Bìoball air-loidhne

Petro 2 3 - Nyangbo New Testament

Apaleteɛ Yɛiwuiɛ

¹ Mɛ ɔbhialɛ gɛ ɛdɛmɛnɔ, mɛ eplukpa bhlàa gɛ ɛfɔnɔ kɔ wɔnɔ nɛ alɛ. Nɛ buplukpa tɔbhaa gɛ ɛfɔnɔ sɛsɛ wɔnɔ mɛɛ, ɛlɔkɔ bakà wɔnɔ nɛ ebui alɛ shu tɛ wɔnɔ ekpeɖekpeɖe bhɛbhɛtɛ mɛ ana.

² Ɛpɛ ɔsɛ nɔ bakà ebuiɛ gɛ ebuiɖɔluanɔ dadalɛ aɖɔ elù aba falanɔ nɛ̀ ɔsha gɛ bɔlɔ Apaleteɛ gɛ ebu ɔlɔ akɔ ɔlɔ ɔganà wɔnɔ banɔkpɛkpɛ nabha.

³ Putɔnɔ kɔ ɛlɛ, kɛlɛ ɔsɛ nɔolũ kɛlɛ esi ɔsɛ̀ nɛ ewui gɔgɔɛ nɔ mɛɛ banɔ gɛezĩ banɔ shuɔ ebekoeyì, bebè zĩ anɔ shu pɛ babà za nɛ̀ ɛkpã kpa nɛ alɛ tɛpɛpɛ ulũ.

⁴ Babàɖɔ asɛ, “Gɛ atɔɖɔ asɛ ‘abaa’ pɔ yɛɛxɔ? Denɔ kibeɛ gɛ bɔlɔ akaalɛ etsíɛ, kɛka nyia ka vɛ ɛlɛ abha asɛ kana gɛ kɛzã odenɔ kanɔ nɔ̀ esi kpɛkpɛ ibè.”

⁵ Pɔ badzɛkɛ asɛ kibè dzlolo nɛlɛ gɛ ɔganà Owusoso Akaa kaɖɔ ɖɔɖɔ mɛ babhɛtɛ̀ kanɔ nɔ̀ odenɔ bulĩ mɛ gɛ kede bulĩ mɛ̀.

⁶ Denɔ beelĩ alɛ mɛ, balɔkɔ budekelĩ zĩ kanɔ nɔ̀ mɛ nɔ.

⁷ Ganà kibui ɛlɛ tinikpo mɛɛ, babàlɛ obo iwusosonɔ nɛ̀ kesiakpa elu akɔ kebhu kukulu iwui nabha ɔkɔ bagɛ etinyi Owusoso Akaa balɛ tiyiyí.

⁸ Mɛ ɔbhia alɛ gɛ ɛdɛmɛ nɔ, pɔ nɔtɛ̀ dzɛkɛ kibui tinikpo ɛlɛ ɔsɛ̀, “Nɛ apaleteɛ namɛ, kiwui tinikpo dzì asɛ agɔ ihotu, kɛlɛ agɔ ihotu tsyɛ dzì asɛ kiwui tinikpo ana.

⁹ Anɛ gɛ Apaleteɛ atɛ ahɔa nɛ yɛ tɛtɔtɔɖɔ shu asɛ ilũɔ gɛ beteli elu tɛmahɔa mahɔa esi anà. Adɔ fɔ̃ɔ kɔ ɔnɔ, gɛ atɛ apɛ asɛ tɛ̀ ananà ɛkpã zĩ, pɔ tɛ̀ aka nyia aka etsyinà yɛitúɔ mɛ.

¹⁰ Pɔ Apaleteɛ nɛiwuiɛ babà asɛ kɛba gɛ ezĩ aba ana. Nɛ iwui ɛlɛ nabhaa, kititíɛ bayalà nɛ̀ ozĩ gagalĩ, kifu bapɔɛ kititì udɔ̃, kɛlɛ kesiakpa nɛ̀ kalɛ kɛka nyia ka batã.

