Romanɛ 15 - Nyangbo New Testament

¹ Bɔlɔ agɛ kpɛ ogù nɛ tɛyɛyɛkɛŋã mɛɛ, kɛlɛ sɛ tɛ bɔyɛkɛ ɔkɔ bagɛ lɔma alɛ ahɔɛ, kɛlɛ kɛma sɛ tɛ bɔɔ bhɛtɛ kɛgɛ iku ɔlɔ awɔ̃ɔ.

² Kɛlɛ sɛ tɛ bɔlɔ ɔmayɛmɛ aka nyia aka abhɛtɛ kɛgɛ baku yɛɔhagbo awɔ̃, pɛ ebeshe atɔɖɔ nɛ yɛtɛyɛyɛkɛŋã mɛ.

³ Ɔmɔsɛ Kristo tsyɛ elo, agɛ babhɛtɛ kɛgɛ yɛadɛmɛ nɔ akɔ yɛishu, pɔ asɛ kɛfɔ̀nɔ gɛ bafɔnɔ kibuiɛ elu asɛ, “Akwalatuɔ gɛ banunɔ alɔkɔ akwala wɔ nɔɔ, aba yalɛ̀ mɛ.”

⁴ Ɔmɔsɛ Owusoso Akaa yɛibui ka nyia ka gɛ bafɔnɔ elu nɛ kibeliɛɛ, bafɔnɔ kɛlɛ elu asɛ tɛ kɛkasɛ ɔlɔ bɔdɔ̃, sɛ tɛ gana kitèkpɛkpɛ nɛ̀ kemikpɛkpɛ mɛɛ, tɛ bɔyɛkɛ kɛgɛ ɛlɛ idzo mɛ buɖi nabha ɔŋã.

⁵ Owusoso Akaa gɛ akɔ kemikpɛkpɛ nɛ̀ kité kpɛkpɛɛ, akɔ ɔnɔ tenikpo bhɛbhɛtɛ ɔfɔfuĩa asɛ banɔ gɛ alɛ Yesu ede anaa,

⁶ sɛ tɛ nɔlɔkɔ kitú tinikpo nɛ̀ olugbũ tonikpo ɔkpɛ Owusoso Akaa, gɛenu bɔlɔ Apalete Yesu Kristo Yɛakaa nɛinye nɛitití.

⁷ Kliso nɔyɛkɛ bagɔlɔ asɛ kɛyɛkɛ gɛ Kristo tsyɛ ayɛkɛ ɔnɔɔ, tɛ kɛkpɛ Owusoso Akaa yɛinye nɛitití.

⁸ Ɛkɔ noti ɔsɛ Kristo ebedzi axɔ̃ɛdɛ akɔ Yudanɛ nɛ̀ Owusoso Akaa yɛibui gbangbã nɛinye mɛ, sɛ tɛ atɔɖɔ ɛklagbu nɛ kɛgɛ atɔɖɔ elu akɔ balɛ ashuĩ alɛ nabha,

⁹ sɛ tɛ bagɛ betinu Yudanɛ tsyɛ tɛ bakpɛ Owusoso Akaa nɛinye nɛitití nɛ yɛashagabui ɖiɖiɛ shu, asɛ kɛfɔ̀nɔ gɛ bafɔnɔ kibuiɛ elu asɛ, “Kliso ɛbakpɛ wɔɛnye nɛitití nɛ bagɛ betinu Yudanɛ nɛishi, kɛlɛ ɛbazhã ɛdzɛ nɛ wɔɛnye nɛtakpu.”

¹⁰ Tɛfɔfɔnɔ bhlatɔ tsyɛ ɖɔ ɔsɛ, “O! Wɔnɔ bagɛ notinu Yudanɛ, nɔkpɛ same nɛ̀ yɛanunɔ.”

¹¹ Kɛlɛ bazafɔnɔ kibuiɛ elu asɛ, “Nɔkpɛ Apaleteɛ nɛinye nɛitití, wɔnɔ bagɛ otinu Yudanɛ petee, kɛlɛ wɔnɔ pete nɔzhã ɛdzɛ tɛ nɔkpɛ yɛinye nɛitití.”

