Romanɛ 13 - Nyangbo New Testament

Batɔ̃ Lulũ Ɔkɔ Bekusi

¹ Kɛlɛ sɛ anɔ nyia anɔ elũ batɔ̃ akɔ bekusiɛ gɛ aŋã bɔlɔ abhaa, ɔmɔsɛ kabha ŋaŋã na nà ma gɛ anɛ Owusoso Akaa yɛedzu alɛ. Kabha ŋaŋã gɛ alɛɛ, Owusoso Akaa yɛedzu alɛ.

² Kliso onupɛ anɔ gɛ alɔɛtití nɛ agaŋã abha shuɔ, kɛlɛ anɔ alɛ alɔɛtití nɛ Owusoso Akaa ɛbui tɔtɔɖɔ luɔ shu, kɛlɛ banunɔ gɛ abhɛtɛ anaa, bebèkulu ebhu nɛ alɛ.

³ Banunɔ gɛ baŋã abhaa, betiku ebui gbangbã bhɛbhɛtɛelete nɛifu, pɔ ebui kpa bhɛbhɛtɛeleteɛ ko. Ɔpɛ ɔsɛ tɛ ɔzã tɛ anunɔ gɛ aŋã abha etiku wɔɛifu dza? Kɛlɛ bhɛtɛ kibui gɛ ɛpɛɛ tɛ akpɛ wɔɛinye nɛitití.

⁴ Ɔmɔsɛ Owusoso Akaa axɔ̃ɛdɛ yɛenu sɛ tɛ abhɛtɛ kibuiɛ gɛ ɛpɛɛ akɔ ɔnɔ. Pɔ ɔbhɛtɛ kibui kpaa, kɛlɛ sɛ tɛ kifu yi wɔ ɔmɔsɛ bɛtɛ̀ alɛ yɛahɔɛ akɔ yɛishu axɔ̃ɛ wɔawɔa. Owusoso Akaa axɔ̃ɛdɛ yɛenu, gɛ alɛ yɛinye mɛ sɛ tɛ apɔ batɔ̃ akɔ ebui kpa bhɛbhɛtɛelete.

⁵ Kliso kɛlɛ sɛ tɛ nɔkpɛ ɛtakpu esi ɔkɔ bagaŋã abha, anɛ sɛ nɛ batɔ̃ pɔpɔ̃ ɛtakpu ete so, pɔ kinu ɛkpã gbangbã gɛ lɛshɔnɔ ɔkɔ tɛzazã.

⁶ Kɛlɛ́ nɛtakpu tsyɛ so pɛ nɔbuia ɔmɛadzɔ, ɔmɔsɛ bagaŋã abha enu Owusoso Akaa yɛaxɔ̃ɛdɛ, gɛ balɔkɔ balɛ kibe akɔ nɛ esiakpa abha axɔ̃ɛ abha tiɖiɖi mɛ.

⁷ Anɔ ka nyia ka shu gɛ nɔdɔ ɛbhɛ tiliɛ, nɔbuia ɛlɛ ɔkɔɛ, ɔmɛa dzyɔ awɔ wɔnɔ shuɔ, nɔbuia alɛ, kɛxɔ̃ɛ nɔnɔ ɛtakpu gɛ kɛlɛ ɔsɛ tɛ nɔbuia kadzyɔɔ, nɔbuia alɛ, anunɔ gɛ kɛlɛ ɔsɛ nosi yɛifuɔ, tɛ nosii, kɛlɛ anɔ gɛ kɛlɛ sɛ tɛ nɔkpɛ ɛtakpu esi ɔkɔ yɛɛ, nɔkpɛ ɛtakpu esi ɔkɔɛ.

Kiwuiɛ Tsu Ba Nɔdɛmɛ Nɛ̀ Bagɔlɔ

⁸ Nɔtɛkɔ ɛbhɛ na nà zã ɔnɔ shu, ɔdɛ tɛdɛdɛmɛ nɔ nɛ bagɔlɔ ete ko, ɔmɔsɛ anunɔ gɛ adɛmɛ nɔ nɛ yɛɔhagbo nɔɔ, kɛlɛ abhɛtɛ nɛ ɔsha pete abha.

⁹ Ɔsha ɔɖɔ ɔsɛ, “Tɛɔdɛ ɔma mɛ,” “tɛoyi anɔ,” “tɛozuru,” “Tɛɔdzã awuhũ nɛ wɔhagbo ɛdɔ̃ shu,” nɛ̀ ɔsha bhlatɔ pete nɛ ɛtakpu ibuiɛ gɛ kihu alɛ ɔtɔ̃ nu ɔsɛ, “Dɛmɛ nɛ wɔhagbo asɛ wɔshu ana.”

¹⁰ Tɛdɛdɛmɛ nɔ nɛ anɔ tɛmana kibui kpa nɛ ɔhagbo ishi. Kliso ɔsha nabha tɛbhɛbhɛtɛ ibui nu tɛdɛdɛmɛ nɔ nɛ anɔ.

¹¹ Nɔbhɛtɛ kɛlɛ tɛ nolũ kibeɛ mɛ gɛ bɔkpasɛ otsiɛ nɔ. Ɔmɔsɛ kibeɛ na ɔkɔ ɔnɔ ɔsɛ tɛ nɔnyɛmɛ odenɔ wɔnɔ taɖa dɔdɔ mɛ, ɔmɔsɛ bɔlɔ tibubu ibeɛ itsu plɛnɔ ɔlɔ ɔdɛ kibeɛ gɛ bulũ kibuiɛ pɛ bɔyɛkɛŋãa.

¹² Elishibeɛ fala, kɛlɛ keli aza nɛ ɔlɔ ebeke, kliso nɔkɔ bɔshɛ nɛ ahɔɛ nɛ otumũ mɛ ebui bhɛbhɛtɛ shu, tɛ bɔlɔkɔ keyudɔ̃ dadalɛ kpàta.

¹³ Nɔkɔ bɔzã nɛ ɛkpã gbangbã asɛ kiwui dadalɛ mɛ ana, tɛ bɔta bhɛtɛ agbagbà ebui asɛ bɔmɔ same, tɛ bɔzɛwɔ̃ɛ bunũ tizì buku, tɛ bɔɔbhɛtɛ banyɛ nɛ̀ badzɛ ebui pɛ bɔbaatɛ ishu lu esi. Kɛgɛ pɛ ɔsɛ tɛ bɔɔkpɛ ɔmɔpɔɛ tɛ bɔzɛpɛ ebalá alo tɛ bɔzɛdzã awuhũ nɛ bagɔlɔ shu.

¹⁴ Nɛ alɛ nɛinye mɛɛ, nɔkɔ bɔlɔkɔ Apalete Yesu Kristo kpɛ ishu asɛ akpɛkpɛ ana, tɛ bɔta zɛbhɛtɛ ekpeɖekpeɖe mɛ nɛ kɛmɔ gɛ bɔmɔ same nɛ kanɔ alɛ mɛebui kpa bhɛbhɛtɛ shu.