Romanɛ 14 - Nyangbo New Testament

Bagɛ Bakpɛ Ogù Nɛ̀ Bagɛ Agɛkpɛ Nɛ Tɛyɛyɛkɛŋã Mɛ

¹ Nɔyɛkɛ anunɔ gɛ yɛtɛyɛyɛkɛŋãa kakpɛ oguɔ tsyɛ ɔkpɛ wɔnɔishi, tɛ nɔtɛ ozokulu ebhu nɛ ebui wawlãkɛ shu.

² Anɔ teli nɛ yɛtɛyɛyɛkɛŋã lũɔ, adɛmɛ aŋã kɛka nyia ka, pɔ anɔ teli gɛ aka kpɛ ogù nɛ tɛyɛyɛkɛŋã mɛɛ, yɛ xɔnɔ tɛgã ete ko yɛaŋã.

³ Anunɔ gɛ aŋã kɛka nyia kaa, eti bu olugbũ mɛ nɛ agɛ yɛatɛ abhɛtɛ ana shu, kɛlɛ anunɔ gɛ atɛ aŋã kɛka nyia kaa, atɛ tɛ̀ɛ anunɔ gɛ yɛaŋã kɛka nyia ka elú, ɔmɔsɛ Owusoso Akaa yɛanɔ yɛenu.

⁴ Afana wonu pɛ kɛlɛ sɛ tɛ okulu ebhu nɛ̀ Owusoso Akaa yɛaxɔ̃ɛdɛ? Apaleteɛ ete ko yɛenyi asɛ alɛ piapii alo agɛpɛ. Abalà azã piapii, ɔmɔsɛ Apaleteɛ abalà bhɛtɛ asɛ tɛ akpɛ ogù.

⁵ Kana ɛbe anɔ teli tsyɛ alɔkɔ kiwui tili asɛ kɛlɛ shu dalɛ dɛ tili. Anɔ bhlatɔ pɔ alɔkɔ ewuiɛ nyɔ̃ɔ asɛ lashɔ̃. Kɛlɛ sɛ tɛ anɔ ka nyia ka abhɛtɛ yɛekpeɖekpeɖe mɛ nɛ kɛgɛ aɖɔɔ shu.

⁶ Anunɔ gɛ alɔkɔ kiwui tili asɛ kɛlinu kɛgɛ dzã kiwuhũ dɛɛ, abhɛtɛ kɛlɛ sɛ tɛ alɔkɔ akpɛ Apalete nɛinye nɛitití nɔ. Kana ɛbe anunɔ gɛ atã kɛdzyaa, abhɛtɛ ana sɛ tɛ akpɛ Apalete nɛinye nɛitití, ɔmɔsɛ ehu Owusoso Akaa ahɔɛ nɛ kɛŋaŋã nɛ ɛtakpu, kɛlɛ anunɔ gɛ atɛ aŋãa tsyɛɛ, abhɛtɛ ana akɔ Apaleteɛ tɛ alɔkɔ ehu Owusoso Akaa ahɔɛ nɔ.

⁷ Ɔmɔsɛ bɔlɔ ɔmayɛmɛ na nà atɛ azã nɛ ɛkpã ɔkɔ yɛahɔɛ ishu ete, kana ɛbe bɔlɔ ɔmayɛmɛ anɔ na nà atɛ etsí akɔ yɛahɔɛ ishu ete.

⁸ Onupɛ bɔlɛ nɛ ɛkpãa, bɔlɛ ɛlɛ ɔkɔ Apaleteɛ, kɛlɛ onupɛ butsí tsyɛɛ, butsí ɔkɔ Apaleteɛ, kliso bɔlɛ nɛ ɛkpã alo butsí tsyɛɛ elo, Apaleteɛ ayɛ ko bunu.

⁹ Kɛlɛ̀ nɛ̀ ɛtakpu so ko pɛ gɛ Kristo etsíɛ, alɔ pɛ alɛ nɛ ɛkpã sɛ tɛ edzi Apalete akɔ bavɛvɛ nɛ̀ bagɛ alɛ nɛ ɛkpãa.

¹⁰ Wɔ pɔ, kiɖeso pɛ okulu ebhu nɛ̀ wɔelee? Alo kiɖeso pɛ oɖi wɔele nɔ sɛ etinu kɛdɔ̃ na nà nɔ dza? Ɔmɔsɛ bɔlɔ pete bɔbazã bebèkulu ebhu nɛ ɔlɔ nɛ Owusoso Akaa na mɛ.

¹¹ Bafɔnɔ kibuiɛ elu asɛ, “Apalete aɖɔ asɛ, ‘Gɛ ɛnya lɛ nɛ ɛkpã koɔ,’ anɔ nyia anɔ ebedzu ekluisi esi akɔ mɛ, kɛlɛ olugbũ ka nyia ka ɔbɔdalɛ ɛlɛ mɛ ɔsɛ mɛinu Owusoso Akaa.’ ”

¹² Kliso bɔlɔ mɛ aka nyia aka ebebu yɛishu lũ akɔ Owusoso Akaa.