¹² Kɛlɛ Yesaya tsyɛ azaɖɔ asɛ, “Isai yɛyamɛeyi teli ebekoeyì aba, gɛ yɛenu anunɔ gɛ abá baŋã ukusi nɛ ɛmadi nabha, bagɛ betinu Yudanɛ, bebèlu awɔ̃ nɛ yɛabha.”

¹³ Owusoso Akaa nabha gɛ nolu awɔ̃ akɔ asɛ tɛ same nɛ̀ ishu yɔyɔ yuku unɔ ɔgana Ɔfɔfuĩa Gbangbã ohumi nɔ mɛ.

Paulo Avɛnɔ Kibui Gbangbã Nɛ Bagɛ Betinu Yudanɛ Ɔkɔ

¹⁴ Mɛelɛ alɛ mɔ, ɛmɔ kɛlɛ idenɔ mɛishu mɛ ɔsɛ, nodzi banɔ gbangbã nɛ bubuti mɛ, kɛlɛ nɔna gɛ nɔbɔlà kasɛ bagɔlɔ ɔdɔ̃.

¹⁵ Ɛfɔnɔ ebui gelee kpɛ eplukpa alɛ mɛ nɛ̀ kitèkpɛkpɛ sɛ tɛ iwlui báka ɔnɔ, nɛ tibhui bhuibuɔ gɛ Owusoso Akaa ebhui mɛebuɔ shu,

¹⁶ ebu mɛ asɛ tɛ mɛidzi Kristo Yesu yɛibui gbangbã axɔ̃ɛdɛ ɔkɔ bagɛ betinu Yudanɛ, kɛlɛ asɛ banɔlũazazã anaa, tɛ mɛɖɔ Owusoso Akaa Ibui Gbangbã tseɖe bagɛ betinu Yudanɛ, sɛ tɛ bedzi asɛ bɔdɔ̃ kɔkɔ gbangbã ɔkɔ Owusoso Akaa, gɛ bɔlɛishu Ɔfɔfuĩa Gbangbã ɔdalɛ ana.

¹⁷ Kliso mɛinye wui abha nɛ Yesu Kristo mɛ nɛ̀ mɛxɔ̃ɛ dɛdɛ ɔkɔ Owusoso Akaa nɛtakpu.

¹⁸ Ɛtɛbapɛ ɛwɔawɔa sɛ ibu olugbũ mɛ tɛɖɔ kibui na nà ɔdɛ kɛgɛ Kristo abhɛtɛ aganà mɛabha, sɛ tɛ bagɛ betinu Yudanɛ tsyɛ tɛ belũ atɔ̃ akɔ Owusoso Akaa, ɔgana kɛgɛ ɛɖɔ pɛ ɛbhɛtɛ mɛ-

¹⁹ ɔgana ohumi udɔ̃ bubu kasɛ nɛ̀ atsyindzye ebui, ɔgana Ɔfɔfuĩa nɔ ohumi mɛ. Kliso denɔ Yerusalemuɔ, ɛgã kana Iliriko pete batsyɔa, pɛ ɛzɛɖɔ Kristo Ibui Gbangbã, gɛ kɛna piapii.

²⁰ Kidzi mɛtakpu tɔtɔɖɔ ɔsɛ tɛ mɛɖɔ Kibui Gbangbã nɛ ɛklɛ gɛ betinyi Kristoɔ, sɛ tɛ mɛtɛ kpɛ ɛtakpu nɛ ɛkɛlɛ gɛ anɔ bhlatɔ teli atɛkpɛ ibuiɛ tɛɖɔɖɔ esi akɔ banunɔ.

²¹ Asɛ kɛfɔ̀nɔ gɛ bafɔnɔ kibuiɛ elu asɛ, “Banunɔ gɛ bakaɖɔ yɛibuiɛ etseɖe eɖiɛ, babàmɔɛ, kɛlɛ banunɔ gɛ bekelũɔ, bebèlũ kɛlɛ esi.”

²² Kɛlɛ so pɛ ɛtɔɖɔ wɔnɔ ɔkɔ tɛbaba ibui flogo pɛ kɛtɛ shɔ̃.

