gɛ yɛenyineɛ akalɛ nɛ ɛkpãa, kɛlɛ edzi ɔmamɛ adɛdɛ anɔ. Pɔ onupɛ yɛenyineɛ etsí xɔnɔ, ekoeyì nɛ ɔsha mɛ, gɛ etikenu ɔmamɛ adɛdɛ anɔ, onupɛ avɛ adɛzãna anyɛ bhlatɔ tsyɛ.

⁴ Kliso mɛelɛ alɛ mɔ, wɔnɔ tsyɛ notsí ɔkɔ ɔshaa ɔgana Kristo abha, tɛ nodzi tenikpo ɔkɔ anunɔ gɛ befeke edenɔ bekpuɔ mɛɛ, tɛ buyu busi eyuyu gbangbã ɔkɔ Owusoso Akaa.

⁵ Nɛ kibe ɛlɛ gɛ kanɔ mɛ ebuiɛ azagbana ɔlɔɔ, ebui nɔnɔ gɛ agbanà anɔ akpɛ ebui kpa mɛ nɛ ɔsha nulũɔ azã ɔlɔ mɛ, kɛlɛ agɛ bɔbhɛtɛ pete agbana ɔlɔ ɔkpɛ butsí mɛ.

⁶ Pɔ otsi alɛ gɛ buzitsí nɛ ɔsha gɛ ɔtɛ nya ɔlɔ oɖi shu oluɔ, bebu ɔlɔ edenɔ ɔshaa mɛ, tɛ kɛkɔ ɔsɛ bɔkpɛ ɛtakpu esi nɛ idzo vɔvɔ abha gana Ɔfɔfuĩa mɛ, kɛlɛ kitinu asɛ nɛ kidzo kukuɔ gɛ bafɔnɔ eluɔ nulũ.

Kawlɔ̃akɛ Nɛ̀ Kibui Kpa Bhɛbhɛtɛ

⁷ Otsiɛ nɔ pɔ, kiɖuwoe lu bɔbaɖɔ? Kibui kpa ɔsha onu dza? Ao, kɛma ɛlɛ mɛ ana! Kibui gbã kinu ɔsɛ, ɛgɛ tatì kɛdɔ̃ nɔnɔ gɛ kibui kpa nu, pɔ gana ɔshaa mɛɛ, iti ɛlɛ ana. Tsyɛ alo ɛgɛ tatì kɛgɛ inu kiwuhũ dzadzã nɛ anɔ teli idɔ̃ shu, onupɛ ɔsha ɔma ɔsɛ, “Tɛɔdzã kiwuhũ nɛ ɔhagbo ɛdɔ̃ shuɔ.”

⁸ Pɔ gɛ kibui kpa bhɛbhɛtɛ ŋã kibuiɛ gɛ ɔsha ɔɖɔ nabha soɔ, kɛkɔ ɔsɛ kawɔ̃kpɛ nɛ anɔ ɛdɔ̃ shu kpasɛ mɛ mɛ̀. Onupɛ ɔsha ɔmaa, kɛlɛ kibui kpa tsyɛ ma.

⁹ Ɛtɛzã nɛ̀ ɛkpã nɛ ɔshaa matimati mɛ iɖi. Pɔ kibeɛ gɛ ɔsha ɔba koɔ, kibui kpa lɔ nɛ ɛkpã, kɛlɛ mɛitsí.

¹⁰ Ɛmɔ ɔsɛ ɔshaa gɛ kɛlɛ sɛ tɛ lɔkɔ mɛ ɛkpãa, ɔlɛ ke ɔlɛ otsyina ɔmana mɛ utsí.

¹¹ Pɔ gɛ kibui kpa bhɛbhɛtɛ mɔɛ idzo nɛ ɔsha nabha soɔ, kibui kpa wɔɛ mɛ, kɛlɛ nɛ ɔsha nulũɔ butsí ba mabha.

¹² Klisoɔ ɔshaa nɛ̀ ɔsha kpɛkpɛɛ shu dalɛ, lɔna kɛlɛ lɔpɛ̃.

¹³ Otsiɛ pɔ, kibuiɛ gɛinu kɛgbangbãa kɛli tsyina dzi butsí kɔ mɛɛ dza? Ao kɛma ɛlɛ mɛ ana! Pɔ tɛ kibui kpa bu ishu kasɛ asɛ kibui zizĩɛ, kɛgã kibui gbangbã nabha pɛ kibu butsí bakpɛ mɛ, so gana ɔsha kpɛkpɛ mɛɛ, sɛ tɛ kibui kpa wlui zĩ tɔɖɔ dɛ.