¹³ Kɛlɛ̀ soɔ, nɔkɔ bɔyɔlɔ bubhu tikuklu nɛ̀ bagɔlɔ. Nɛ kɛlɛ́ nɛinye mɛɛ, anɔ na nà atɛ lɔkɔ kɛdɔ̃ gɛ bakpata alo tɛ abhɛtɛ kibui alɔkɔ ebhui idzo mɛ akɔ yɛadzya nɔ.

¹⁴ Mɛ, asɛ anɔ gɛ alɛ Apalete Yesu mɛɛ anaa, kɛlɛ mɛ dalɛ ɔkɔ mɛ piapii ɔsɛ, kɛŋaŋã kpa na nà ma nɛ kɛlɛishu ahɔɛ mɛ. Pɔ anunɔ gɛ amɔ kɛŋaŋã tili asɛ kɛlɛishu gɛ dalɛɛ, kɛlɛ anɔ alɛ kɛgɛ dalɛ ɔkɔ.

¹⁵ Onupɛ kɛgɛ ɔŋãa, kɛkɔ ɔsɛ tɛ wɔele akpɛ ɔmɔpɔɛ nɔ, kɛlɛ ɔtsakɛ nɛ tɛdɛdɛmɛ nɔ nɛ̀ elé idzo abha. Tɛkɔ ɔsɛ wɔɛŋaŋã kizĩ anɔ teli yɛkpã, anunɔ gɛ yɛtakpu so pɛ Kristo ebetsíɛ.

¹⁶ Tɛkɔ kaɖɔ zizĩ na nà eyi nɛ kibui tili gɛ wɔ oɖi ɔsɛ kɛpɛ pɛ ɔbhɛtɛ shu.

¹⁷ Ɔmɔsɛ Owusoso Akaa bukusi ŋaŋãa, itinu bɔdɔ̃ ŋaŋã nɛ̀ bɔdɔ̃ wɔɛwɔɛ ibui, pɔ kinu tɛzazã piapii, ishu yɔyɔ nɛ̀ same mɔmɔ nɛ̀ Ɔfɔfuĩa Gbangbã mɛ ibui.

¹⁸ Ɔmɔsɛ anunɔ gɛ akpɛ ɛtakpu esi akɔ Kristo nɛ idzo ɛlɛ nɛidi abhaa yɛibui Owusoso Akaa adɛmɛ nɔ, kɛlɛ banɔ tsyɛ adɛmɛ atɔɖɔ kɛlɛ abha.

¹⁹ Kliso nɔkɔ bɔkpɛ emi tɛ bɔbhɛtɛ kɛgɛ bamana ishu yɔyɔɔ, tɛ bɔbhɛtɛ ebuiɛ gɛ bɔba lɔkɔ kpɛ bagɔlɔ ohumi nɔɔ nɔ̀.

²⁰ Tɛkɔ ɔsɛ kɛŋaŋã so tɛ Owusoso Akaa yɛxɔ̃ɛ izĩ. Kɛŋaŋã ka nyia ka shu dalɛ, pɔ kɛgɛpɛ ɔsɛ tɛ anɔ aŋã kɛdɔ̃ nɔnɔ́ gɛ bakɔ ɔsɛ tɛ anɔ teli etso dzi nɛ yɛtɛyɛyɛkɛŋã niede.

²¹ Kɛpɛ dɛ ɔsɛ tɛ ɔtɛtã kɛdzya alo ɔwɔɛ bunu alo ɔbhɛtɛ kɛgɛ bakɔ ɔsɛ tɛ wɔɛle nɔ etso dzi nɛ yɛtɛyɛyɛkɛŋã niede.

²² Kliso kɔ kɛgɛ ɔyɛkɛ ɔŋãa nɛ ebui alɛ shuɔ azã wɔ nɛ̀ Owusoso Akaa ete ko ishi. Tiyuyula kinu ɔkɔ anunɔ gɛ atɛ ebu yɛibuiɛ gɛ atɔɖɔ ahɔɛ nɛ kɛlɛ abhaa, nɛpɔ.

²³ Pɔ anunɔ gɛ yɛitúɔ mɛ kpɛ yɛuluhũ flogo pɛ aŋã kɛŋaŋã tiliɛɛ, aŋã ɛpɔ, ɔmɔsɛ anɛ tɛyɛyɛkɛŋã mɛ yɛalɔkɔ aŋã kɛŋaŋãa nɔ, kɛlɛ kɛka nyia ka gɛ gide koeyi nɛ tɛyɛyɛkɛŋã mɛɛ, kinu kibui kpa.