Paulo Yɛtɛtɔtɔɖɔ Sɛ Tɛ Avɛ Roma

²³ Otsi alɛ gɛ mɛaxɔ̃ɛ ebelè pɛ ɛtɛkadɛ ɔkɔ na nà nɛ kɛma ɛlɛ mɛɛ, kɛlɛ agɔ gelee nɛ alɛ gɛ kinu mɛ tɛpɛpɛ sɛ tɛ mɛbaɖi unɔɔ,

²⁴ ɛtɔɖɔ sɛ tɛ mɛba wɔnɔ ɔkɔ nɛ kibeɛ gɛ ɛvɛ Spania. Kibui tɔtɔɖɔ kinu ɔsɛ tɛ mɛiku wɔnɔ ɔkɔ nɛ kibeɛ gɛ ɛfala pɛ ɛvɛɛ, kɛlɛ tɛ mɛbabisi tɛpɛplɛnɔ odenɔ wɔnɔ ɔkɔ nɛ kidzoɔ tɛgagã mɛ, onupɛ ɛzã wɔnɔ ɔbha kɛbɔɛ nɔ.

²⁵ Otsiɛ xɔnɔ ɛkpasɛ idzo mɛ ɛvɛ Yerusalem, sɛ tɛ mɛdɛkɔ banɔ dadalɛ tɛpɛplɛnɔ nɛ ɛkɛlɛ.

²⁶ Makedonianɛ nɛ̀ Axayanɛ beshogò bɔdɔ̃ nɛ̀ same sɛ tɛ balɔkɔ aplɛnɔ betsyuitsyuiɛ galɛ banɔ dadalɛ nɛishi nɛ Yerusalemuɔ.

²⁷ Batɔɖɔ akɔ bɔdɔ̃ nɛ̀ same, kɛlɛ ɔmɔ asɛ kɛbhɛ gɛ badɔ nɛ balɛishu ana. Onupɛ bagɛ betinu Yudanɛ amɔ bɔdɔ̃ gbangbã odenɔ ɔfɔfuĩa tiyuyula gɛinu Yudanɛ ɔyɛ mɛɛ, kɛlɛ badɔ ɛbhɛ nɛ Yudanɛ shu gɛ kɛlɛ kɔ alɛ sɛ tɛ balɔkɔ bɔdɔ̃ɔ gɛ bamɔ̃ edenɔ tiyuyula mɛɛ, aplɛnɔ Yudanɛ nɔ.

²⁸ Kliso onupɛ ɛdɛ kɛxɔ̃ɛ ɛlɛ, pɛ iɖi kɛlɛ ɔkɔ ɔsɛ bɔdɔ̃ ɔlɛ ku balɛ ahɔɛ mɛ ebekeɛ, ɛba bàgã wɔnɔ ɔkɔ fala vɛ Spania.

²⁹ Inyi sɛ ɛbaku wɔnɔ ɔkɔɔ, ɛbalɔkɔ Kristo yɛtiyuyula gɛ lɛ Yɛibui Gbangbã mɛ mana wɔnɔ nɛ tikpekpè mɛ.

³⁰ Mɛelɛ alɛ mɔ, ɛkpalà ɔnɔ ɔgana Apalete Yesu Kristo abha, nɛ̀ Yɛɔfɔfuĩa nɔ tɛdɛdɛmɛ nɔ nɛ̀ banɔ mɛɛ, tɛ nɔplɛnɔ mɛ nɛ ɛxɔ̃ɛ gagalĩ lɛ mɛ, tɛ nokulu Owusoso Akaa nɛ mɛtakpu.

³¹ Nokulu Owusoso Akaa sɛ tɛ ebu mɛ eyinɔ nɛ bagɛ agɛ yɛkɛ Yesu abha aŋã nɛ Yudea nɔ ahɔɛ mɛ, kɛlɛ bɔdɔ̃ gɛ ɛlɔkɔ vɛnɔ nɛ̀ mɛaxɔ̃ɛ wɔawɔa nɛ Yerusalemuɔ leku bagɛ balɛishu badalɛ nɛ ɛkɛlɛ awɔ̃,

³² sɛ tɛ nɛ Owusoso Akaa tɛpɛplɛnɔ mɛɛ, ɛbaku wɔnɔ ɔkɔ nɛ same kɛlɛ mɛ nɛ̀ wɔnɔ pete nɔ, tɛbɔkpɛ same nɛ bagɔlɔ shu.

³³ Owusoso Akaa gɛ yɛakɔ ishu yɔyɔ azãplɛnɔ wɔnɔ petee. Amen.