Romanɛ 4 - Nyangbo New Testament

Balɔkɔ Abraham Asɛ Anɔ Gbangbã Ɔgana Tɛyɛyɛkɛŋã Mɛ

¹ Otsiɛ nɔ pɔ, kiɖuwoe lu bɔbaɖɔ nɛ bɔlɔ ashuĩ Abraham shu ɔsɛ amɔ nɛ kibui ɛlɛ mɛ?

² Onupɛ kɛgbã, balɔkɔ Abraham asɛ enu anɔ gbangbã nɛ yɛaxɔ̃ɛ wɔawɔa lũ soɔ, kɛlɛ kɛdɔ̃ tili zã yɛahɔɛ gɛ kɛlɛishu yɛalɔkɔ etũ kitelũ nɔ, pɔ anɛ nɛ Owusoso Akaa yɛamɛ.

³ Kɛlɛ́ Kibuiɛ ɖɔ? “Abraham ayɛkɛ Owusoso Akaa nabha aŋã kɛlɛ kɔ ɔsɛ balɔkɔ ɛlɛ nɛishu asɛ kinu ibui gbangbã.”

⁴ Onupɛ anɔ teli awɔɛ ɛxɔ̃ɛɛ, yɛbhɛ babuia nɔ tinu asɛ kɛdɔ̃ gɛ balɔkɔ akɔɛ ete, pɔ kinu kibui tɔtɔɖɔ olu nɛ kɛxɔ̃ɛ shu.

⁵ Anɔ teliɛ anɛ kɛxɔ̃ɛ wɔawɔa mɛ yɛagã, pɔ ayɛkɛ Owusoso Akaa gɛ abhɛtɛ ɛtakpu mɛ gagalĩelete yɛedzi anɔ gbangbã nabha aŋãa, yɛtɛyɛyɛkɛŋãa tɛkɔ ɔsɛ tɛ edzi anɔ gbangbã.

⁶ David aɖɔ kɛlɛ idi asɛ, anɔ gɛ Owusoso Akaa alɔkɔ asɛ enu anɔ gbangbã, pɔ anɛ nɛ yɛxɔ̃ɛ wɔawɔa lũɔ, enu anɔ yuyula. Aɖɔ asɛ,

⁷ “Eyula akɔ bagɛ balɔkɔ balɛ ebui kpa etsyeɛ, bagɛ balɛ ebui kpa abha badã bɔdɔ̃.

⁸ Beyula akɔ anyɛ gɛ yɛebui kpa shu Apaleteɛ ashɛnɛ ahɔɛ.

⁹ Tiyuyula lɛɛ pɔ, tɛ lɛ ɔkɔ bagɛ enu Yudanɛ ete ko loo, pɛnɔsɛ bagɛ betinu Yudanɛ tsyɛɛ dza? Bɔzɛɖɔ ɔsɛ Abraham enu anɔ gbangbã nɛ yɛtɛyɛyɛkɛŋãa ulũ so.

¹⁰ Ɛkpã ɖuwoe mɛ yɛazã flogo pɛ balɔkɔɛ asɛ edzi anɔ gbangbã? Kɛhɔ̃a bebhui akɔɛ flogo loo, pɛnɔsɛ gɛ bekebhui ɛlɛ akɔɛ nɛibeɛ dza? Anɛ kidegba ibe, pɔ kɛba kpɛ otugbà.

¹¹ Kɛlɛ Abraham ayɛkɛ kɛhɔ̃a bhui bhui ibui, gɛ kidzi kɛklagbu tɔtɔɖɔ nɛ yɛanɔ gbangbã gɛ balɔkɔɛ odenɔ tɛyɛyɛkɛŋã mɛ, gɛ ekebhui kɛhɔ̃a flogo. Kɛlɛ yɛedzi Akaa akɔ bagɛ bayɛkɛ aŋã, pɔ begibhui kɛhɔ̃a flogo, denɔ kɛlɛ mɛɛ sɛ tɛ balɔkɔ alɛ asɛ benu banɔ gbangbã.

¹² Kɛlɛ yɛenu Akaa akɔ bagɛ bebhui kɛhɔ̃a, gɛ anɛ kɛhɔ̃a ete ko bebhui, pɔ bagã nɛ Abraham yɛtɛyɛyɛkɛŋã idzo ɛlɛ nabha flogo pɛ ebebhui kɛhɔ̃a.