¹⁴ Bunyi ɔsha ɔsɛ ɔfɔfuĩa mɛibui lonu, kɛlɛ mɛ pɔɔ anɛ ɔfɔfuĩa mɛdɔ̃ mɛinu, gɛ ɛlɛ ɔmɔ asɛ anɔ dzidzì ɔkɔ kibui kpa ana.

¹⁵ Itilũ kɛgɛ ɛbhɛtɛɛ, niesi. Ɔmɔsɛ kɛgɛ ɛpɛ sɛ tɛ ɛbhɛtɛɛ, ɛtɛlà kɛlɛ bhɛtɛ, pɔ kɛgɛ ɛgɛdɛ mɛɛ, mɛbhɛtɛ.

¹⁶ Onupɛ kɛgɛ ɛtɛdɛmɛ sɛ tɛ mɛbhɛtɛ pɛ kɛlɛ mɛbhɛtɛɛ, kɛlɛ ɛdɛmɛ tɔɖɔ ɔsɛ ɔsha ɔpɛ.

¹⁷ So kɛgɛ ɛbhɛtɛɛ otsiɛ nɔ anɛ mɛ alɛ mɛbhɛtɛ ɛlɛ, pɔ kibui kpaa gɛlɛ mɛ mɛɛ kɛlɛ bhɛtɛ.

¹⁸ Gɛ anɔdzyrame mɛinu soɔ, inyi sɛ kɛgbangbã nanà ma mɛmɛ̀. Ɔmɔsɛ mɛ tɛpɛpɛ kinu ɔsɛ tɛ ɛbhɛtɛ kibui gbangbã flogo, pɔ ɛtɛlà kɛlɛ bhɛtɛ.

¹⁹ Ɔmɔsɛ kɛgɛ ɛbhɛtɛɛ, kitinu kɛgbangbã gɛ ɛpɛ sɛ tɛ ɛbhɛtɛ, ao, kibui zizĩɛ gɛ ɛgɛpɛ sɛ tɛ mɛbhɛtɛɛ, kɛlɛ abha mɛitsiɖi pɛ ɛbhɛtɛ.

²⁰ Onupɛ kɛgɛ ɛgɛpɛ ɔsɛ tɛ mɛbhɛtɛ pɛ kɛlɛ mɛbhɛtɛɛ otsiɛ nɔ, kɛlɛ anɛ mɛbhɛtɛ ɛlɛ, pɔ kibui kpa gɛ kpasɛ mɛ mɛɛ, kɛlɛ bhɛtɛ ɛlɛ.

²¹ Kliso ilũ ɔsha axɔ̃ɛ wɔawɔa niesi ɔsɛ, onupɛ ɛpɛ sɛ tɛ mɛbhɛtɛ kibui gbangbãa, kibui zizĩɛ lɛ mɛɔbha nɛ ɛkɛlɛ.

²² Nɛ mɛishu mɛ pɔɔ, ɛmɔ same nɛ Owusoso Akaa ɔshaa shu flogo,

²³ pɔ iwlui mɔ ɔsha bhlatɔ gɛ lɔwɔa axɔ̃ɛ nɛ mɛishu udzyaa mɛ, gɛ lɔlɔkɔ keyu nɛ mɛekpeɖekpeɖe mɛ bhɛbhɛtɛ shu, kɛlɛ lɔkpɛ mɛ ɔɖavũ anɔ ɔkɔ ɔsha kpa gɛ ɔwɔa axɔ̃ɛ nɛ mɛishu udzya mɛ.

²⁴ Ashagabui elete ɖuwoe lu idi nɛ alɛ mɛinuɔ mɔ! Afana gɛ ebebu mɛishupi ɛlɛ eyinɔ nɛ butsi lɛ mɛ?

²⁵ Buhu Owusoso Akaa ahɔɛ-ɔgana bɔlɔ Apalete Yesu Kristo abha! Kliso mɛ xɔnɔ nɛ mɛekpeɖekpeɖe nulũɔɔ, inu anɔ dzidzì ɔkɔ Owusoso Akaa yɛɔsha, pɔ mɛ asɛ anɔdzyrame anaa, inu anɔ dzidzì ɔkɔ ebui kpa ɔshaa.