Romanɛ 10 - Nyangbo New Testament

¹ Mɛelɛ alɛ mɔ, mɛitú mɛibui tɛpɛpɛ nɛ mɛ Owusoso Akaa tikukulu nɛ Israelanɛ ɛtakpu kɛlinu sɛ tɛ bebu alɛ.

² Ɛbalà ɖɔ nɛ balɛishu ɔsɛ benu banɔ nɔnɔ́ gɛ bàkpɛ emi nɛ ɛtakpu esi kpɛkpɛ mɛ ɔkɔ Owusoso Akaa, pɔ bunyi ko betinyi ɛtakpu esi kpɛkpɛ nɛidzo.

³ Gɛ betinyi tɛzazã gbangbã gɛide Owusoso Akaa ɔkɔ soɔ, babhɛtɛ balɛ ahɔɛ tɛtɔtɔɖɔ ebui, gɛitinu itakpu esi kpɛkpɛ ɔkɔ Owusoso Akaa tɛzazã gbangbã.

⁴ Kristo yɛtɛbaba ɔkɔ ɔsɛ ohumi obele nɛ ɔsha ahɔɛ, sɛ tɛ anɔ ka nyia ka gɛ ayɛkɛ aŋãa, tɛ amɔ tɛzazã gbangbã.

⁵ Mose ebu tɛzazã gbangbã gɛ lɛ ɔsha nulũ asɛ, “Anunɔ gɛ akpɛ emi pɛ abhɛtɛ nɛ ɔsha nulũɔ abamɔ ɛkpã edenɔ kɛlɛ mɛ.”

⁶ Pɔ tɛzazã gbangbã ɔgana tɛyɛyɛkɛŋã mɛɛ, aɖɔ asɛ, “Tɛɔɖɔ nɛ wɔitúɔ mɛ ɔsɛ, ‘Afana gɛ ebewu avɛ ititíɛ?’ ” (gɛ kɛlɛ esi nu ɔsɛ, tɛ badɛ gbana Kristo amana)

⁷ “pɛnɔsɛ, ‘Afana gɛ ebezhi avɛ ozĩ dzudzuɔ mɛ̀?’ ” (gɛ kɛlɛ esi nu ɔsɛ, tɛ badɛ gbana Kristoɔ odenɔ bekpuɔ mɛ amana).

⁸ Pɔ kiɖuwoe koŋ kibuiɛ ɖɔ? Kɛɖɔ ɔsɛ, “Kibuiɛ lɛ wɔbha, kɛlɛ wɔolugbũɔ mɛ, nɛ̀ wɔɛtúɔ mɛ,” kɛlɛinu tɛyɛyɛkɛŋã ibuiɛ gɛ baɖɔɔ.

⁹ Kɛlɛinu ɔsɛ, tɛɔdalɛ kɛlɛ mɛ nɛ wɔolũgbuɔ ɔsɛ, “Yesu enu Apalete,” kɛlɛ ɔyɛkɛ ɔŋã nɛ wɔɛtúɔ mɛ ɔsɛ, Owusoso Akaa efeke edenɔ bekpuɔ mɛɛ, bebè bu wɔ.

¹⁰ Ɔmɔsɛ wɔɛtúɔ wɔlɔkɔ ɔyɛkɛ ɔŋã nɔ, pɛ bamɔ ɔsɛ onu anɔ gbangbã, kɛlɛ olugbũ wɔlɔkɔ ɔdalɛ ebui mɛ nɔ pɛ bayɛkɛ wɔ elu nɛ ɛkpã.

¹¹ Owusoso Akaa nɛibuiɛ ɖɔ ɔsɛ, “Anɔ ka nyia ka gɛ ayɛkɛ yɛabha aŋãa, kiwuĩ tɛbabà yɛabha oɖi ɖa.”

¹² Ɔmɔsɛ Yudanɛ nɛ̀ bagɛ betinu Yudanɛ pete nɔ, tenikpo balɛ. Apalete tenikpo alɛ yɛenu Apaleteɛ akɔ balɛ petee, kɛlɛ yɛeyula tutu esi akɔ anɔ nyia anɔ gɛ akpɛ ɛtakpu esi akɔɛ,

¹³ ɔmɔsɛ, “Anɔ nyia anɔ gɛ ekulu Apaleteɛ nɛinyeɛ, aba mɛ ɛkpã.”

¹⁴ So, kɛlɛ́ anɔ abalà ekulu kinye nɔnɔ́ abha gɛ agɛyɛkɛ aŋãa dza? Kɛlɛ́ babàlà yɛkɛ anunɔ gɛ bekelũ yɛɔdɔ̃ eɖiɛ abha aŋãa dza? Kɛlɛ kɛlɛ́ babalà elũ Owusoso Akaa ibuiɛ onupɛ anɔ nanà atɛ aɖɔ kɛlɛ etseɖe alɛɛ dza?

¹⁵ Kɛlɛ́ babalà ibuiɛ aɖɔ onupɛ bagɛ kpɛ ananà nɔɔ dza? Asɛ kɛfɔ̀nɔ gɛ bafɔnɔ elu asɛ, “Bagɛ bamana Owusoso Akaa ibui gbangbãa, bagbã ɔtsɛɖɛ gbangbã!”

¹⁶ Pɔ anɛ Israelanɛ petee balɛ ayɛkɛ ibui gbangbã nabha aŋã, ɔmɔsɛ Yesaya afɔnɔ elu asɛ, “Apalete, afana gɛ ayɛkɛ kibuiɛ gɛ bɔɖɔɔ tseɖe alɛ nabha aŋã?”

¹⁷ Klisoɔ, odenɔ kibuiɛ tilulũ mɛ tɛyɛyɛkɛŋã koeyi, kɛlɛ kibui ɛlɛ bulũ odenɔ Kristo yɛibuiɛ mɛ.

¹⁸ Pɔ ibisi sɛ. Begilũ dza? Baa nɔ belũ alɛ, “Balɛ kibuiɛ ozĩ kpɛkpɛ oyi gɛ lɔtsyɔa esiakpa nabha petee, balɛ ebuiɛ avɛ kanɔ nɔ̀ ɔtɔ̃ kɔ.”

¹⁹ Iwlui ka bisi sɛ. Kliso Israel egilũ ebuiɛ alɛ mɛɛ dza? Putɔ nɔɔ, Mose aɖɔ asɛ, “Ɛbakɔ nɔdzã kiwuhũ ɔkɔ bagɛ etinu kɛmadiɛ, Ɛbakɔ nɔkpɛ̀ ɔmɔpɔɛ nɛ̀ kɛmadiɛ gɛitilũ ebui esiɛ.”

²⁰ Yesaya akpɛ ité aɖɔ asɛ, “Bagɛ bagɛzapɛ mɛɛ, balɛ abamɔ mɛ, kɛlɛ bagɛ begibisì mɛtɔɔ, balɛ mɛibu mɛishu kasɛ.”

²¹ Israelanɛ pɔɔ, aɖɔ nɛ balɛishu asɛ, “Nɛ kiwuìɛ mɛ pete nɔ, ɛdalɛ mɛahɔɛ mɛ ilu ɔkɔ bagɛ beti elũ atɔ̃ɔ, nɛ̀ bagɛ balɔ kitití nɛ mɛishuɔ.”