¹³ Anɛ gana ɔsha mɛ flogo pɛ Abraham nɛ̀ yɛeyi alɛ bayɛkɛ tɛtɔtɔɖɔ asɛ kesiakpa ebedzi balɛ aŋãsi, pɔ gana anɔ gbangbã gɛ bedzi odenɔ tɛyɛyɛkɛŋã ulũ mɛ.

¹⁴ Onupɛ bagɛ eshu ɔsha balɛ ebedzi kaŋãsiɛeleteɛ, kɛlɛ tɛyɛyɛkɛŋã dzi kibui ete ko, kɛlɛ tɛtɔtɔɖɔ oluɔ tsyɛ bha ma kɛnanà mɛ,

¹⁵ ɔmɔsɛ ɔmɔpɔɛ ibui ɔsha lɔmana. Kɛlɛ ɛkɛlɛ gɛ ɔsha ɔmaa, kibui kpa bhɛbhɛtɛ tsyɛ tɛzã.

¹⁶ Kliso tɛtɔtɔɖɔ ɛlɛ de tɛyɛyɛkɛŋã mɛ, sɛ tɛ kidzi asɛ tibhui bhuibu gɛ badɛ mɛ alɔkɔ akɔ bagɛ benu Abraham yɛeyi alɛ pete, anɛ ɔkɔ banunɔ gɛ beshù ɔsha ete ko, pɔ ɔkɔ bagɛ bayɛkɛ aŋã asɛ Abraham ana. Gɛ yɛenu akaa akɔ bɔlɔ petee nɔ.

¹⁷ Asɛ kɛfɔ̀nɔ gɛ bafɔnɔ ɛlɛ elu asɛ, “Ɛbhɛtɛ wɔ sɛ tɛ odzi Akaa ɔkɔ ɛmadi gelee.” Yɛenu bɔlɔ Akaa nɛ Owusoso Akaa namɛ, anunɔ abha gɛ ayɛkɛ aŋã. Owusoso Akaa gɛ akɔ bekpu bamɛ ɛkpã, kɛlɛ ekulu bɔdɔ̃ gɛgɛ̀zã kuku ibeɛ amana otsiɛ.

¹⁸ Gɛ tɛtɔtɔɖɔ kɔɛ ɛlɛ gɛzɛba kɛlɛ mɛ tsyɛ elo, Abraham akpɛemi ayɛkɛ aŋã, kɛlɛ kɔ ɔsɛ ebedzi Akaa ɔkɔ amadi gelee, asɛ kitseɖeɛ gɛ betseɖe yɛasɛ, “Kana wɔeyi mɔmɔ alɛ abazãa.”

¹⁹ Abraham agɛ shɛnɛ ahɔɛ nɛ tɛyɛyɛkɛŋã shu, pɔ azalɔkɔ yɛishu asɛ anɔ tsitsí ana nɛ kibeɛ gɛ eshè ayɛkɛ asɛ agɔ kɛkpã zɛzɛ, kɛlɛ Sara tsyɛ yɛoputsuɔ otsíɛ.

²⁰ Gɛ kɛzã ana tsyɛ elo, ayɛkɛ aŋã asɛ kɛgɛ Owusoso Akaa atɔɖɔ akɔɛ bàba ɛlɛ mɛ, azamɔ ohumi atɔɖɔ nɛ tɛyɛyɛkɛŋã mɛ kɛlɛ aakpɛ Owusoso Akaa nɛinye nɛitití,

²¹ gɛ ayɛkɛ aŋã piapii asɛ ohumi ɔlɛ Owusoso Akaa ahɔɛ sɛ abalà abhɛtɛ kɛgɛ atɔɖɔ asɛ ababhɛtɛɛ.

²² Kɛlɛ soɔ, “Balɔkɔ ɛlɛ akɔɛ asɛ kinu kibui gbangbã tɛbhɛbhɛtɛ.”

²³ Ebui alɛ asɛ “balɔkɔɛ ɛlɛ akɔɛɛ” gɛ anɛ yɛ ete bafɔnɔ alɛ akɔ,

²⁴ pɔ ɔkɔ ɔlɔ tsyɛ, gɛ Owusoso Akaa balɔkɔ asɛ bunu banɔ gbangbã, bɔlɔ agɛ yɛkɛ yɛ gɛ efeke Yesu bɔlɔ Apaleteɛ edenɔ bekpu mɛ abha aŋãa.

²⁵ Balɔkɔɛ akpɛ ahɔɛ akɔ butsi nɛ bɔlɔ ebui kpa ɛtakpu, pɔ Kitití ayɛ akɔ yɛalɔ nɛ bekpuɔ mɛ, sɛ tɛ balɔkɔ bɔlɔ asɛ bunu banɔ gbangbã.