¹¹ Gɛ bebè zĩ kɛka nyia ka nɛidzo ɛlɛ nabha soɔ, banɔ ɖuwoe idì kɛlɛ sɛ tɛ̀ nɔodzìɛ dza? Kɛlɛ sɛ nɔzã ɛkpã dadalɛ nɛ̀ kɛtakpu esi kpɛkpɛ ɔkɔ Owusoso Akaa mɛ

¹² nɛ kibèɛ gɛ nɔoɖì idzomɛ ɔkɔ Owusoso Akaa iwuiɛ tɛbaba tsĩɔɔ nɔ. Kiwui ɛlɛ kifu bazĩ kititì ɔdɔ̃, kɛlɛ kititì ɔdɔ̃ balolò ganà kɛkpɛkpɛ hohoe mɛ̀.

¹³ Pɔ gɛ bupo kɛgɛ Owusoso Akaa atɔɖɔ eluɔ soɔ, buuɖì kidzo mɛ tsyɛ ɔkɔ kititì vɔvɔ nɛ̀ kesiakpa vɔvɔ, bɔpã lɛ mɛ̀ gɛ ebui gbangbã bhɛbhɛtɛ̀ alɛ.

¹⁴ Klisoɔ, mɛ ɔbhialɛ gɛ ɛdɛmɛ nɔ, gɛ nɔoɖì idzomɛ ɔkɔ ebui ɛlɛ soɔ, nɔbhɛtɛ kɛka nyia ka gɛ nɔbɔlà tɛ̀ batɛ mɔ kibò nɛ̀ bamɛtsitsí ibui nanà nɛ wɔnɔ shu, tɛ̀ nɔzã nɛ ishu yɔyɔ mɛ ɔplɛnii.

¹⁵ Nɔkɔ kɛzã wɔnɔ ekpeɖekpeɖe mɛ ɔsɛ, Apaleteɛ tɛdɔdɔ fɔ̃ɔ nu tɛyɛyɛkɛ kɔ ɔlɔ, asɛ kana gɛ Paulo bɔlɔ adzya gɛ bɔdɛmɛ nɔ̀ tsyɛ alɔkɔ bubutiɛ gɛ Owusoso Akaa akɔɛ afɔnɔ keplukpa akɔ wɔnɔ nɔ.

¹⁶ Nɛ kidzo ɛlɛ nabha, yɛtsyɛ afɔnɔ yɛ̀ buplukpa petee gɛ asɛsɛ wɔnɔ, pɛ aɖɔaɖɔ nɛ ebui alɛ shu nɛ bɔlɛ mɛ. Ebui teli idi akpasɛ yɛuplukpa mɛ gɛ alɛ esi lulũ agagalĩ, ebuiɛ gɛ matì matì mɛ anɔ gɛ agɛ kpɛ iguɔ etsyina etũ, asɛ gɛ babhɛtɛ nɛ ebui fɔfɔnɔ bhlatɔ tsyɛ shu ana, ɔkɔ alɛ ishu tizizĩ.

¹⁷ Klisoɔ, mɛ ɔbhia alɛ gɛ ɛdɛmɛ nɔ, gɛ nonyi kibui ɛlɛ soɔ, nɔzã nawɔ̃ sɛ tɛ̀ bagɛ betie shù ɔshaa atɛba gbanà wɔnɔ ata esi, tɛ̀ nɔotibo dɔ oboe nɛ ɔzãkɔ gɛ nodzi gagalĩɛ.

¹⁸ Pɔ nɔzã ɛlɛ tɛ nozoshè nɛ tibhui bhuibuɔ nɛ̀ bubutiɛ gɛ Apaleteɛ Yesu Kristo gɛ ayɛkɛ akɔ bɔlɔ mɛ. Yɛ bakɔ ishu dadalɛ odenɔ otsiɛ, ɔvɛnɔ tihɔɔ! Amen.

« Roimhe

Air adhart »

Lean sinn:

Ceanglaichean taic

Sanasan